Exodo 11:1-10
11 Nagsiling si Jehova kay Moises: “Isa pa ka kalalat-an ang ipadala ko sa Paraon kag sa Egipto. Pagkatapos sini, pahalinon na niya kamo.+ Kon palakton na niya kamo, tabugon gid niya kamo.+
2 Silinga ang katawhan nga ang tanan nga lalaki kag babayi mangayo sa ila kaingod sing mga butang nga pilak kag bulawan.”+
3 Ginpahanabo ni Jehova nga pakitaan sing kaayo sang mga Egiptohanon ang iya katawhan. Ginatahod man si Moises sang mga alagad sang Paraon kag sang mga tawo sa duta sang Egipto.
4 Nagsiling dayon si Moises: “Amo ini ang ginsiling ni Jehova, ‘Sa tungang-gab-i makadto ako sa bug-os nga Egipto,+
5 kag mapatay ang tanan nga panganay sa duta sang Egipto,+ halin sa panganay sang Paraon nga nagapungko sa iya trono tubtob sa panganay sang alagad nga babayi nga nagagaling sa galingan, kag ang tanan nga panganay sang mga sapat.+
6 Magahibi sing mabaskog ang bug-os nga Egipto, nga wala pa gid matabo kag indi na gid matabo liwat.+
7 Apang wala sing bisan isa ka ido nga magtaghol* sa mga Israelinhon, sa tawo man ukon sa sapat, agod mahibaluan ninyo nga makahimo si Jehova sing kinatuhayan sa mga Egiptohanon kag sa mga Israelinhon.’+
8 Ang tanan mo nga alagad magapalapit sa akon kag magayaub sa akon, nga nagasiling, ‘Lakat ka kag ang bug-os mo nga katawhan.’+ Pagkatapos sini, malakat ako.” Dayon naghalin sia sa Paraon nga akig kaayo.
9 Nagsiling si Jehova kay Moises: “Indi magpamati sa inyo ang Paraon,+ agod maghimo ako sing madamo pa nga milagro sa duta sang Egipto.”+
10 Ginhimo ni Moises kag ni Aaron ining tanan nga milagro sa atubangan sang Paraon,+ apang gintugutan ni Jehova nga magtig-a ang tagipusuon sang Paraon, amo nga wala niya ginpalakat ang mga Israelinhon halin sa iya duta.+
Footnote
^ Sa literal, “magpatalom sang iya dila.”
