Mga Proberbios 11:1-31
11 An diri tangkod* nga timbangan mangil-ad kan Jehova,Pero an eksakto nga panimbang* nakakapalipay ha iya.+
2 Kon nagkakaada pagbuot-buot, masunod an kaarawdan,+Pero an kinaadman aada ha mga mapainubsanon.+
3 An integridad han magtadong an naggigiya ha ira,+Pero an pagin malimbong han mga diri maunungon magbubungkag ha ira.+
4 An bahandi* magigin waray pulos ha adlaw han kapungot,+Pero an pagkamatadong an magtatalwas tikang ha kamatayon.+
5 An pagkamatadong han tawo nga waray ikasaway nagtatadong han iya aragian,Pero an maraot nga tawo matutumba tungod han iya mismo karaotan.+
6 An pagkamatadong han mga tangkod magtatalwas ha ira,+Pero an mga diri maunungon madadakop tungod han ira mismo mga hingyap.+
7 Kon namamatay an maraot nga tawo, nahahanaw an iya paglaom;Ngan an iya pagsarig ha iya kalugaringon nga kusog nahahanaw liwat.+
8 An matadong nga tawo gintatalwas tikang ha kasakitan,Ngan an maraot nga tawo an nasaliwan ha iya.+
9 Pinaagi han baba han apostata* iya gindadara ha kabungkagan an iya igkasi-tawo,Pero pinaagi han kahibaro an magtadong gintatalwas.+
10 Tungod han pagkamaopay han magtadong an usa nga syudad nagrarayhak,Ngan kon namamatay an magraot, may malipayon nga pagsinggit.+
11 Tungod han bendisyon han magtadong napapahitaas an usa nga syudad,+Pero ginruruba ito han baba han magraot.+
12 An bisan hin-o nga waray maopay nga panhunahuna* nagtatamay ha iya igkasi-tawo,Pero an tawo nga may husto nga pagturotimbang nahilom la.+
13 An parapakaraot naglalakat-lakat pagpinanumat han mga sekreto han iba,+Pero an masasarigan nga tawo* nagtitipig hin sekreto.*
14 Kon waray maopay nga sagdon,* napapakyas an katawohan,Pero may kalamposan* ha damu nga magsaragdon.+
15 An bisan hin-o nga naggagarantiya para ha utang han usa nga estranghero sigurado nga maghihikaraot,+Pero an bisan hin-o nga naglilikay* ha pakiglamano sugad nga kolateral magigin talwas.
16 An maopay* nga babaye nakakakarawat hin dungog,+Pero an mga matalumpiguson nangangagaw hin mga bahandi.
17 An buotan nga tawo* nagbubuhat hin maopay ha iya kalugaringon,*+Pero an mapintas nga tawo naghahatag hin problema* ha iya kalugaringon.+
18 An maraot nga tawo nakarawat hin waray pulos nga suhol,+Pero an tawo nga nagsasabwag hin pagkamatadong nakarawat hin tinuod nga balos.+
19 An tawo nga nadapig hin marig-on ha katadongan makakakarawat han kinabuhi,+Pero an tawo nga naglilinanat han karaotan makakakarawat han kamatayon.
20 An mga tawo nga baliko an kasingkasing mangil-ad kan Jehova,+Pero an mga tawo nga an pagkinabuhi waray ikasaway nakakapalipay ha iya.+
21 Makakasiguro ka hini:* An maraot nga tawo diri makakalikay ha sirot,+Pero an mga anak han magtadong makakatalwas.
22 Pariho hin bulawan nga singsing ha simod han baboyAn mahusay nga babaye nga nagsasalikway han maopay nga panhunahuna.
23 An hingyap han magtadong nagriresulta hin maopay,+Pero an ginlalaoman han magraot nagriresulta hin kapungot.
24 May tawo nga naghahatag hin hura* pero nagtitikadamu an iya panag-iya;+May tawo liwat nga diri nanhahatag han angay ihatag pero nagigin pobre lugod.+
25 An mahinatagon nga tawo* mag-uuswag,*+Ngan an bisan hin-o nga nagrirepresko* ha iba, hiya mismo marirepreskohan.+
26 Igsusumpa han katawohan an tawo nga nagdudumiri pagbaligya hin lugas,*Pero ira bibendisyonan an tawo nga nagbabaligya hito.
27 An tawo nga maduruto ha pagbuhat hin maopay namimiling hin pag-uyon,+Pero an tawo nga namimiling hin karaotan—ito an sigurado nga maabot ha iya.+
28 An tawo nga nasarig ha iya mga bahandi matutumba,+Pero an magtadong mag-uuswag pariho han nagrarabong nga mga dahon.+
29 An bisan hin-o nga naghahatag hin problema* ha iya panimalay makakapanunod han hangin,+Ngan an lurong magigin surugoon han tawo nga maaramon an kasingkasing.
30 An bunga han matadong nga tawo usa nga kahoy han kinabuhi,+Ngan maaramon an tawo nga nagkakabig hin mga kalag.*+
31 Kon an matadong nga tawo ha tuna nakarawat han angay ha iya,Labi na gud an maraot nga tawo ngan an makasasala!+
Mga footnote
^ O “eksakto nga bato nga panimbang.”
^ O “An malimbong.”
^ O “birilhon nga mga butang.”
^ O “maraot.”
^ O “nga an kasingkasing waray maopay nga pagturotimbang.”
^ Lit., “an tawo nga matinumanon an espiritu.”
^ Lit., “nagtatago han usa nga butang.”
^ O “maaramon nga giya.”
^ O “katalwasan.”
^ Lit., “nangangalas.”
^ O “makaruruyag.”
^ O “An tawo nga may maunungon nga gugma.”
^ O “nagbubuhat hin maopay ha iya kalag.”
^ O “kaarawdan.”
^ O “Bisan pa maglamanohay.”
^ Lit., “nagsasaburak.”
^ O “kalag.”
^ Lit., “patatambukon.”
^ Lit., “nagsasaribo hin hura.”
^ O “kaarawdan.”
