Proverbio 13:1-25
13 Say anak a marunong et aawaten toy disiplina nen ama to,+Balet samay mabalaw et ag-ondedengel ed panagbano.*+
2 Say sakey a too et mangan na kamaongan manlapud bunga na sangi to,+Balet say mismon pilalek* na mapalikdo et say panggaway inkaruksa.
3 Samay aalwaran toy sangi to* et proprotektaan toy bilay* to,+Balet samay agto isasaray bibil to et mansumpal ed kadederal.+
4 Say mangiras a too et wala ray pipilaleken to, ingen ta anggapon balot so walad sikato,*+Balet say sakey* a makuli et napenepenek.*+
5 Say matunong et kabusol toy katilaan,+Balet say ikikiwas na mauges et mangiiter na kababaingan tan kabandayan.
6 Say inkatunong so manasalimbeng ed samay andiay pakabalawan so kabibilay to,+Balet say kaugsan so mangiyaabeba ed makasalanan.
7 Walay toon mankunkunwarin mayaman, balet ta andian a balot;+Wala met so toon mankunkunwarin mairap-bilay, balet ta dakdakel so kayamanan to.
8 Say kayamanan na sakey a too so panondon tod bilay* to,+Balet saray mairap-bilay et ag-anggan papagyawen.*+
9 Say silew na matunong et maliwliwawa,*+Balet say lamparaan na mauges et naerep.+
10 Say inkamapalakbat et mansumpal labat ed kolkolan,+Balet say karunongan et walad saramay onkekerew na simbawa.*+
11 Say kayamanan ya agangganon agamoran* et ondaiset,+Balet say kayamanan na samay kalkalnan mantitipon* et ondakel.
12 No agnagawa so iilaloan,* makapasakit na puso,+Balet no nagawa so pipirawaten, singa itan kiew na bilay.+
13 Siopaman a bubusolen toy bilin* et anien to ray pansumpalan na gagawaen to,+Balet samay rerespetoen toy ganggan et natumangan.+
14 Say bangat* na marunong et subol na bilay+Pian niyarawi so sakey ed saray patit na ipapatey.
15 Say walaan na aralem a pakatalos et naabobonan,Balet say kagagawa na managpalikdo et maruksa.
16 Say marunong a too et onkikiwas a makabat,+Balet say makulangkulang et ipaparungtal toy dilin inkamakulangkulang to.+
17 Say mauges a mensahero et mamapawalay problema,+Balet say matoor a mensahero et makapaabig.+
18 Siopaman a mangibabaliwala ed disiplina et manirap tan napabanday,Balet samay mangaawat na panametek et nirayew.+
19 Makapaliket ed sakey a too* no nagawa lay pipirawaten to,+Balet kabusol na makulangkulang so ompaliis ed kaugsan.+
20 Samay miuulop ed marunong et magmaliw a marunong,+Balet samay mililimog ed makulangkulang et aliwliway pansumpalan to.+
21 Uusilan na kairapan iray makasalanan,+Balet tutumangan na inkaaligwas iray matunong.+
22 Say maong a too et mangititilak na tawir ed saray apo to,Balet say kayamanan na makasalanan et tiponen parad matunong.+
23 Say binakan dalin na mairap-bilay et mamawala na dakdakel a naakan,Balet nayarin naandi itan* lapud ag-inkahustisya.
24 Siopaman a mangipapaliis na lewet* to et mamubusol ed anak to,+Balet samay mangaarod anak to et maseet* a manidisiplina ed sikato.+
25 Say matunong et mamangan tan napepesel,+Balet say eges na mauges et nanaerasan.+
Paimanod leksab
^ Odino “panametek.”
^ Odino “kamarerwa.”
^ Odino “ibabaga to.”
^ Odino “kamarerwa.”
^ Odino “kamarerwa to.”
^ Odino “kamarerwa.”
^ Literal, “napataba.”
^ Odino “kamarerwa.”
^ Literal, “anggapoy narerengel dan panagbano.”
^ Literal, “manliliket.”
^ Odino “saramay onkokonsulta ed sakey tan sakey.”
^ Literal, “samay mantitipon diad panamegley na lima.”
^ Odino “Say kayamanan a nanlapud kaapaan.”
^ Odino “ag-onsabi so tatalaranan.”
^ Odino “salita.”
^ Odino “ganggan.”
^ Odino “kamarerwa.”
^ Odino “sikatoy naandi.”
^ Odino “disiplina; dusa.”
^ Odino posiblin, “alisto.”
