An Siyahan nga Libro ni Samuel 31:1-13
-
Namatay hi Saul ngan an iya tulo nga anak (1-13)
31 Hito nga panahon an mga Filisteo nakikiggirra ha Israel.+ Ngan an kalalakin-an han Israel namalagiw tikang ha atubangan han mga Filisteo, ngan damu an ginpamatay ha Bukid Gilboa.+
2 Ginlanat han mga Filisteo hi Saul ngan an iya mga anak nga lalaki tubtob nga naabtan hira, ngan ginpamatay han mga Filisteo hira Jonathan,+ Abinadab, ngan Malki-sua, nga mga anak ni Saul.+
3 Nagtikaduro an pakiggirra kontra kan Saul, ngan hin-agian hiya han mga parapamana, ngan nasamaran hiya hin grabe han mga parapamana.+
4 Katapos, nagsiring hi Saul ha iya paradara han mga gamit nga pan-girra: “Hulbota an imo espada ngan ibuno ito ha akon, basi inin diri turi nga kalalakin-an+ diri kumanhi ngan bun-on ako ngan trataron ako hin waray kalooy.”* Kondi nadiri an iya paradara han mga gamit nga pan-girra, kay nahahadlok gud hiya. Salit ginkuha ni Saul an espada ngan ginbuno an iya kalugaringon.+
5 Han nakita han paradara han mga gamit nga pan-girra ni Saul nga patay na hiya,+ ginbuno liwat niya an iya kalugaringon gamit an iya espada ngan namatay ha sapit ni Saul.
6 Salit hi Saul, an iya tulo nga anak, an iya paradara han mga gamit nga pan-girra, ngan an ngatanan niya nga tawo parapriho nagkamatay hito nga adlaw.+
7 Han nakita han katawohan han Israel nga nakadto ha rehiyon han walog* ngan ha rehiyon han Jordan nga namalagiw na an kalalakin-an han Israel ngan patay na hi Saul ngan an iya mga anak, nagtikang hira bumaya ha mga syudad ngan namalagiw.+ Katapos hito, an mga Filisteo nangabot ngan gin-ukyan ito.
8 Kinabuwasan, han an mga Filisteo nangabot basi panguhaon an mga gamit han mga ginpamatay, nakita nira hi Saul ngan an iya tulo nga anak nga patay na ha Bukid Gilboa.+
9 Salit ira hiya ginpugotan ngan ginpananggal an iya mga gamit nga pan-girra ngan nagpadara hin mensahe ha bug-os nga tuna han mga Filisteo nga ipasamwak an sumat+ ngadto ha mga balay* han ira mga idolo+ ngan dida ha katawohan.
10 Katapos, an iya mga gamit nga pan-girra ira iginbutang ha balay han mga imahen ni Astoret ngan ginbitay an iya patay nga lawas ha pader han Bet-san.+
11 Han nabatian han mga umurukoy han Jabes-gilead+ an ginbuhat han mga Filisteo kan Saul,
12 binuhát an ngatanan nga girriro ngan nagbiyahe ha bug-os nga gab-i ngan ginpanguha ha pader han Bet-san an lawas ni Saul ngan han iya mga anak. Binalik hira ha Jabes ngan ginsunog ito didto.
13 Katapos, ira ginkuha an ira mga tul-an+ ngan ginlubong ito ha ilarom han kahoy nga tamarisko ha Jabes,+ ngan nagpuasa hira hin pito ka adlaw.
