Deuteronomio 18:1-22
18 “Saray Levitan saserdote, tan say interon tribu nen Levi, et ag-ikdan na apag odino tawir diad Israel. Kanen da iray apay a pinoolan parad si Jehova, a saratan so tawir to.+
2 Kanian ag-ira nawalaan na tawir ed limog na saray agagi ra. Si Jehova so tawir da, unong a sinalita tod sikara.
3 “Natan et saya so kanepegan na saray saserdote ed saray totoo: Siopaman a manbagat na kalakian a baka odino karnero et nepeg ton iter ed saserdote so takeb, panga, tan eges.
4 Iter mod sikato so unonan ilik mo, say balon alak mo, larak mo, tan say unonan bagoy karnero a kiniskis mod pulok mo.+
5 Sikato tan saray ananak to so pinili nen Jehova a Dios mo manlapud amin a tribu yo pian naynay a manlingkor diad ngaran nen Jehova.+
6 “Balet no taynan na sakey a Levita so sakey ed saray syudad yo diad Israel, a datin nanayaman to,+ tan labay to* so onlad pasen a pilien nen Jehova,*+
7 nayarian toy manlingkor ditan diad ngaran nen Jehova a Dios to a singa saray amin ya agagi to, saray Levita, a nipasen ditan ed arapan nen Jehova.+
8 Parehon karakel na naakan so naawat to a singa sikara,+ likud nid samay naawat to diad impangilako tod saray kayarian na inmuunan atateng to.
9 “Sano akaloob ka lad dalin ya iter ed sika nen Jehova a Dios mo, agmo aaralen ya aligen iray makapadimlan kagagawa na saratan a nasyon.+
10 Nepeg ya anggapoy siopaman ed sikayo a mangiparalan na anak ton laki odino bii diad apoy,+ manparles,+ manmahiko,+ mananap na saray tanda,+ sakey a managsalamangka,+
11 siopaman a kontrolen toy arum ed panamegley na mahiko, onkonsulta ed espiritista+ odino managparles,+ odino siopaman ya ontupleg ed inatey.+
12 Ta siopaman a manggagawa ed sarayan bengatla et makapadimla ed si Jehova, tan lapud sarayan makapadimlan kagagawa et pataynanen ira nen Jehova a Dios mo ed arapan mo.
13 Nepeg kan magmaliw ya andiay pakabalawan ed arapan nen Jehova a Dios mo.+
14 “Ta sarayan nasyon a pataynanen mo et dinmengel ed saray managmahiko+ tan managparles,+ balet sinebelan ka nen Jehova a Dios mo a gawaen so antokaman a singa ontan.
15 Diad saray agagim et manuro si Jehova a Dios mo na sakey a propeta a singa siak. Sikatoy nepeg mon dengelen.+
16 Satan so ebat ed samay kerew mod si Jehova a Dios mo diad Horeb ed samay agew na pantitipon*+ sanen inkuan mon, ‘Agmo la ipaparengel ed siak so boses nen Jehova a Dios ko odino ipapanengneng iyan baleg ya apoy, pian agak ompatey.’+
17 Insan inkuan nen Jehova ed siak, ‘Maabig so imbaga ra.
18 Diad saray agagi ra et manuro ak na sakey a propeta a singa sika,+ tan iyan kod sangi to iray salitak,+ tan ibaga tod sikara so amin ya ingganggan kod sikato.+
19 On, mikuentaan ak ed toon ag-ondengel ed saray salitak ya ibaga to diad ngaran ko.+
20 “‘No walay propetan mapalakbat a mansalita diad ngaran ko anta agko ingganggan, odino sikatoy mansalita ed ngaran na arum a dirios, nepeg ya ompatey itan a propeta.+
21 Balet nayarin ikuan mod sarilim: “Panon min naamtaan ya aliwan si Jehova so angibaga ed satan?”
22 No nansalita so propeta ed ngaran nen Jehova tan ag-agawa so sinalita to odino agtinmua, aliwan si Jehova so angibaga ed satan. Say propeta so mapalakbat ya angibaga ed satan. Sikatoy agyo nepeg a takotan.’
