An Siyahan nga Libro ni Samuel 5:1-12
5 Han ginbihag han mga Filisteo an Arka+ han tinuod nga Dios, gindara nira ito tikang ha Ebenezer ngadto ha Asdod.
2 Ginkuha han mga Filisteo an Arka han tinuod nga Dios ngan gindara ito ha balay* ni Dagon ngan iginbutang ito ha sapit ni Dagon.+
3 Han an mga Asdodita binuhát hin temprano kinabuwasan, hi Dagon nakulob na ha tuna ha atubangan han Arka ni Jehova.+ Salit ira ginkuha hi Dagon ngan iginbalik hiya ha iya hinmumutangan.+
4 Han binuhát hira hin temprano ha aga han sumunod nga adlaw, hi Dagon nakulob na ha tuna ha atubangan han Arka ni Jehova. Pugot na an ulo ni Dagon ngan utod na an mga palad han iya duha nga kamot ngan nakadto ito ha may purtahan. An isda la nga bahin* an bug-os pa.
5 Ito an hinungdan kon kay ano nga tubtob hini nga adlaw, an mga saserdote ni Dagon ngan an ngatanan nga nasulod ha balay ni Dagon diri natamak ha may purtahan ni Dagon ha Asdod.
6 An kamot ni Jehova nagin mabug-at kontra ha mga Asdodita, ngan iya hira gindaot pinaagi han pagpahinabo nga magkaada almoranas+ an mga umurukoy han Asdod ngan han mga teritoryo hito.
7 Han nakita han katawohan han Asdod an nahitatabo, nagsiring hira: “Ayaw kita pagtugot nga magpabilin dinhi ha aton an Arka han Dios han Israel, kay an iya kamot ginios kontra ha aton ngan ha aton dios nga hi Dagon.”
8 Salit ira iginpatawag ngan gintirok an ngatanan nga magmarando han mga Filisteo ngan ginpakianhan hira: “Ano an sadang naton buhaton ha Arka han Dios han Israel?” Binaton hira: “Ibalhin ha Gat+ an Arka han Dios han Israel.” Salit ira iginbalhin didto an Arka han Dios han Israel.
9 Katapos nira ito ibalhin didto, an kamot ni Jehova ginios kontra ha syudad, nga nagresulta hin duro nga kalisang. Iya ginhampak an mga tawo han syudad, tikang ha mga bata tubtob ha mga lagas, ngan ginpanuboan hira hin almoranas.+
10 Salit ira iginpadara ha Ekron+ an Arka han tinuod nga Dios, kondi pag-abot gud ha Ekron han Arka han tinuod nga Dios, an mga Ekronita nagtikang pagguliat: “Ira gindara ha aton an Arka han Dios han Israel basi pamatayon kita ngan an aton katawohan!”+
11 Katapos, ira iginpatawag ngan gintirok an ngatanan nga magmarando han mga Filisteo ngan nagsiring: “Ipahirayo dinhi an Arka han Dios han Israel; ibalik ito ha orihinal nga hinmumutangan hito basi kami ngan an amon katawohan diri pamatayon.” Kay an kahadlok nga mamatay nagsarang na ha bug-os nga syudad; an kamot han tinuod nga Dios nagin mabug-at gud didto,+
12 ngan an mga tawo nga waray magkamatay ginpahinabo nga magkaada almoranas. Ngan an pangaraba han syudad para hin bulig nagtipaigbaw ha langit.
