Proverbio 12:1-28
12 Samay aaroen toy disiplina et aaroen toy kakabatan,+Balet samay bubusolen toy panametek et andiay kalakal.*+
2 Say maong a too et nagagamoran toy panangabobon nen Jehova,Balet kokondenaen To so toon walaan na mauges iran getma.+
3 Anggapo so toon magmaliw a maligen lapud kaugsan,+Balet say matunong et agbalot nabagot.
4 Say maong ya asawan bii et korona na asawa to,+Balet say asawan bii ya onkikiwas a makapabaing et singa sakit a mamubulok ed saray pukel na asawa to.+
5 Saray nononoten na matunong et maptek,Balet say panangiwanwan na mauges et mapalikdo.
6 Saray salita na mauges et singa makapatey a panagtambang,*+Balet say sangi na maptek so mangililiktar ed sikara.+
7 Sano dineral la ray mauges, naandi la ra,Balet say abung na matunong et mansiansian akaalagey.+
8 Nirayew so too ya aalwaran toy sangi to,+Balet samay mauges so puso to et namudmora.+
9 Mas maong ni toon ipapasen ya abeba balet ta walay lingkor toNen say toon ipapasirayew toy sarili to balet ta anggapoy naakan* to.+
10 Say matunong et aasikasoen to ray ayayep to,*+Balet anggan say panangasi na mauges et inkaruksa.
11 Samay dadalusan toy dalin to et napenek ed naakan,+Balet samay manaanap na andi-kakanaan iran bengatla et andiay maong a pakatebek.*
12 Say mauges a too et makakaibeg ed samay narel na arum a mauges a totoo,Balet say matunong et nilamot a maong tan manbubunga.
13 Say mauges a too et napapatitan ed mismon makasalanan a panagsalita to,+Balet say matunong et makakaliktar ed gonigon.
14 Say sakey a too et napepenek na kamaongan manlapud bunga na sangi to,+Tan natumangan ed kimey na saray lima to.
15 Say dalan na makulangkulang et duga ed pakanengneng to,+Balet say marunong et mangaawat na simbawa.+
16 Say makulangkulang et ipapatnag to a tampol* so pansyodot to,+Balet say makabat a too et papalabasen* toy panag-insulto.
17 Samay napanmatalkan a testigo et ibaga to so katuaan,*Balet say palson testigo et mansasalita na panamalikdo.
18 Say salitan agla ninonot et singa saray saksak na espada,Balet say dila na marunong et mamaabig.+
19 Say bibil a matua et mansiansia ya anggad angga,+Balet say dilan matila et agmanbayag.+
20 Panagpalikdo so walad puso na saramay manplaplanoy kalokoan,Balet maliket iramay mangipapaseseg* na kareenan.+
21 Anggapoy nagawan makapuy ed samay matunong,+Balet say mauges et naperaperay kairapan.+
22 Say matilan bibil et kabkabusol nen Jehova,+Balet saramay onkikiwas a matoor et makapaliket ed sikato.
23 Say makabat a too et iyaamot toy amta to,Balet say puso na makulangkulang et ibebesngaw toy inkamakulangkulang to.+
24 Saray makulin impanlima et manuley,+Balet say mangiras ya impanlima et naaripen.+
25 Say kapagaan ed puso na too so mamapabelat ed satan,*+Balet say maabig a salita so mamaliket ed satan.+
26 Say matunong et nenengnengen ton maong so pampastolan to,Balet say dalan na saray mauges so mangibabalang ed sikara.
27 Say mangiras et agto usilan so ayep a labay ton kanen,+Balet say inkakuli et mablin kayamanan na sakey a too.
28 Say basbas na inkatunong et mamaarap ed bilay;+Diad dadalanan to et anggapoy ipapatey.
Paimanod leksab
^ Odino “andiay pakatalos.”
^ Literal, “et manatalaran na dala.”
^ Literal, “tinapay.”
^ Odino “so bilay na saray ayayep to.”
^ Literal, “mankaukolan na puso.”
^ Odino “diad parehon agew.”
^ Literal, “sasakbongan.”
^ Literal, “no antoy matunong.”
^ Literal, “iramay mananimbawa.”
^ Odino “mangogonigon ed sikato.”
