Tala mambu

Tala ntu mia mambu

  A2

Mambu Mena mu Nsekola Yayi

E Sono ya Kingerekia ya Nsekola ya Nz’ampa mu mvu wa 1950 yavaikiswa muna Kingelezo. E Bibila—Nsekola ya Nz’ampa kiamvimba mu mvu wa 1961 kiavaikiswa muna Kingelezo. Tuka mvu wauna, mafunda ye mafunda ma atangi vioka 180 za ndinga bebakanga e nluta muna tanga nsekola yayi ya ziku ye yaleboka, yasekolwa tuka muna Sono Yavauka ya ndinga za sina.

Mu mvu 50 miviokele, nsobani zayingi zivangamene mu mpila ivovelwanga e ndinga. Buka kia asekodi a Bibila—Nsekola ya Nz’ampa bamwene vo diamfunu mu sadila mvovo milenda simba e ntima mia atangi. Muna kuma kiaki, bavangidi e ngolo mu sadila mvovo mia lumbu yeto yo toma landa e ngindu zina muna ndinga za sina.

Omu nsekola yayi ya Bibila muna ye mvovo miayingi miasasilwa vana yand’a lukaya. Tala e mpila mvovo mina vana yand’a lukaya:

  • “Yovo” Mpila yankaka ilenda sekolwelwa o mvovo wa Kiyibere, Ki-aramiti yovo Kingerekia lembi soba e nsasa.—Tuku 1:2, sinsu vana mvovo “nkum’a Nzambi”; Yosua 1:8, “nding’a kuluka.”

  • “Nanga,” Mpila yankaka yambote ilenda sekolwelwa e sono, kansi e ngindu zaswaswana.—Tuku 21:6, “beseva yame,” Zakariya 14:21, “musi Kenani.”

  • “Mvovo wa sina:” Sekola e diambu mvovo muna mvovo wauna diasonamena muna Kiyibere, Ki-aramiti, Kingerekia yovo nsas’a diambu muna nding’a sina.—Tuku 30:22 “unsadisi kayimita”; Luvaiku 32:9, “ntu miangolo.”

  • Ina ye nsasa vo ye lusansu Nsas’a nkumbu (Tuku 3:17, “Adami”; Luvaiku 15:23, “Mara”); tezo ye nzongo (Tuku 6:15, “yinkoso”); muntu olembi yikilwanga muna nkumbu (Tuku 38:5, “Oyandi”); mambu mankaka mena muna Nkudika ye muna Nsas’a Mvovo.—Tuku 37:35, “Ziami”; Matai 5:22, “Ngeena.”

Kunku kia lubantiku kina ye ntu a diambu vo “Lusunzulu lwa Diambu dia Nzambi,” muna ye malongi masina ma Bibila. Kuna mfoko a nkand’a Lusengomono kuna ye “Babu kia Nkumbu za Nkanda mia Bibila,” “Mvovo mia Bibila,” ye “Nsas’a Mvovo mia Bibila.” E kunku Nsas’a Mvovo, kisadisanga ntangi mu bakula e mpila yasadilwa e mvovo miakaka muna Bibila. E Nkudika  ya A ina ye kunku eyi: “Tuludiku Muna Sekola Bibila,” “ Mambu Mena mu Nsekola Yayi,” “Aweyi e Bibila Kialwakila kwa Yeto,” “Nkumbu a Nzambi Muna Sono ya Kiyibere,” “Nkumbu a Nzambi Muna Sono ya Kingerekia ya Kikristu,” “Babu: Ngunza ye Atinu a Yuda ye Isaele,” ye “Mambu Mamfunu Mavangama Muna Zingu kia Yesu ova Ntoto.” E Nkudika ya B ina ye mapa, babu ye mambu mankaka malenda sadisa awana belongokanga e Bibila una ufwene.

Muna sadisa o ntangi mu zaya mambu mena muna nkanda miawonso, konso nkanda uyantikilanga mu yika mambu mena muna konso kapu, kumosi ye tini yandi.