Nkunga 38:1-22
Nkung’a Davidi, una se luyindulu.*
38 E Yave, kuntumbila muna makasi maku ko,Ngatu kundongela muna nsita zaku.+
2 Kadi e nzanza zaku zinkotele,O koko kwaku kundiemenene.+
3 E nitu ame yawonso iyelele mu kuma kia makasi maku.
Luvuvamu nkatu muna visi yame mu kuma kia sumu diame.+
4 Kadi mbi ame ina va ntandu a ntu ame;+Nze funda kiazita, kilenda wo nata ko.
5 E mputa zame zitele nsudi yo vaika mafinaMuna kuma kia uzowa wame.
6 Mu mpasi kikilu ngina ye ntantu zayingi;Idiatilanga kuna lukendalalu lumbu ke lumbu.
7 O ntim’ame uyangamene;*E nitu ame yawonso iyelele.+
8 Ngioyele yo kosomoka emvimba;Nkungidi mu kuma kia lukendalalu lwa ntim’ame.
9 E Yave, e zolela yame yawonso ina va ndose aku,E mvumuk’ame ke iswekamene ko vovo wina.
10 O ntim’ame ududilanga, e ngolo zame zisukidi,O meso mame mabukamene tombe.*+
11 Akundi ye akwame bantinini mu kuma kia kimbevo kiame,Akundi ame akola bampavukidi.
12 Ana bevavanga moyo ame, balekele ntambu;Awana bevavanga kunkota nsoki, bevovanga oma ma lufwasu;+Besokanga luvunu lumbu kiamvimba.
13 Nze fwa-matu, kiwanga ko;+Nze baba, kiziulanga nua ko.+
14 Ngina nze muntu ke wanga ko,Ona wina vo nu’andi ke ulendi vova ko muna kuyitanina.
15 Kadi kwa ngeye nsidi e vuvu, e Yave,+Ongeye untambulwidi, e Yave wa Nzambi ame.+
16 Kadi mpovele vo: “Kuyambula ko vo bamwena mpasi zame e kiese
Ngatu kuyisana avo kulu kwame kusielomokene.”
17 Kadi yadi bwa,E mpasi zame zikedi kaka yame.+
18 Mfunguni mbi ame;+O ntim’ame uyangamene mu kuma kia sumu diame.+
19 Kansi, e mbeni zame akwa ngolo* ye akwa nkuma,*Awana bambengene kondwa kuma, basakidi.
20 Bamputulwidi e mbi muna wete;Bansidi kimbeni wau ikuyivananga muna vanga mambu mambote.
21 Kungiambula ko, e Yave.
E Nzambi, kumpavuka ko.+
22 Wiza nswalu, wansadisa,E Yave, ngeye i luvuluzu lwame.+
Mvovo vana yand'a lukaya
^ Yovo “muna sungamesa.”
^ Mvovo wa sina: “Luketo lwame luzele ye mbangazi.”
^ Mvovo wa sina: “O ntemo a meso mame unkatukidi.”
^ Mvovo wa sina: “moyo bena.”
^ Nanga, “Awana bena vo mbeni zame kondwa kuma ndonga bena.”
