Isaia 24:1-23
24 Bonang! Jehofa o dira lefatshe lolea a bo a le kgakgabatsa.+
O a le pitikolola*+ a bo a gasamisa banni ba lone.+
2 Botlhe ba tla diragalelwa ke se se tshwanang:
Batho mmogo le moperesiti,Motlhanka le mong wa gagwe,Lelata le mohumagadi wa lone,Moreki le morekisi,Yo o adimang le yo o adingwang,Yo o kolotisang le yo o kolotang.+
3 Lefatshe le tla sala le le lolea;Le tla thukuthiwa gotlhelele,+Gonne Jehofa o buile lefoko leno.
4 Lefatshe le a hutsafala;*+ le a nyelela.
Naga e e ungwang e a swaba; e a kgakgabala.
Batho ba ba tlotlegang ba lefatshe leo ba a swaba.
5 Lefatshe le kgotletswe ke banni ba lone,+Gonne ba tlhokomologile melao,+Ba fetotse melawana,+E bile ba tlodile kgolagano e e nnelang ruri.*+
6 Ke gone ka moo phutso e kometsang lefatshe,+E bile ba ba nnang mo go lone ba bonwe molato.
Ke gone ka moo banni ba lefatshe ba fokotsegileng,E bile go setse batho ba le mmalwa thata.+
7 Beine e ntšha e a kgala, morara* o a swaba,+E bile botlhe ba ba dipelo di itumetseng ba a lela.+
8 Modumo o o ipedisang wa meropana o kgaoditse;Modumo wa ba ba tlhapetsweng ke boitumelo o khutlile;Modumo o o itumedisang wa harepa o kgaoditse.+
9 Ba nwa beine ba sa opele,E bile ba ba nwang bojalwa ba utlwa bo le bogalaka.
10 Motse o o se nang batho o thubilwe;+Ntlo nngwe le nngwe e tswetswe gore ope a se ka a tsena mo go yone.
11 Batho ba lelela beine mo mebileng.
Boitumelo jotlhe bo nyeletse;Boipelo jwa lefatshe bo fedile.+
12 Motse o tlogetswe e le marope fela;Kgoro e thubagantswe gore e sale e le mokoa wa matlakala.+
13 Gonne go tla nna jaana mo lefatsheng, mo ditšhabeng:
Go tla nna jaaka fa go tlhotlhoriwa setlhare sa motlhware,+Jaaka fa go phuthiwa se se setseng morago ga thobo ya morara.+
14 Ba tla tsholetsa mantswe a bone,Ba tla goa ka boitumelo.
Ba tla itsise ka bogolo jwa ga Jehofa go tswa kwa lewatleng.*+
15 Ke gone ka moo ba tla galaletsang Jehofa kwa kgaolong ya lesedi;*+Ba tla galaletsa leina la ga Jehofa, Modimo wa Iseraele, kwa ditlhaketlhakeng tse di mo lewatleng.+
16 Re utlwa dipina tseno go tswa kwa dikhutlong tsa lefatshe:
“A kgalalelo* e newe Yo o Siameng!”+
Mme ka re: “Ke a koafala, ke a koafala!
Ruri go latlhega nna! Batho ba tsietsa ba bangwe e bile ba dira ka boferefere;Batho ba nna ba tsietsa e bile ba dira ka boferefere.”+
17 Wena monni wa lefatshe, o letetswe ke poifo le dikhuti le dirai.+
18 Mongwe le mongwe yo o tshabang modumo o o tshosang o tla wela mo khuting,Mme mongwe le mongwe yo o tswang mo khuting o tla tshwarwa ke serai.+
Gonne dikgoro tsa merwalela tse di kwa godimo di tla bulwa,Le metheo ya lefatshe e tla roroma.
19 Lefatshe le phatlogile;Lefatshe le reketlisitswe;Lefatshe le tshikinyega thata.+
20 Lefatshe le thetheekela jaaka motho yo o tagilweng,E bile le temeka le ya kwa pele le kwa morago jaaka ntlwana e temeka mo phefong.
Molato wa lone o le imela thata,+Mme le tla wa, mo le se kitlang le tsoga gape.
21 Mo letsatsing leo, Jehofa o tla atlhola lesomo le le kwa godimo thataLe dikgosi tse di mo lefatsheng.
22 Mme ba tla phuthiwa mmogoJaaka magolegwa a phuthelwa mo khuting,Mme ba tla tswalelwa mo khuting ya kgolegelo;Morago ga malatsi a le mantsi ba tla otlhaiwa.
23 Ngwedi yo o tletseng o tla tlhabiwa ke ditlhong,Le letsatsi le le phatsimang le tla swaba,+Gonne Jehofa wa masomosomo e setse e le Kgosi+ mo Thabeng ya Siona+ le kwa Jerusalema,O galalela fa pele ga bagolwane ba setšhaba sa gagwe.*+
Dintlha Tse di Kwa Tlase
^ Kgotsa “O tshopha sefatlhego sa lone.”
^ Kgotsa gongwe “le a omelela.”
^ Kgotsa “ya bogologolo.”
^ Kgotsa “diterebe; moretlwa.”
^ Kgotsa “kwa bophirima.”
^ Kgotsa “kwa botlhaba.”
^ Kgotsa “mokgabiso.”
^ Seheb., “fa pele ga bagolwane ba gagwe.”
