An Siyahan nga Libro ni Samuel 14:1-52
14 Usa ka adlaw, hi Jonathan+ nga anak ni Saul nagsiring ha kabulig nga nagdadara han iya mga armas: “Tana, tabok kita ngadto ha kampo han mga Filisteo.” Kondi waray niya sumati an iya tatay.
2 Hito nga panahon hi Saul nagkakampo hirani ha giutan han Gibeah+ ha ilarom han kahoy nga granada ha Migron, ngan mga 600 nga lalaki an kaupod niya.+
3 (Ngan hi Ahias nga anak nga lalaki ni Ahitub,+ nga bugto ni Icabod,+ nga anak nga lalaki ni Pinehas,+ nga anak nga lalaki ni Eli,+ nga saserdote ni Jehova ha Shilo,+ an nakasul-ot han epod.)+ Ngan diri maaram an katawohan nga linakat hi Jonathan.
4 Ha butnga han mga aragian nga ginpapangalimbasogan nga matabok ni Jonathan basi makaabot ha kampo han mga Filisteo, may daku nga bato nga ngipon an kurti ha magkaluyo nga bahin hito; Bozez an ngaran han usa ngan Sene an ngaran han usa pa.
5 An usa nga daku nga bato nga pariho hin harigi aadto ha norte ngan naatubang ha Micmash, ngan an usa pa aadto ha sur ngan naatubang ha Geba.+
6 Salit nagsiring hi Jonathan ha iya paradara han mga gamit nga pan-girra: “Tana, tabok kita ngadto ha kampo hinin diri turi nga kalalakin-an.+ Bangin gumios hi Jehova para ha aton, kay waray makakapugong kan Jehova ha pagtalwas pinaagi man han damu o han pipira la.”+
7 An iya paradara han mga gamit nga pan-girra binaton ha iya: “Buhata an anoman nga karuyag han imo kasingkasing nga buhaton. Pakadto kon diin mo karuyag kumadto, ngan masunod ako ha imo ha bisan diin nga karuyag han imo kasingkasing.”
8 Katapos, nagsiring hi Jonathan: “Matabok kita ngadto hito nga mga tawo ngan mapakita ha ira.
9 Kon sumiring hira ha aton, ‘Dida la kamo ha iyo hinmumutangan tubtob nga kumada kami ha iyo!’ magpapabilin kita ha aton hinmumutangan ngan diri masagka ngadto ha ira.
10 Pero kon sumiring hira, ‘Sagka kamo ngadi ngan sulonga kami!’ masagka kita, kay ihahatag hira ni Jehova ha aton kamot. Ini an aton magigin tigaman.”+
11 Katapos, nagpakita hira nga duha ha kampo han mga Filisteo. An mga Filisteo nagsiring: “Kitaa! An mga Hebreo nagawas tikang ha mga buho nga ira gintatagoan.”+
12 Salit an kalalakin-an ha kampo nagsiring kan Jonathan ngan ha iya paradara han mga gamit nga pan-girra: “Sagka kamo ngadi ha amon, ngan tututdoan namon kamo hin leksyon!”+ Hi Jonathan nagsiring dayon ha iya paradara han mga gamit nga pan-girra: “Sunod ha akon, kay ihahatag hira ni Jehova ha kamot han Israel.”+
13 Ngan hi Jonathan nagkakamang nga sinagka, ngan an iya paradara han mga gamit nga pan-girra nasunod ha iya; ngan an mga Filisteo nagkatutumba ha atubangan ni Jonathan, ngan ha luyo niya ginpapamatay hira han iya paradara han mga gamit nga pan-girra.
14 Ha siyahan nga pag-atake ni Jonathan ngan han iya paradara han mga gamit nga pan-girra, mga 20 nga lalaki an ira ginpamatay ha halipot nga distansya.*
15 Katapos, nagkahahadlok gud an kasundalohan nga nakapwesto ha kapatagan ngan an ngatanan nga katawohan ha kampo, ngan bisan an nasulong nga mga sundalo+ nagkahahadlok gud. An tuna nagtikang mabay-og, ngan katapos hito nagkaada duro nga kahadlok nga tikang ha Dios.
16 Nakita han mga bantay ni Saul ha Gibeah+ han Benjamin nga nagsasaramok an bug-os nga kampo.+
17 Nagsiring hi Saul ha katawohan nga kaupod niya: “Alayon pag-ihap ngan kitaa kon hin-o an binaya ha aton.” Han nag-ihap hira, nakita nira nga waray didto hi Jonathan ngan an iya paradara han mga gamit nga pan-girra.
18 Katapos, hi Saul nagsiring kan Ahias:+ “Dad-a nganhi an Arka han tinuod nga Dios!” (Kay hito nga panahon* nakada ha mga Israelita an Arka han tinuod nga Dios.)
19 Ngan samtang nakikiistorya hi Saul ha saserdote, nagtitikaduro an kasamok ha kampo han mga Filisteo. Katapos, nagsiring hi Saul ha saserdote: “Iundang an imo ginbubuhat.”*
20 Salit hi Saul ngan an ngatanan nga katawohan nga kaupod niya nagtirirok ngan kinadto ha pakiggirra, diin nakita nira nga an mga Filisteo nagparaptayay na pinaagi han espada, ngan duro gud an kasamok.
21 Sugad man, an mga Hebreo nga dinapig hadto ha mga Filisteo ngan sinagka upod nira ngadto ha kampo binalik pagdapig ha Israel nga ginpapangunahan nira Saul ngan Jonathan.
22 An ngatanan nga kalalakin-an han Israel nga nanago+ ha kabukiran han Efraim nakabati nga namalagiw an mga Filisteo, ngan hira liwat inupod ha paglanat ha ira durante han girra.
23 Salit gintalwas ni Jehova an Israel hito nga adlaw,+ ngan an girra nakaabot tubtob ha Bet-aven.+
24 Kondi an kalalakin-an han Israel guol na gud hito nga adlaw, kay ginpasumpa ni Saul an katawohan hini nga panumpa: “Maghikaraot an tawo nga makaon hin bisan ano nga pagkaon* antes han pagsirom ngan tubtob nga diri pa ako nakakabulos ha akon mga kaaway!” Salit waray bisan usa han katawohan an kinaon hin bisan ano nga pagkaon.+
25 Ngan an ngatanan nga katawohan* nakaabot ha kagurangan, ngan may dugos ha tuna.
26 Pag-abot han katawohan ha kagurangan, nakita nira nga nanunuro an dugos, pero waray bisan usa nga kinaon hito, kay nahadlok hira han panumpa.
27 Kondi hi Jonathan waray makabati han ginpasumpa han iya tatay an katawohan,+ salit iya igin-unat an baston nga iya ginkakaptan ngan igintunlob ha udlan an kataposan hito. Han iya ginkaon an dugos, naghayag an iya pangita.
28 Katapos an usa han katawohan nagsiring: “Ginpasumpa gud han imo tatay an katawohan, nga nasiring: ‘Maghikaraot an tawo nga makaon yana nga adlaw!’+ Salit an katawohan guol gud.”
29 Pero hi Jonathan nagsiring: “An akon tatay nagdara hin daku nga problema* ha tuna. Kitaa an paghayag han akon pangita tungod kay gintilawan ko inin gutiay nga dugos.
30 Mas maopay gud kon an katawohan may kagawasan ha pagkaon+ yana nga adlaw tikang ha mga dinag-an nga ira nakuha ha ira mga kaaway! Mas damu unta nga Filisteo an mapapatay.”
31 Hito nga adlaw padayon nga ginpamatay nira an mga Filisteo tikang ha Micmash tubtob ha Aijalon,+ ngan gin-gol-an gud an katawohan.
32 Salit an katawohan nag-aragaw han mga dinag-an, ngan nanguha hira hin mga karnero, mga baka, ngan mga nati nga baka ngan ginpan-ihaw* ito dida ha tuna, ngan ira ginkaon an karne upod an dugo.+
33 Salit ini an iginsumat kan Saul: “Kitaa! An katawohan nakakasala kan Jehova pinaagi han pagkaon han karne upod an dugo.”+ Tungod hito nagsiring hi Saul: “Waray kamo magin matinumanon. Pagpakaliding dayon kamo hin daku nga bato ngadi ha akon.”
34 Katapos, nagsiring hi Saul: “Pagburublag kamo dida ha katawohan ngan sidnga hira, ‘Kinahanglan dad-on han tagsa ha iyo an iya todo nga baka ngan an iya karnero ngan ihawon ito dinhi ngan katapos, kaunon ito. Ayaw kamo pagpakasala kan Jehova pinaagi han pagkaon han karne upod an dugo.’”+ Salit hito nga gab-i gindara han tagsa ha ira an iya todo nga baka ngan gin-ihaw ito didto.
35 Ngan naghimo hi Saul hin halaran para kan Jehova.+ Ito an siyahan nga halaran nga iya ginhimo para kan Jehova.
36 Ha urhi nagsiring hi Saul: “Lugsad kita durante ha gab-i basi lanaton an mga Filisteo tubtob ha pagpawa ha aga ngan panguhaon naton an ira mga butang sugad nga dinag-an. Waray kita isasalin nga bisan usa nga buhi.” Binaton hira: “Buhata an anoman nga baga hin maopay ha imo pagkita.” Katapos, an saserdote nagsiring: “Daop kita dinhi ha tinuod nga Dios.”+
37 Ngan hi Saul nagpakiana ha Dios: “Sadang ba ako lumugsad basi lanaton an mga Filisteo?+ Ihahatag mo ba hira ha kamot han Israel?” Pero an Dios waray bumaton ha iya hito nga adlaw.
38 Salit nagsiring hi Saul: “Kamo ngatanan nga lider han katawohan, pakadi kamo ngan kitaa kon ano nga sala an nabuhat yana nga adlaw.
39 Kay sugad nga buhi hi Jehova, nga nagtalwas han Israel, bisan kon hi Jonathan nga akon anak an nakabuhat hito, kinahanglan mamatay hiya.” Kondi waray bisan usa han katawohan an binaton ha iya.
40 Katapos, nagsiring hiya ha ngatanan nga Israelita: “Didto kamo ha luyo nga dapit, ngan kami ni Jonathan nga akon anak ha luyo naman nga dapit.” An katawohan binaton kan Saul: “Buhata an anoman nga baga hin maopay ha imo pagkita.”
41 Katapos, hi Saul nagsiring kan Jehova: “O Dios han Israel, baton pinaagi han Tumim!”+ Ngan hira Jonathan ngan Saul an napili, ngan nakatalwas an katawohan.
42 Yana hi Saul nagsiring: “Pagripa+ kamo basi mahibaroan kon ako ba o hi Jonathan nga akon anak an nakasala.” Ngan hi Jonathan an napili.
43 Katapos, hi Saul nagpakiana kan Jonathan: “Sumati ako, ano an imo ginbuhat?” Hi Jonathan binaton ha iya: “Nagtilaw la ako hin gutiay nga dugos ha kataposan han baston nga akon ginkakaptan.+ Aadi ako! Andam ako mamatay!”
44 Salit hi Saul nagsiring: “Magpahinabo unta an Dios hin sunod-sunod nga sirot kon diri ka mamatay, Jonathan.”+
45 Kondi an katawohan nagsiring kan Saul: “Sadang ba mamatay hi Jonathan—an nagdara hinin daku nga kadaogan*+ ha Israel? Imposible ito mahitabo! Sugad nga buhi hi Jehova, waray bisan usa nga buhok ha iya ulo an sadang mahulog ha tuna, kay ginbuligan hiya han Dios ha iya ginbuhat hini nga adlaw.”+ Ngan gintalwas* han katawohan hi Jonathan, ngan waray hiya mamatay.
46 Salit hi Saul inundang paglanat ha mga Filisteo, ngan an mga Filisteo binalik ha ira kalugaringon nga teritoryo.
47 Ginparig-on ni Saul an iya pagin hadi han Israel ngan nakiggirra hiya ha ngatanan niya nga kaaway ha palibot, ha mga Moabita,+ ha mga Ammonita,+ ha mga Edomita,+ ha mga hadi han Zoba,+ ngan ha mga Filisteo;+ ngan diin man hiya kumadto ginpipirde niya hira.
48 Ngan maisugon nga nakiggirra hiya ngan ginpirde an mga Amalekita+ ngan gintalwas an Israel tikang ha kamot han mga nangunguha han ira mga butang sugad nga dinag-an.
49 An mga anak nga lalaki ni Saul amo hira Jonathan, Isvi, ngan Malki-sua.+ Ngan may duha hiya nga anak nga babaye; an ngaran han magurang amo hi Merab,+ ngan an ngaran han manghod amo hi Mical.+
50 An ngaran han asawa ni Saul amo hi Ahinoam nga anak nga babaye ni Ahimaaz. An ngaran han lider han iya kasundalohan amo hi Abner+ nga anak nga lalaki ni Ner, nga batâ ni Saul.
51 Hi Kis+ an tatay ni Saul, ngan hi Ner+ nga tatay ni Abner an anak ni Abiel.
52 May-ada duro nga pakiggirra ha mga Filisteo ha ngatanan nga adlaw ni Saul.+ Kon nakakakita hi Saul hin bisan hin-o nga makusog o maisog nga lalaki, iya hiya ginpapaapi ha iya kasundalohan.+
Mga footnote
^ O “ha katunga han uma nga maaarado han magpadis nga todo nga baka ha usa ka adlaw.”
^ Lit., “hito nga adlaw.”
^ Lit., “Iatras an imo kamot.”
^ Lit., “tinapay.”
^ Lit., “an bug-os nga tuna.”
^ O “nagdara hin pagsalikway.”
^ Ha iba nga lugar, “ginpamatay.”
^ O “katalwasan.”
^ Lit., “gintubos.”
