Mga Proberbios 6:1-35

  • Pag-ikmat ha paggarantiya hin utang (1-5)

  • ‘Kadto ha tubak, ikaw nga hubya’ (6-11)

  • Waray pulos ngan maraot nga tawo (12-15)

  • Pito nga butang nga ginkakangalasan ni Jehova (16-19)

  • Pagbantay ha maraot nga babaye (20-35)

6  Anak ko, kon naggarantiya ka para ha utang han* imo igkasi-tawo,+Kon nakiglamano* ka ha usa nga estranghero,+   Kon nalit-ag ka han imo saad,Kon nadakop ka han mga pulong han imo baba,+   Buhata ini, anak ko, ngan talwasa an imo kalugaringon,Kay nahulog ka ha kamot han imo igkasi-tawo: Lakat ngan pagpaubos ngan pakimalooy gud ha imo igkasi-tawo.+   Ayaw tuguti an imo mga mata nga kumaturog,O an imo mga lukaplukap nga pumiyong.   Talwasa an imo kalugaringon pariho hin gasela tikang ha kamot han parapanganop,Pariho hin tamsi tikang ha kamot han parapanakop hin tamsi.   Pakadto ha tubak,* ikaw nga hubya;+Obserbari an mga ginbubuhat hito ngan magin maaramon.   Bisan kon waray ito kumander, lider, o magmarando,   Ha katpaso nag-aandam ito hin pagkaon,+Ngan ha pangani nagtitirok ito hin suplay han pagkaon.   Ikaw nga hubya, tubtob san-o ka maghihinigda dida? San-o ka mabuhát tikang ha imo pagkaturog? 10  An gutiay nga pagkaturog, an gutiay nga pagpiyong,An gutiay nga pagtákop han mga kamot basi pumahuway,+ 11  Magdadara ha imo ha kapobrehan pariho han pag-abot hin tulisan,Ngan magdadara ha imo ha kakulangan pariho han pag-abot hin armado nga tawo.+ 12  An waray pulos ngan maraot nga tawo naglilinakat-lakat nga may baliko nga panyakan;+ 13  Nakiro hiya,+ naghihimo hin mga sinyales gamit an iya tiil, ngan nagsisinyas gamit an iya mga tudlo. 14  Pinaagi han malimbong nga kasingkasing,Pirme hiya nagpaplano hin maraot+ ngan nagpapasarang hin mga samok.+ 15  Salit an iya kasakitan tigda nga maabot;Ha usa la ka takna madadaot hiya ngan diri na mag-oopay.+ 16  May unom nga butang nga ginkakangalasan ni Jehova;Oo, pito nga butang nga mangil-ad ha iya:* 17  Mapahitas-on nga mga mata,+ buwaon nga dila,+ ngan mga kamot nga nagpapatay hin inosente nga tawo,*+ 18  Kasingkasing nga nagpaplano hin magraot,+ ngan mga tiil nga nadalagan hin malaksi ngadto ha karaotan, 19  Buwaon nga testigo nga nagbubuwa ha tagsa niya nga pagginhawa,+Ngan an bisan hin-o nga nagsasabwag hin mga samok dida ha mga magburugto.+ 20  Anak ko, sunda an sugo han imo tatay,Ngan ayaw igsalikway an instruksyon* han imo nanay.+ 21  Pirme ito ihigot ha imo kasingkasing;Isangbod ito ha imo liog. 22  Ha imo paglakat, maggigiya ito ha imo;Ha imo paghigda, magbabantay ito ha imo;Ngan ha imo pagmata, makikiistorya* ito ha imo. 23  Kay an sugo usa nga lampara,+Ngan an balaud usa nga suga,+Ngan an pagsaway ngan disiplina amo an dalan ngadto ha kinabuhi.+ 24  Magbabantay ito ha imo kontra ha maraot nga babaye,+Kontra ha nakakadani nga mga pulong han imoral* nga babaye.+ 25  Ayaw hingyapa ha imo kasingkasing an iya kahusay+ Ngan ayaw hiya tuguti nga bihagon ka pinaagi han iya nakakadani nga mga mata, 26  Kay tungod han usa nga hostes, usa na la ka bug-os nga tinapay an nahisasalin ha usa nga lalaki,+Kondi an asawa han iba nga lalaki nanbibiktima hin presyoso nga kinabuhi.* 27  Makakabutang ba an usa ka tawo hin kalayo ha iya dughan nga diri masusunog an iya mga bado?+ 28  O makakalakat ba an usa ka tawo ha mga bága nga diri mapapaso an iya mga tiil? 29  Pariho liwat hito an nakikighilawas ha asawa han iya igkasi-tawo;Waray bisan usa nga naglalabot ha iya an diri sisirotan.+ 30  Diri ginmiminos han mga tawo an usa nga kawatan Kon nangangawat hiya basi mabusog* ha panahon nga gutom hiya. 31  Pero kon masakban hiya, magbabayad hiya hin pito ka pilo;Iya ihahatag an ngatanan nga birilhon nga butang ha iya balay.+ 32  An bisan hin-o nga nag-aadulteryo ha usa nga babaye waray maopay nga panhunahuna;*An tawo nga nagbubuhat hito nagdadara hin kadaot ha iya kalugaringon.*+ 33  Mga samad ngan kaarawdan la an iya makukuha,+Ngan an iya kaalohan diri mapapara.+ 34  Kay an pangabugho nakakapasina gud ha usa nga bana;Ha iya pagbulos diri hiya magpapakita hin pagpaid.+ 35  Diri hiya makarawat hin bayad;*Diri mawawara an iya kasina, anoman kadaku an imo iregalo ha iya.

Mga footnote

Lit., “nagpasarig ka para ha.”
Karuyag sidngon, ha usa nga pakigsabot.
Ha iba nga lugar, “tigasaw.”
O “iya kalag.”
Lit., “nagpapaagay hin inosente nga dugo.”
O “balaud.”
O “magtututdo.”
Lit., “dayo.” Kitaa an Pr 2:16.
O “kalag.”
O “busgon an iya kalag.”
O “waray maopay nga pagturotimbang an kasingkasing.”
O “iya kalag.”
O “lukat.”