Ezai 39:1-8
-
Sran nga Babilɔnin famiɛn’n sunmannin be’n (1-8)
39 Blɛ sɔ’n nun’n, Baladan i wa Merodaki-Baladan m’ɔ ti Babilɔnin famiɛn’n, ɔ klɛli fluwa ko mannin Ezekiasi,+ yɛ ɔ cɛli i like. Afin ɔ tili i kɛ i wunnɛn yoli i ya naan w’a yo juejue.+
2 Ezekiasi sɔli be nun klanman,* yɛ ɔ fali ninnge nga be o i ninnge kpakpa’m be siewlɛ’n nun’n kleli be.+ Ɔ fali sika, nin sika ɔkwlɛ, nin bomie ngo, nin ngo kpakpa uflɛ wie mun, nin i alɛ kunlɛ ninnge’m be kwlaa, nin ninnge kwlaa nga be o i ninnge kpakpa’m be siewlɛ’m be nun’n kleli be. Ezekiasi i sua’n* nin i famiɛn diwlɛ’n be nun ninnge wie fi nunman lɛ mɔ w’a fa kleman be-ɔ.
3 I sin’n, Ɲanmiɛn nuan ijɔfuɛ Ezai wa wunnin Famiɛn Ezekiasi wun. Ɔ usɛli i kɛ: “?Sran sɔ’m be waan nzɛ? ?Yɛ nin yɛ be fin-ɔn?” Ezekiasi tɛli su kɛ: “Be fin mɛn kun m’ɔ o mmua kpa’n nun, be fin Babilɔnin.”+
4 I sin’n ɔ usɛli i kɛ: “?Ngue yɛ be wunnin i ɔ sua’n* nun-ɔn?” Ezekiasi tɛli su kɛ: “Be wunnin min sua’n* nun ninnge’m be kwlaa. Min ninnge kpakpa’m be siewlɛ’m be nun like fi nunman lɛ mɔ m’an fa kleman be-ɔ.”
5 Yɛ Ezai seli Ezekiasi kɛ: “Ndɛ nga Zoova m’ɔ ti sonja’m be su kpɛn’n kan’n yɛ:
6 ‘Nian! Blɛ wie wá jú’n, ninnge kwlaa nga be o ɔ sua’n* nun’n, ɔ nin ninnge kwlaa nga ɔ nannan’m be tiantiannin be nuan lele mɔ w’a fa ju andɛ’n, bé fá be kɔ́ Babilɔnin. Like fi su kaman lɛ.’+ Zoova yɛ ɔ kan sɔ-ɔ.+
7 ‘Kpɛkun bé trá ɔ bɔbɔ ɔ mma mun be nun wie mun kɔ́, yɛ bé káci Babilɔnin famiɛn’n i awlo’n nun junman difuɛ.’”+
8 Kɛ ɔ yoli sɔ’n, Ezekiasi tɛli su kɛ: “Zoova i nuan ndɛ nga a kɛnnin i lɛ’n ɔ ti kpa.” Yɛ ɔ kan guali su kɛ: “Afin min ɲin su’n,* fɔundi’n nin alaje’n* bé trán lɛ.”+
