Epsalme 119:1-176
-
Olupandu li na sha neendjovo daKalunga di na ondilo
-
‘Ongahelipi ovanyasha tava dulu okukaleka ondjila ya koshoka?’ (9)
-
“Ondi hole omadimbulukifo oye” (24)
-
“Ondi hole omhango yoye!” (97)
-
“Eendunge dihapu ndi dule ovahongi vange aveshe” (99)
-
“Ondjovo yoye oyo olamba yeemhadi dange” (105)
-
“Etindi londjovo yoye olo oshili” (160)
-
Ombili yaavo ve hole omhango yaKalunga (165)
-
א [Alef]
119 Ovo tava kala va hafa ovovo vehe na etimba* mondjila yavo,Ovo hava shikula omhango yaJehova.+
2 Ovo tava kala va hafa ovovo hava dulika komadimbulukifo aye,+Ovo have mu kongo nomutima wavo aushe.+
3 Ihava longo okuhenouyuki;Ohava ende meendjila daye.+
4 Owa popya kutyaOmalombwelo oye oku na okudiininwa filufilu.+
5 Ngeno onda li handi dulu okukala omudiinini,*+Ngeno ohandi ka dulika komaufomhango oye.
6 Opo nee ngeno itandi ka fifwa ohoni,+Ngeenge handi konakona oipango yoye aishe.
7 Ohandi ke ku tanga nomutima wa yuka,Ngeenge onde lihongo omatokolo oye e li pauyuki.
8 Ohandi ka dulika komaufomhango oye.
Ino efa nge nandenande.
ב [Bet]
9 Ongahelipi omunyasha ta dulu okukaleka ondjila yaye ya koshoka?
Omokulipashukila nokukatuka metwokumwe nondjovo yoye.+
10 Ohandi ku kongo nomutima wange aushe.
Ino efa ndi yapuke mo moipango yoye.+
11 Onda tuvikila ondjovo yoye momutima wange,+Opo ndiha nyone kwoove.+
12 Akutu! Jehova, tangwa;Honge nge omaufomhango oye.
13 Ohandi hepaulula nomilungu dangeOmatokolo oye aeshe, oo wa popya.
14 Ohandi hafele omadimbulukifo oye+Shi dulife oinima aishe ikwao i na ongushu.+
15 Ohandi dilonga* komalombwelo oye,+Nohandi kaleke omesho ange a tala omalila oye.+
16 Ondi hole eenghedimhango doye.
Itandi ka dimbwa ondjovo yoye.+
ג [Gimel]
17 Ungaunga nomupiya woye nonghenda,Opo ndi kale nomwenyo, nondi dulike kondjovo yoye.+
18 Pashula omesho ange, opo ndi mone nawaOinima ikumwifi okudja momhango yoye.
19 Onda fa omunailongo moshilongo.+
Ino holeka nge oipango yoye.
20 Onda* djuulukwa neenghonoOmatokolo oye efimbo alishe.
21 Owa hanyena ovalinenepeki,Ovafingwa, ovo va yapuka mo moipango yoye.+
22 Kufa po pwaame* odino nosho yo omasheko,Osheshi ohandi diinine omadimbulukifo oye.
23 Nokuli nongeenge ovaleli ova kala omutumba nokupopila nge mowii,Omupiya woye oha dilonga* komaufomhango oye.
24 Ondi hole omadimbulukifo oye;+Oku li ovayandjimayele vange.+
ד [Dalet]
25 Onda nangala,* nonde linyongamena mondwi.+
Kaleke nge nomwenyo metwokumwe nondjovo yoye.+
26 Onde ku lombwela eendjila dange, nowa nyamukula nge;Honge nge omaufomhango oye.+
27 Kwafele nge ndi ude ko eityo* lomalombwelo oye,Opo ndi dilonge* koikumwifilonga yoye.+
28 Onda* kala ihandi kofa koluhodi.
Pameke nge metwokumwe nondjovo yoye.
29 Kufa po pwaame ondjila youkengeleledi,+Nou kale wa hokwa nge nomhango yoye.
30 Onda hoolola ondjila youdiinini.+
Onda dimina kutya omatokolo oye oku li mondjila.
31 Ohandi kanyatele komadimbulukifo oye.+
Alikana! Jehova, ino efa ndi nyematekwe.*+
32 Onda halelela okushikula* ondjila yoipango yoye,Molwaashi owe i longekidila onhele momutima wange.*
ה [He]
33 Alikana! Jehova,+ honge nge ondjila yomaufomhango oye,Nohandi ke i shikula fiyo okexulilo.+
34 Pe nge eudeko,Opo ndi dule okudulika komhango yoye,Noku i diinina nomutima wange aushe.
35 Wilike nge* mondjila yoipango yoye,+Osheshi onde i hokwa.
36 Linyengifa omutima wange u kale u hole omadimbulukifo oye,Ndele hakulikola omolwokuliholamwene.+
37 Pungulula ko omesho ange aha tale koinima yongaho;+Kaleke nge nomwenyo mondjila yoye.
38 Wanifila omupiya woye eudaneko* loye,Opo u kale ho tilika.*
39 Kufe nge ohoni, oyo hai tilifa nge,Osheshi omatokolo oye omawa.+
40 Tala nghee nda halelela omalombwelo oye.
Kaleke nge ndi na omwenyo omolwouyuki woye.
ו [Waw]
41 Omwene Jehova, ulikile nge ohole yoye i na oudiinini,+Exupifo loye metwokumwe neudaneko* loye;+
42 Opo nee ohandi ka nyamukula oo ta sheke nge,Osheshi ohandi lineekele mondjovo yoye.
43 Ino kufa mo filufilu ondjovo yoshili mokanya kange,Osheshi onde lineekela* metokolo loye.
44 Ohandi twikile okudiinina omhango yoye,Alushe fiyo alushe.+
45 Nohandi ka endaenda monhele ya amenwa,*+Osheshi ohandi kongo omalombwelo oye.
46 Ohandi popi kombinga yomadimbulukifo oye moipafi yeehamba,Noitandi fi ohoni.+
47 Ondi hole oipango yoye,Heeno, ondi i hole.+
48 Ohandi yelulile oipango yoye, oyo ndi hole,+ omake ange,Nohandi dilonga* komaufomhango oye.+
ז [Zayin]
49 Dimbuluka ondjovo* yoye, oyo wa lombwela omupiya woye;Owa pa nge eteelelo* okupitila muyo.
50 Eshi osho sha hekeleka nge momafininiko ange,+Osheshi ondjovo yoye oya kaleka nge nomwenyo.
51 Ovalinenepeki ova dina nge neenghono,Ashike itandi yapuka mo momhango yoye.+
52 Akutu! Jehova, ohandi dimbuluka omatokolo oye okudja nale,+Nonda mona ehekeleko muo.+
53 Onda kwatwa kehandu lidjuu omolwovakolokoshi,Ovo va efa po omhango yoye.+
54 Omaufomhango oye oku li onga omaimbilo kwaameKeshe opo handi kala.*
55 Akutu! Jehova, oufiku ohandi dimbuluka edina loye,+Opo ndi diinine omhango yoye.
56 Osho osho nda kala handi ningi,Molwaashi ohandi dulika komalombwelo oye.
ח [Het]
57 Jehova oye oshitukulwa shange;+Onda udaneka okudiinina eendjovo doye.+
58 Ohandi ku indile* nomutima wange aushe;+File nge onghenda+ metwokumwe neudaneko* loye.
59 Onda konakona eendjila dange,Opo ndi alulile eemhadi dange komadimbulukifo oye.+
60 Ohandi endelele, noihandi ongaongaOkudiinina oipango yoye.+
61 Eengodi dovakolokoshi oda dingilila nge,Ashike omhango yoye inandi i dimbwa.+
62 Ohandi penduka mokati koufiku ndi ku pandule,+Omolwomatokolo oye a yuka.
63 Ame ondi li kaume kaaveshe ovo have ku tilaNosho yo kaavo hava dulika komalombwelo oye.+
64 Akutu! Jehova, ohole yoye i na oudiinini oye lihanena edu alishe;+Honge nge omaufomhango oye.
ט [Tet]
65 Owa ungaunga nawa nomupiya woye,Akutu! Jehova, metwokumwe nondjovo yoye.
66 Honge nge eendunge nosho yo eshiivo,+Osheshi onda tula elineekelo lange moipango yoye.
67 Ofimbo inandi fininikwa, onda li handi twalwatwalwa,*Ashike paife ohandi diinine ondjovo yoye.+
68 Oumuwa,+ noilonga yoye oiwa.
Honge nge omaufomhango oye.+
69 Omulinenepeki oha tandaveleke oipupulu kombinga yange,Ashike ohandi dulika komalombwelo oye nomutima wange aushe.
70 Omitima davo oda fya,*+Ashike ame ondi hole omhango yoye.+
71 Oshiwa, eshi nda kala handi fininikwa,+Opo ndi lihonge omaufomhango oye.
72 Omhango oyo wa shiivifa oiwa kwaame+I dule oingoli noisilveri omayovi.+
י [Yod]
73 Owa shita nge, nowa ma nge nomake oye.
Pe nge eudeko,Opo ndi lihonge oipango yoye.+
74 Ovo have ku tila ova mona nge, nova hafa,Osheshi ondjovo yoye oyo eteelelo lange.*+
75 Akutu! Jehova, ondi shi shii kutya omatokolo oye okwa yuka,+Nomolwoudiinini woye+ owa pa nge outekuduliko.
76 Ohole yoye i na oudiinini,+ alikana, nai hekeleke nge,Metwokumwe neudaneko* olo wa udanekela omupiya woye.
77 File nge onghenda, opo ndi kale nomwenyo,+Osheshi ondi hole omhango yoye.+
78 Ovalinenepeki nava fifwe ohoni,Osheshi ova udifa nge nai nopehe na etomheno lasha.*
Ashike ohandi dilonga* komalombwelo oye.+
79 Ovo have ku tila nava alukile kwaame,Ovo ve shii omadimbulukifo oye.
80 Omutima wange nau kale uhe na etimba lasha mokushikula omaufomhango oye,+Opo ndiha fifwe ohoni.+
כ [Kaf]
81 Onda djuulukwa* exupifo loye,+Osheshi ondjovo yoye oyo eteelelo lange.*
82 Omesho ange okwa djuulukwa ondjovo yoye,+Ofimbo handi ti: “Onaini to ka hekeleka nge?”+
83 Osheshi onda fa ombao* ya kukutikwa momwifi,Ashike omaufomhango oye ihandi a dimbwa.+
84 Omupiya woye oku na okuteelela omafiku angapi?
Onaini to ka tokola ovo tava hepeke nge?+
85 Ovalinenepeki ova fela nge elambo,Ovo ihava dulika komhango yoye.
86 Oipango yoye aishe oi shii okulineekelwa.
Ovanhu otava hepeke nge nopehe na etomheno lasha; kwafele nge!+
87 Hanga ova xulifa nge po kombada yedu,Ashike inandi efa po omalombwelo oye.
88 Kaleke nge nomwenyo omolwohole yoye i na oudiinini,Opo ndi dulike komadimbulukifo oo wa popya.
ל [Lamed]
89 Omwene Jehova, ondjovo yoye otai kala meuluFiyo alushe.+
90 Oudiinini woye otau kala po fiyo okomapupi aeshe.+
Edu owe li dika la pama, opo li kalelele.+
91 Omolwomatokolo oye otai* kala po fiyo okunena,Osheshi aishe oi li ovapiya voye.
92 Ngeno kanda li ndi hole omhango yoye,Ngeno onda xula po omolwokufininikwa kwange.+
93 Kandi na efiku ndi dimbwe omalombwelo oye,Omolwao owa xupifa nge ndi kale nomwenyo.+
94 Ame ondoye; xupife nge,+Molwaashi onda konga omalombwelo oye.+
95 Ovakolokoshi ova teelela va hanaune nge po,Ashike ame onda yandja elitulemo filufilu komadimbulukifo oye.
96 Onda mona kutya oinima aishe ya wanenena oi na ongaba,Ashike oipango yoye kai na ongaba.*
מ [Mem]
97 Ondi hole omhango yoye!+
Ohandi dilonga* kuyo efimbo alishe.+
98 Oshipango shoye osha ningifa nge ndi kale omunaendunge elela ndi dule ovatondi vange,+Molwaashi oshi li pwaame fiyo alushe.
99 Ondi na eendunge dihapu ndi dule ovahongi vange aveshe,+Molwaashi ohandi dilonga* komadimbulukifo oye.
100 Ohandi katuka neudeko lomoule ndi dule ovakulunhu,Molwaashi ohandi dulika komalombwelo oye.
101 Onda anya okweenda melila keshe lowii,+Opo ndi dule okudiinina ondjovo yoye.
102 Inandi yapuka mo momatokolo oye,Osheshi oove wa wilika nge.
103 Omalombwelo oye kemanyenye tuu moshihokohoko shokanya kange,E dule kokule omaadi eenyiki mokanya kange!+
104 Omolwomalombwelo oye ohandi katuka neshiivo.+
Nomolwaasho ondi tonde elila keshe la puka.+
נ [Nun]
105 Ondjovo yoye oyo olamba yeemhadi dange,Nouyelele mondjila yange.+
106 Onda ninga eano, nohandi ke li wanifa po,Opo ndi diinine omatokolo oye ouyuki.
107 Onda kala handi fininikwa neenghono.+
Alikana! Jehova, kaleke nge nomwenyo metwokumwe nondjovo yoye.+
108 Alikana, akutu! Jehova, hokwa omayambo ange ehalo liwa oku ku tanga,*+Nou honge nge omatokolo oye.+
109 Onghalamwenyo yange oi li alushe moshiponga,*Ashike inandi dimbwa omhango yoye.+
110 Omukolokoshi okwa tela nge omwiyo,Ashike inandi yapuka mo momalombwelo oye.+
111 Onda tala ko omadimbulukifo oye e li emona lange laalushe,*Osheshi oo ehafo lomutima wange.+
112 Onda tokola* okudulika komaufomhango oyeEfimbo alishe, fiyo okwaalo laxuuninwa.
ס [Samek]
113 Ondi tonde ovo ve na etatamutima,*+Ashike ondi hole omhango yoye.+
114 Oove onhele yange yokuyaama noshikelelifo shange,+Osheshi ondjovo yoye oyo eteelelo lange.*+
115 Kaleni nge kokule, nye ovakolokoshi,+Opo ndi dule okudiinina oipango yaKalunga kange.
116 Yambidide nge, ngaashi wa udaneka,*+Opo ndi twikile okukala nomwenyo;Ino efa eteelelo lange li nyemateke nge.*+
117 Yambidide nge, opo ndi xupifwe;+Opo nee ohandi ka yandja alushe elitulemo komaufomhango oye.+
118 Oto efa aveshe ovo tava yapuka mo momaufomhango oye,+Osheshi vo ovanaipupulu novakengeleledi.
119 Oto ekeleshi ovakolokoshi aveshe vokombada yedu, ovo ve li ngaashi omange.+
Nomolwaashi ndi hole omadimbulukifo oye.
120 Olutu* lange otali kakama omolwoumbada woku ku tila;Onda tila omatokolo oye.
ע [Ayin]
121 Onda ninga osho shi li mondjila noshi li pauyuki.
Ino efela nge momake aavo tava fininike nge.
122 Udaneka kutya oto ka kwafela omupiya woye;Ovalinenepeki inava fininika nge.
123 Omesho ange okwa loloka, eshi nda kala nda teelela exupifo loye+Nosho yo eudaneko* loye li li pauyuki.+
124 Ulikila omupiya woye ohole yoye i na oudiinini,+Nokuhonga nge omaufomhango oye.+
125 Ame omupiya woye; pe nge eudeko,+Opo ndi dule okushiiva omadimbulukifo oye.
126 Efimbo ola fika, opo Jehova a katuke,+Osheshi ova teya omhango yoye.
127 Nomolwaasho ondi hole oipango yoyeShi dulife oshingoli, nokuli noshingoli elela.*+
128 Onghee onda tala ko ewiliko* keshe tali di kwoove la yuka;+Ondi tonde elila keshe la puka.+
פ [Pe]
129 Omadimbulukifo oye omakumwifi.
Nomolwaasho handi dulika* kuo.
130 Okufatululwa kweendjovo doye ohaku eta ouyelele,+Taku yandje eshiivo kwaavo vehe na owino.+
131 Onda ekama okanya ka pwa ko, nokutwa omadima,*Molwaashi onda djuulukwa oipango yoye.+
132 Taalela kwaame, nokufila nge onghenda+Metwokumwe netokolo loye li na sha naavo ve hole edina loye.+
133 Wilika eenghatu dange ndi kale nda amenwa* omolwondjovo yoye;Ino efa ndi pangelwe koukolokoshi nandenande.+
134 Xupife* nge komafininiko ovanhu,Nohandi ka diinina omalombwelo oye.
135 Oshipala shoye nashi minikile* omupiya woye,+Nokuhonga nge omaufomhango oye.
136 Omesho ange otaa pololoka omahodi,Molwaashi ovanhu ihava diinine omhango yoye.+
צ [Tsade]
137 Ove omuyuki, akutu! Jehova,+Nomatokolo oye oku li pauyuki.+
138 Omadimbulukifo, oo wa yandja, oku li pauyukiNoku shii okulineekelwa filufilu.
139 Ouladi wange otau pi meni lange,+Molwaashi ovatondi vange ova dimbwa eendjovo doye.
140 Ondjovo yoye oya koshoka filufilu,+Nomupiya woye oku i hole.+
141 Inandi fimana, nondi tondike;+Ashike inandi dimbwa omalombwelo oye.
142 Ouyuki woye oo ouyuki waalushe,+Nomhango yoye oyo oshili.+
143 Nonande oudjuu noupyakadi ou hange nge,Ohandi twikile okukala ndi hole oipango yoye.
144 Ouyuki womadimbulukifo oye otau kalelele.
Pe nge eudeko,+ opo ndi twikile okukala nomwenyo.
ק [Kof]
145 Ohandi ifana nomutima wange aushe. Alikana! Jehova, nyamukule nge.
Ohandi dulika komaufomhango oye.
146 Ohandi ku ifana; xupife nge!
Ohandi ka diinina omadimbulukifo oye.
147 Onda kala oupafi, ofimbo eluwa inali tenda,* handi ku lilile ekwafo,+Osheshi eendjovo doye odo eteelelo lange.*
148 Omesho ange ohaa kala oupafi oufiku aushe,Opo ndi dilonge* kondjovo yoye.+
149 Pwilikina kondaka yange omolwohole yoye i na oudiinini.+
Alikana! Jehova, xupife nge ndi kale nomwenyo she likolelela kouyuki woye.
150 Ovo hava kufa ombinga melihumbato lififa ohoni,* ohava ehene popepi;Ove li kokule lela nomhango yoye.
151 Akutu! Jehova, ou li popepi,+Noipango yoye aishe oyo oshili.+
152 Okudja nale, onde lihonga kombinga yomadimbulukifo oye,Kutya owe a tula po a kale po fiyo alushe.+
ר [Res]
153 Tala okufininikwa kwange, ndele to xupifa nge,+Osheshi inandi dimbwa omhango yoye.
154 Popile nge* nokuxupifa nge;+Kaleke nge nomwenyo metwokumwe neudaneko* loye.
155 Exupifo oli li kokule filufilu novakolokoshi,Osheshi inava konga omaufomhango oye.+
156 Akutu! Jehova, onghenda yoye oinene.+
Kaleke nge nomwenyo metwokumwe nouyuki woye.
157 Ovapataneki vange novatondi vange ovahapu;+Ashike inandi yapuka mo momadimbulukifo oye.
158 Ohandi tale ovakengeleledi nda nyanyala,Molwaashi ihava diinine ondjovo yoye.+
159 Tala nghee ndi hole omalombwelo oye.
Alikana! Jehova, kaleke nge nomwenyo omolwohole yoye i na oudiinini.+
160 Etindi londjovo yoye olo oshili,+Nomatokolo oye aeshe, e li pauyuki, otaa kala po fiyo alushe.
ש [Sin], ile [Shin]
161 Ovapangeli otava pataneke nge+ nopehe na etomheno lasha,Ashike omutima wange owa fikama wa kuminwa eendjovo doye.+
162 Ohandi nyakukilwa ondjovo yoye,+Ngaashi umwe oo a mona oixuulwa* ihapu.
163 Ondi yele oipupulu; ondi i tonde;+Ondi hole omhango yoye.+
164 Ohandi ku tange lwoikando iheyali mefiku,Omolwomatokolo oye e li pauyuki.
165 Ovo ve hole omhango yoye otava kala ve na ombili inene;+Kape na osho tashi va pundukifa.*
166 Akutu! Jehova, onde lineekela moilonga yoye yexupifo,Nohandi diinine oipango yoye.
167 Ohandi diinine* omadimbulukifo oye,Nondi a hole neenghono.+
168 Ohandi diinine omalombwelo oye nomadimbulukifo oye,Osheshi ou shii ashishe osho handi ningi.+
ת [Taw]
169 Alikana! Jehova, ude nge, eshi handi ku lilile ekwafo.+
Udife nge ko metwokumwe nondjovo yoye.+
170 Eindilo lange, olo handi ku indile, nali fike kwoove.
Xupife nge, ngaashi wa udaneka.*
171 Omilungu dange nadi ku tange efimbo keshe,+Osheshi oho hongo nge omaufomhango oye.
172 Elaka lange nali imbe kombinga yomalombwelo oye,+Osheshi oipango yoye aishe oi li pauyuki.
173 Eke loye nali kale le lilongekida okukwafela nge,+Molwaashi onda hoolola okudulika komalombwelo oye.+
174 Akutu! Jehova, onda djuulukwa exupifo loye,Nondi hole omhango yoye.+
175 Nandi* kale nomwenyo, opo ndi dule oku ku tanga;+Omatokolo oye naa kale ekwafo kwaame.
176 Onda twalwatwalwa ngaashi odi ya kana.+ Konga omupiya woye,Osheshi inandi dimbwa oipango yoye.+
Omashangelo opedu
^ Ile “ovovo hava kanyatele oudiinini.”
^ Eln., “Ngeno eendjila dange oda li da pamenenena.”
^ Ile “konakona.”
^ Ile “Omwenyo wange owa.”
^ Eln., “Undulila kokule naame.”
^ Ile “konakona.”
^ Ile “Omwenyo wange owa nangala.”
^ Eln., “ondjila.”
^ Ile “konakone.”
^ Ile “Omwenyo wange owa.”
^ Ile “ndi fifwe ohoni.”
^ Eln., “okutondoka.”
^ Ile tashi dulika, “owa ningifa omutima wange u kale u na elineekelo.”
^ Ile “Endife nge.”
^ Ile “ondjovo.”
^ Ile tashi dulika, “Olo la ningilwa ovo have ku tila.”
^ Ile “nondjovo.”
^ Ile “onda teelela.”
^ Ile “monduda.”
^ Ile “konakona.”
^ Ile “eudaneko.”
^ Ile “Owa teelelifa nge oinima yongaho.”
^ Ile “Meumbo, omo handi kala onga omunailongo.”
^ Ile “pula ekwafo (kongo okulimemesha).”
^ Ile “nondjovo.”
^ Ile “onda li handi nyono papuko.”
^ Eln., “kadi na omaliudo, ngaashi oinghene.”
^ Ile “ohandi teelele ondjovo yoye.”
^ Ile “nondjovo.”
^ Ile tashi dulika, “noipupulu.”
^ Ile “konakona.”
^ Ile “Omwenyo wange owa lolokela.”
^ Ile “onda teelela ondjovo yoye.”
^ Ile “okandini ka longwa moshipa shoshinamwenyo.”
^ Sha hala okutya, oilonga yaye aishe.
^ Eln., “oya mbwalangadja neenghono.”
^ Ile “konakona.”
^ Ile “konakona.”
^ Eln., “omayambo ehalo liwa okanya kange.”
^ Ile “Omwenyo wange ou li meke lange alushe.”
^ Ile “efyuululo lange laalushe.”
^ Eln., “pakaleka omutima wange.”
^ Ile “ovanhu ovo omitima davo da tukauka.”
^ Ile “ohandi teelele ondjovo yoye.”
^ Ile “she likolelela kwaasho wa popya.”
^ Ile “li fife nge ohoni.”
^ Eln., “Ombelela.”
^ Ile “ondjovo.”
^ Ile “sha hemunwa.”
^ Ile “elombwelo.”
^ Ile “omwenyo wange hau dulika.”
^ Eln., “nokufuda ombeu.”
^ Ile “Pameka eenghatu dange.”
^ Eln., “Kulile.”
^ Ile “limemeshele.”
^ Ile “fiyo osheshi kwa yela.”
^ Ile “onda teelela eendjovo doye.”
^ Ile “konakone.”
^ Ile “melihumbato litondifa.”
^ Ile “Ungaunga noihokolola yange.”
^ Ile “nondjovo.”
^ Ile “omaliko oo a xupa po konima yolwoodi.”
^ Ile “Osheshi kuvo kape na endangalati mondjila.”
^ Ile “Omwenyo wange ohau diinine.”
^ Ile “metwokumwe naasho wa popya.”
^ Ile “Omwenyo wange nau.”
