Ezai 63:1-19
63 ?Wan li yɛ ɔ fin Edɔmun+ ba,m’ɔ fin Bɔzra+ mɔ tralɛ mɔ i ɲin kpaja’n* wlɛ i wun,mɔ tralɛ klanman wlɛ i wun,m’ɔ nanti wunmiɛn su’n niɔn?“N bɔbɔ min-ɔn, min mɔ n kan ndɛ ng’ɔ ti su’n niɔn,min mɔ n le tinmin dan mɔ n fa de sran’n niɔn.”
2 ?Ngue ti yɛ ɔ tralɛ’n ti ɔkwlɛ-ɔ??Ngue ti yɛ ɔ tralɛ’n ti kɛ sran m’ɔ yi duvɛn’n i liɛ’n sa-ɔ?+
3 “Min kunngba yɛ n yili duvɛn’n niɔn.Nvlefuɛ’m be nun wie fi w’a ukaman min.N tiatiali be su ya su,n fali ya dan n tiatiali be su.+Be mmoja’n guali min tralɛ’m be nun,n yoli min tralɛ’m be kwlaa be fiɛn.
4 Afin m’an sie min klunngbɔ tulɛ cɛn kun,+min sran’m be ti kpɔlɛ afuɛ’n w’a ju.
5 N nianniannin, sanngɛ sran fi nunman lɛ naan w’auka min.Kɛ n wunnin kɛ sran fi ukaman min’n, i sɔ’n yoli min ya.Ɔ maan min bɔbɔ min sa’n yɛ ɔ yoli maan n fiteli nun-ɔn,+ya dan mɔ n fali’n ti’n, n ɲannin wunmiɛn n yoli sa sɔ’n.
6 Kɛ n fali ya’n n tiatiali nvlenvle’m be su.N yoli maan min ya dan’n ɔ boli be kɛ nzan sa,+yɛ n guali be mmoja’n i ase.”
7 Sa nga Zoova yoli be mɔ be kle kɛ ɔ klo sran dan’n,sa nga Zoova yoli be mɔ be nin manmanlɛ fata’n, ń má kán be ndɛ.Zoova yoli ninnge kwlaa sɔ mun mannin e,+ɔ yoli ninnge kpakpa kpanngban mannin Izraɛli nvle’n,afin i aunnvɔɛ silɛ’n nin i sran klolɛ’n ti dan.
8 Afin ɔ seli kɛ: “Nanwlɛ, be ti min nvle’n nunfuɛ, be ti ba mɔ be su kpɔciman min-ɔn.”*+Ɔ maan ɔ kacili be Defuɛ.+
9 Blɛ kwlaa mɔ be o ɲrɛnnɛn nun’n, i wla boli i wun.+Kpɛkun i bɔbɔ i sran m’ɔ sunmɛn i’n,* ɔ deli be.+I sran klolɛ nin i aunnvɔɛ silɛ’n ti’n ɔ kpɔli be ti.+Laa blɛ’n nun’n, ɔ mannin be su yɛ ɔ suali be blɛ kwlaa nun.+
10 Sanngɛ be yoli ɲin kekle,+ yɛ be boli Ɲanmiɛn i wawɛ’n i wla.+Ɔ maan ɔ kacili be kpɔfuɛ,+yɛ ɔ nin be kunnin.+
11 Kpɛkun be wla kpɛnnin laa blɛ liɛ’n su,be wla kpɛnnin Moizi m’ɔ ti i sufuɛ’n i blɛ liɛ’n su. Be seli kɛ:“?Sran ng’ɔ fali be nin i nnɛn’m be sunianfuɛ mun+ jenvie’n nun fiteli’n,+ ɔ o nin??Sran ng’ɔ fɛli i wawɛ’n mɛnnin i’n,+
12 sran ng’ɔ yoli maan i sa m’ɔ le ɲrun’n ko sunmannin Moizi i sa fama’n,+sran ng’ɔ kpacili nzue’n nun be ɲrun+naan i dunman’n ka lɛ tititi’n,+
13 sran ng’ɔ yoli maan be kpɛli nzue m’ɔ bo dan’n,*mɔ be ja w’a kplaman’n,mɔ be yoli kɛ nnɛn kpanngɔ wie m’ɔ o blo* lɔ’n sa’n, ɔ o nin?
14 Kɛ nga be fa nnɛn’m be kɔ lika kpɛtɛkplɛɛ’n nun lɔ’n sa’n,Zoova i wawɛ’n yoli maan be loli wunmiɛn.”+Wafa nga a kleli ɔ nvle’n nunfuɛ’m be atin’n yɛ ɔ o lɛ-ɔ.A yoli sɔ naan ɔdunman’n fu.+
15 Kɛ a o ɲanmiɛn su lɔ’n, kpɛ ɔ ɲin asiɛ’n su wa naan nian,kɛ a o ɔ sua dan m’ɔ ti sanwun’n, m’ɔ ti klanman’n nun lɔ’n, kpɛ ɔ ɲin ase nian.?Ɔ like juejue su yolɛ’n, nin ɔ kwlalɛ’n,ɔ sran klolɛ mɔ i ti ɔ wun usu wɔ’n,+ nin ɔ aunnvɔɛ silɛ’n+ be o nin?B’a wɔ e* wun mmua.
16 Afin a ti e Si,+kannzɛ bɔbɔ Abraamun siman e’n,naan Izraɛli wunman e wlɛ’n,sanngɛ Zoova, a ti e Si.Kɛ ɔ fɛ i laa lele’n, be flɛ wɔ E Ti Kpɔfuɛ.+
17 ?Ee Zoova, ngue ti yɛ a yaci e lɛ* mɔ e wlan daan, mɔ e faman ɔ atin’m be su-ɔ??Ngue ti yɛ a yaci e lɛ* mɔ e awlɛn’n kete, mɔ e sroman wɔ-ɔ?+Sa ɔ sin, ɔ sufuɛ’m be dunman nun ti,akpasua mɔ be ti ɔ aja like’n i dunman nun ti.+
18 Ɔ nvle m’ɔ ti sanwun’n, ɔ fali lika sɔ’n blɛ kpe kan nun.E kpɔfuɛ’m be tiatiali ɔ sua’n su.+
19 E kacili kɛ be mɔ a nin-a sieman be le’n sa w’acɛ kpa,e kacili kɛ be mɔ ɔ dunman’n nin-a tranman be su le’n sa.
Ja ngua lɔ ndɛ mun
^ Be kwla se ekun kɛ “ɔkwlɛ bioun.”
^ Annzɛ “be su kpɛman gblɛ-ɔ.”
^ Annzɛ “i anzi m’ɔ o i ɲrun’n.”
^ Annzɛ “nzue mɔ i bo ti kploun’n.”
^ Annzɛ “aawlɛ flɛnnɛn’n nun.”
^ Ebr., “min.”
^ Annzɛ “a yo.”
^ Ebr., “a yo.”
