Deuteronomio 25:1-19
25 “Sano walay nagawan suppiatan na totoo, nayarian day onarap ed saray ukom,+ tan ukomen da ra tan iyabawag dan andiay kasalanan imay matunong tan nankasalanan imay mauges.+
2 No makanepegan a leweten+ so sakey a mauges, sikatoy patikleben na ukom tan leweten ed arapan to. Say bilang na lewet et nepeg a misimbangan ed kaugsan na ginawa to.
3 Sikatoy nayarian ton palewet ya anggad 40 lewet,+ balet agto la paaruman. No paaruman to ni so panlewet ed sikato, napabanday so agim ed arapan mo.
4 “Agmo nepeg a balungosan so baka sano maniilik itan.+
5 “No saksakey a lugar so panaayaman na sanaagin lalaki tan ompatey ya andiay anak so sakey ed sikara, say asawa na samay inatey et agnepeg a miasawa ed sakey ya agkabiangan na pamilya. Onlad sikato so bayaw to tan sikatoy asawaen to, tan sumpalen toy obligasyon na sakey a bayaw.+
6 Say panguloan ya iyanak to so mangawit ed ngaran na samay inatey,+ pian agnaandi so ngaran to diad Israel.+
7 “Natan, no aglabay na samay laki ya asawaen imay abalon ayro to, diad saman et onlad saray mamatatken imay abalon asawa na agi to diad puerta na syudad tan ibaga to, ‘Aglabay a pansiansiaen na bayaw ko so ngaran nen agi to diad Israel. Agto labay a sumpalen so obligasyon na sakey a bayaw.’
8 Sikatoy nepeg a patawag na saray mamatatken ed syudad a kawalaan to tan mitongtong irad sikato. No siansia nin ipilit to tan ibaga ton, ‘Sikatoy agko labay ya asawaen,’
9 diad satan et sikatoy asinggeran na samay abalon ayro to diad arapan na saray mamatatken, ekalen toy sandalyas na bayaw to,+ lutdaan tod lupa, tan ibaga ton, ‘Ontan so nepeg a gawaen ed lakin agto iyalagey so sankaabungan na agi to.’
10 Kayari na satan, say apelyido to* ed Israel et natawag a, ‘Say sankaabungan na samay inekalan na sandalyas.’
11 “No walay duaran laki a manlalaban tan akibabali so asawa na sakey ed sikara pian protektaan toy asawa to ed samay mangakabil, tan inegnaan toy pribadon parte na laman na samay sakey a laki,
12 nepeg mon putoten so lima to. Agmo kakasian.
13 “Agka mangiiyan ed supot mo na duaran nandumaan a baton panagsimbang,+ sakey a baleg tan sakey a melag.
14 Agka mangiiyan ed abung mo na duaran nandumaan a panagsukatan,*+ sakey a baleg tan sakey a melag.
15 Mangusar ka na susto tan matuan simbangan tan panagsukatan, pian andukey so pambilay mo ed dalin ya iter ed sika nen Jehova a Dios mo.+
16 Ta kada toon agmatua a manggagawa ed saratan a bengatla et makapadimla ed si Jehova a Dios mo.+
17 “Nonot moy ginawa ed sikayo nen Amalek diad dalan sanen papaway kayo ed Ehipto,+
18 no panon ya inabet to kayo diad dalan tan inataki to iramay natitilak ed benegan yo sanen abanalan tan naksawan kayo. Sikatoy agtinmakot ed Dios.
19 Sano pampainawaen kayo nen Jehova a Dios yo manlapud amin ya akapaliber a kalaban yo diad dalin ya ipatawir ed sikayo nen Jehova a Dios yo,+ nepeg yon paandien ed silong na tawen so amin a pakanodnonotan ed si Amalek.+ Agyo itan lilingwanan a gawaen.
Paimanod leksab
^ Odino “say ngaran na sankaabungan to.” Literal, “ngaran to.”
^ Literal, “ed abung mo na sakey ya efa tan sakey ya efa.” Nengnengen so Apendise B14.
