Isaia 36:1-22
36 Mo ngwageng wa bo14 wa ga Kgosi Hesekia, Senakeribe kgosi ya Asiria+ o ne a tlhasela metse yotlhe ya Juda e e sireletsegileng a bo a e gapa.+
2 Go tswa foo, kgosi ya Asiria e ne ya roma Rabeshake*+ a na le mophato o mogolo wa masole ba tswa kwa Lakishe+ gore ba ye kwa go Kgosi Hesekia kwa Jerusalema. Ba ne ba ema fa moseleng o o tswang mo mogobeng o o kwa godimo,+ o o mo tseleng e kgolo e e yang kwa tshimong ya motlhatswi wa matsela.+
3 Foo Eliakime+ morwa Hilekia, yo o neng a okametse ntlo ya kgosi,* Shebena+ mokwaledi le Joa morwa Asafe mokwadi wa ditiragalo ba ne ba ya kwa go ene.
4 Ka jalo, Rabeshake o ne a ba raya a re: “Tsweetswee, rayang Hesekia lo re, ‘Seno ke se kgosi e kgolo, kgosi ya Asiria, e se buang: “Tota o ikantse eng?+
5 Wena o a re, ‘Ke na le leano le maatla a go tlhabana,’ mme ao ke mafoko a a se nang mosola. O ikantse mang, go bo o ntlhanogela?+
6 O ikantse go tshegediwa ke lotlhaka lono lo lo obegileng, e bong Egepeto, lo fa motho a ikaega ka lone, lo tla tsenang mo seatleng sa gagwe lo bo lo mo tlhaba. Eo ke yone tsela e Faro kgosi ya Egepeto a ntseng ka yone mo go botlhe ba ba mo ikanyang.+
7 Mme fa lo ka nthaya lwa re, ‘Re ikantse Jehofa, Modimo wa rona,’ a ga se ene yo Hesekia a tlositseng mafelo a gagwe a a kwa godimo a a boitshepo le dibeso tsa gagwe,+ a ntse a raya Juda le Jerusalema a re, ‘Lo tshwanetse go ikoba fa pele ga sebeso seno’?”’+
8 Jaanong, tsweetswee dira tumalano eno le morena wa me kgosi ya Asiria:+ Ke tla go naya dipitse di le 2 000 fa e le gore o tla bona bapalami ba ba lekaneng ba ba ka di palamang.
9 O ka kgona jang go fenya tota le mmusi a le mongwe yo mmotlana mo batlhankeng ba morena wa me, fa e le gore o ikantse Egepeto ka ntlha ya dikara le ka ntlha ya masole a a tsamayang ka dipitse?
10 A o akanya gore ke tlile go tlhasela lefatshe leno gore ke le senye kwantle ga ka taelo e e tswang kwa go Jehofa? Jehofa ke ene a ntheileng a re, ‘Tsamaya o ye go tlhasela lefatshe leo mme o le senye.’”
11 Foo Eliakime le Shebena+ le Joa ba ne ba raya Rabeshake+ ba re: “Tsweetswee, bua le batlhanka ba gago ka puo ya Searamaika,*+ ka gonne re a se tlhaloganya; o se ka wa bua le rona ka puo ya Bajuda batho ba ba mo loboteng ba reeditse.”+
12 Le fa go ntse jalo, Rabeshake o ne a re: “A o akanya gore morena wa me o nthomile fela kwa moreneng wa gago le kwa go wena gore ke bue mafoko ano? O nthomile le kwa banneng ba ba ntseng mo loboteng, ba ba tla jang mantle a bone ba bo ba nwa motlhapo* wa bone mmogo le lona.”
13 Go tswa foo, Rabeshake o ne a ema mme a tlhaeletsa ka lentswe le le kwa godimo ka puo ya Bajuda+ a re: “Utlwang lefoko la kgosi e kgolo, kgosi ya Asiria.+
14 Seno ke se kgosi e se buang, ‘Lo se ka lwa letla Hesekia a lo tsietsa, ka gonne a ka se kgone go lo golola.+
15 Gape lo se ka lwa letla Hesekia a dira gore lo ikanye Jehofa+ ka go bua a re: “Ruri Jehofa o tla re golola, mme motse ono ga o kitla o tsenngwa mo seatleng sa kgosi ya Asiria.”
16 Lo se ka lwa reetsa Hesekia, ka gonne seno ke se kgosi ya Asiria e se buang: “Dirang kagiso le nna mme lo ineele,* mme mongwe le mongwe wa lona o tla ja mo setlhareng sa gagwe sa morara le mo setlhareng sa gagwe sa mofeige e bile o tla nwa metsi a khuti ya gagwe ya go bolokela metsi,*
17 go fitlha ke tla ke bo ke lo isa kwa lefatsheng le le tshwanang le lefatshe la lona,+ lefatshe la dijo tsa ditlhaka le beine e ntšha, lefatshe la senkgwe le masimo a morara.
18 Lo se ka lwa letla Hesekia a lo tsietsa ka go lo raya a re, ‘Jehofa o tla re golola.’ A go na le medimo epe ya ditšhaba e e kileng ya golola lefatshe la yone mo seatleng sa kgosi ya Asiria?+
19 E kae medimo ya Hamathe le Arepade?+ E kae medimo ya Sefarefaime?+ A e kgonne go golola Samarea mo seatleng sa me?+
20 Ke modimo ofe mo medimong yotlhe ya mafatshe ano o o golotseng lefatshe la one mo seatleng sa me, mo Jehofa a ka gololang Jerusalema mo seatleng sa me?”’”+
21 Le fa go ntse jalo, ba ne ba didimala mme ba se ka ba mo araba, ka gonne kgosi e ne e laetse jaana: “Lo se ka lwa mo araba.”+
22 Mme Eliakime morwa Hilekia, yo o neng a okametse ntlo ya kgosi,* le Shebena+ mokwaledi le Joa morwa Asafe mokwadi wa ditiragalo, ba ne ba boela kwa go Hesekia ba gagogantse diaparo tsa bone mme ba mmolelela mafoko a ga Rabeshake.
Dintlha Tse di Kwa Tlase
^ Kgotsa “motho yo o sielang kgosi dinô.”
^ Kgotsa “ntlo ya segosi.”
^ Kgotsa “Sesiria.”
^ Kgotsa “moroto.”
^ Seheb., “Dirang tshegofatso le nna mme lo tswele kwa go nna.”
^ Bona Ditlhaloso Tsa Mafoko.
^ Kgotsa “ntlo ya segosi.”
