An Siyahan nga Libro ni Samuel 13:1-23
13 Hi Saul . . .* anyos han nagin hadi hiya,+ ngan naghadi hiya ha Israel ha sulod hin duha ka tuig.
2 Nagpili hi Saul hin 3,000 nga kalalakin-an ha Israel; an 2,000 ha ira kaupod ni Saul ha Micmash ngan ha kabukiran han Bethel ngan an 1,000 kaupod ni Jonathan+ ha Gibeah+ han Benjamin. An iba pa han katawohan iya ginpauli ha tagsa nira nga tolda.
3 Katapos, ginpirde ni Jonathan an grupo han Filisteo+ nga mga sundalo nga aadto ha Geba,+ ngan an mga Filisteo nakabati mahitungod hito. Ngan nagsugo hi Saul nga huypan an sungay+ ha bug-os nga Israel, nga nasiring: “Pabatia an mga Hebreo!”
4 Nabatian han bug-os nga Israel ini nga sumat: “Hi Saul nagpirde hin grupo han Filisteo nga mga sundalo, ngan yana nangangalas gud an mga Filisteo ha mga Israelita.” Salit iginpatawag an katawohan basi sumunod kan Saul ha Gilgal.+
5 An mga Filisteo nagtirirok liwat basi makiggirra ha Israel, ngan may-ada hira 30,000 nga pan-girra nga karuwahe ngan 6,000 nga parapangabayo ngan mga sundalo nga sugad kadamu han mga baras ha baybayon;+ ngan nagkasagka hira ngan nagkampo ha Micmash ha este han Bet-aven.+
6 Ngan nakita han katawohan han Israel nga namimeligro hira, kay makuri gud an ira kahimtang; salit an katawohan nanago ha mga lungib,+ ha mga buho han mga bato, ha dagku nga mga bato, ha mga kwarto ha ilarom han tuna, ngan ha mga tirokan hin tubig.
7 An iba han mga Hebreo nanabok pa ngani ha Jordan ngadto ha tuna han Gad ngan han Gilead.+ Pero hi Saul nakadto pa gihapon ha Gilgal, ngan nangungurog an ngatanan nga katawohan nga nasunod ha iya.
8 Naghinulat hiya hin pito ka adlaw tubtob han panahon nga itinanda ni Samuel, pero waray umabot hi Samuel ha Gilgal, ngan an katawohan nagbuburublag na tikang kan Saul.
9 Ha kataposan hi Saul nagsiring: “Dad-a ngadi ha akon an halad nga sinunog ngan an mga halad nga ginsasarosaroan.” Ngan iya iginhalad an halad nga sinunog.+
10 Kondi katapos gud niya maghalad han halad nga sinunog, inabot hi Samuel. Salit ginawas hi Saul basi tapoon ngan kumustahon hiya.*
11 Katapos hi Samuel nagsiring: “Ano ini nga imo ginbuhat?” Binaton hi Saul: “Nakita ko nga ginbabayaan na ako han katawohan,+ ngan waray ka umabot ha sulod han itinanda nga panahon, ngan an mga Filisteo nagtitirirok na ha Micmash.+
12 Salit nagsiring ako ha akon kalugaringon, ‘Yana an mga Filisteo malugsad ngadi ha Gilgal ngan susulungon ako, ngan waray ko pa hangyoa an pag-uyon* ni Jehova.’ Salit inabat ko nga kinahanglan ko ighalad an halad nga sinunog.”
13 Tungod hini hi Samuel nagsiring kan Saul: “Nagbuhat ka hin kalurongan. Waray ka sumugot ha iginsugo ha imo ni Jehova nga imo Dios.+ Kon sumugot ka, paririg-unon unta ni Jehova an imo ginhadian ha Israel ha kadayonan.
14 Pero yana diri magpapadayon an imo ginhadian.+ Mamimiling hi Jehova hin tawo nga nakakapalipay ha iya kasingkasing,+ ngan tutokahan hiya ni Jehova nga magin lider ha iya katawohan,+ kay waray ka sumugot ha iginsugo ha imo ni Jehova.”+
15 Katapos, binuhát hi Samuel ngan sinagka tikang ha Gilgal ngadto ha Gibeah han Benjamin, ngan gin-ihap ni Saul an katawohan; mga 600 nga lalaki an kaupod pa gihapon niya.+
16 Hi Saul, hi Jonathan nga iya anak, ngan an katawohan nga kaupod pa gihapon nira naukoy ha Geba+ ha Benjamin, ngan an mga Filisteo nagkampo ha Micmash.+
17 Ngan an nasulong nga mga sundalo nagawas tikang ha kampo han mga Filisteo ha tulo ka grupo. An usa nga grupo naagi ha dalan nga tipakadto ha Ofra, tipakadto ha tuna han Sual;
18 an usa pa nga grupo naagi ha dalan han Bet-horon;+ ngan an ikatulo nga grupo naagi ha dalan nga tipakadto ha giutan diin makikita an walog han Zeboim ha ubos, ha may kamingawan.
19 Hito nga panahon waray panday hin metal ha bug-os nga tuna han Israel, kay an mga Filisteo nagsiring: “Basi an mga Hebreo diri makahimo hin espada o hin bangkaw.”
20 Ngan an ngatanan nga Israelita kinahanglan lumugsad ngadto ha mga Filisteo basi magpabaid han ira mga punta han arado, mga sadol, mga atsa, o mga garab.
21 Usa ka pim* an presyo han pagbaid han mga punta han arado, mga sadol, mga garamiton nga tulo an tais, mga atsa, ngan han pag-ayad han igturusok ha baka.
22 Ngan ha adlaw han girra, waray dara nga espada o bangkaw an bisan hin-o ha katawohan nga kaupod nira Saul ngan Jonathan;+ hi Saul la ngan hi Jonathan nga iya anak an may mga armas.
23 Yana may usa nga grupo han Filisteo nga mga sundalo nga nagkagawas ngadto ha tarabokan ha pangpang han Micmash.+
