Proverbio 7:1-27
7 Ana’ko, unor mo ray salitak,Tan tipon mon singa kayamanan iray ganggan ko.+
2 Unor mo ray ganggan ko pian manbilay ka;+Alwaran mon singa bukel na matam so bilin* ko.
3 Isinger mo iratan ed saray gamet mo;Iyukit mo iratan ed pusom.+
4 Ibagam ed karunongan, “Sika so agik a bii,”
Tan tawag mon “kanayon ko” so pakatalos,
5 Pian nipaliis ka ed mabanday* a bii,+Ed imoral* a bii tan saray malamuyot* a panagsalita to.+
6 Diad bintana na abung ko,Diad bintanan nansanib* et tinmakiling ak,
7 Tan legan kon oobserbaan iramay inosente,*Naimanok ed grupo na kalangweran so sakey a lakin andiay maong a pakatebek.*+
8 Sikatoy dinmalan ed karsadan asingger ed abung na sakey a bii,Tan sikatoy nanakar a paarap ditan,
9 Sanen mansirunget la,+Sanen onlalabi tan ombibilunget la.
10 Insan anengneng ko may bii ya inmabet ed sikato,Say sulong to et singa* kawes na paabang a bii+ tan walaan na mapalikdon puso.
11 Sikatoy maingal tan anawet so ulo to.+
Sikatoy ag-ondedeen* ed abung.
12 No maminsan et walad paway, no arum et walad saray plaza,Sikatoy akaamot a manatalaran diad amin lawarin suyok na karsada.+
13 Siningkat to may laki, insan to inangoban;Makapal so lupa ton angibaga:
14 “Nepeg ak a mangiyapay na saray bagat a pandurungoan.+
Natan et sinumpal ko ray sinambaan ko.
15 Kanian pinmaway ak pian minengneng ed sika,Tan anapen ta ka, et aromog ta ka!
16 Balibali ray inyapis kod dukolan ko,Saray makolor a linen a nanlapud Ehipto.+
17 Pinabalingitan ko na mira, aloe, tan sinamon so dukolan ko.+
18 Gala, pansawa-sawaan tay panangaro ta anggad kabuasan;Panliketan ta so ampetapetang ya aroan,
19 Ta anggapod abung so asawak;Sikatoy binmiahe ed arawin pasen.
20 Sikatoy angawit na sakey supot a kuarta,Tan ag-onsempet anggad aliwa nin tulaw.”*
21 Pinalikdo to imay laki diad pinasyan impanangguyor to.+
Tinukso to diad malamuyot a panagsalita to.
22 Kabebekta et sikatoy tinumbok na laki, a singa sakey a baka a mamapaarap ed panagpakgeran,Singa sakey a makulangkulang a dusaen diad panangipangawan,+
23 Anggad walay pana a tinmalos ed altey to;Sikatoy singa sakey a manok a maples ya onsusurob ed patit, agto amta a say kasalat na satan et bilay* to.+
24 Et natan, ananak ko, dengel yo ak;Imano yo ray ibabagak.
25 Agmo komon aabuloyan so pusom a nasagyat ed saray dalan to.Agka onliliko paonlad saray basbas to,+
26 Ta dakel lay inatey lapud sikato,+Tan amayamay lay pinatey to.+
27 Say abung to et mamaarap ed Lubok;*Palasur itan ed saray dalem a kuarto na ipapatey.
