An Siyahan nga Libro ni Samuel 26:1-25
26 Paglabay han panahon, an kalalakin-an han Zip+ kinadto kan Saul ha Gibeah,+ nga nasiring: “Hi David nagtatago ha bungtod han Hakila nga naatubang ha Jesimon.”*+
2 Salit binuhát hi Saul ngan linugsad ngadto ha kamingawan han Zip upod an 3,000 nga pinili nga kalalakin-an han Israel basi pamilngon hi David ha kamingawan han Zip.+
3 Nagkampo hi Saul ha ligid han dalan ha bungtod han Hakila, nga naatubang ha Jesimon. Hito nga panahon hi David naukoy ha kamingawan, ngan iya hinbaroan nga ginsundan hiya ni Saul ngadto ha kamingawan.
4 Salit nagsugo hi David hin mga espiya basi siguruhon kon kinadto gud ba hi Saul.
5 Ha urhi kinadto hi David ha ginkakampohan ni Saul, ngan nakita ni David an dapit nga ginkakaturogan ni Saul ngan han lider han iya kasundalohan nga hi Abner,+ nga anak ni Ner; hi Saul nakaturog ha sulod han kampo ngan nakapalibot ha iya an nagkakampo nga mga sundalo.
6 Katapos, nagsiring hi David kan Ahimelec nga Hiteo+ ngan kan Abisai+ nga anak nga lalaki ni Zeruias+ ngan bugto ni Joab: “Hin-o an maupod ha akon ha paglugsad ngadto kan Saul ha kampo?” Binaton hi Abisai: “Maupod ako ha imo ha paglugsad.”
7 Salit pagkagab-i kinadto hi David ngan hi Abisai ha mga sundalo, ngan ira nakita hi Saul nga nakaturog ha sulod han kampo nga an iya bangkaw nakatugsok ha tuna ha may ulohan niya; hi Abner ngan an mga sundalo nanhihigda ha palibot niya.
8 Nagsiring yana hi Abisai kan David: “Yana nga adlaw igintubyan han Dios ha imo kamot an imo kaaway.+ Ngan yana, alayon tuguti ako nga tuhugon hiya ha tuna hin makausa la pinaagi han bangkaw, ngan diri ko na ito kinahanglan utruhon.”
9 Kondi hi David nagsiring kan Abisai: “Ayaw hiya buhati hin maraot, kay may-ada ba tawo nga makakag-alsa han iya kamot kontra ha dinihogan ni Jehova+ ngan makakapabilin nga waray sala?”+
10 Nagsiring pa hi David: “Sugad nga buhi hi Jehova, hi Jehova mismo an magpapatay ha iya,+ o maabot an iya adlaw+ ngan mamamatay hiya, o makadto hiya ha pakiggirra ngan mamamatay.+
11 Imposible gud ha panhunahuna ni Jehova nga ialsa ko an akon kamot kontra ha dinihogan ni Jehova!+ Salit yana, alayon kuhaa an bangkaw ha may ulohan niya ngan an tibod han tubig, ngan lakat na kita.”
12 Salit ginkuha ni David an bangkaw ngan an tibod han tubig ha may ulohan ni Saul, ngan linakat hira. Waray bisan usa nga nakakita+ o nakapanginano ha ira o nakamata, kay nangangaturog hira ngatanan, tungod kay ginpahinabo ni Jehova nga mahingaturog hira hin hilarom.
13 Katapos, tinabok hi David ngadto ha luyo nga dapit ngan tinindog ha pungkay han bukid nga hurohirayo na, ngan daku an distansya ha butnga nira.
14 Ginuliat hi David ha mga sundalo ngan kan Abner+ nga anak ni Ner, nga nasiring: “Abner, batona ako!” Hi Abner binaton: “Hin-o ka nga nagtatawag ha hadi?”
15 Nagsiring hi David kan Abner: “Diri ba maisog ka nga tawo? Ngan hin-o ha Israel an pariho ha imo? Salit kay ano nga waray mo bantayi an imo ginoo nga hadi? Kay sinulod an usa han mga sundalo basi patayon an imo ginoo nga hadi.+
16 Diri maopay an imo ginbuhat. Sugad nga buhi hi Jehova, angay kamo mamatay, kay waray niyo bantayi an iyo ginoo, an dinihogan ni Jehova.+ Yana pagkita ha palibot! Hain na an bangkaw han hadi ngan an tibod han tubig+ nga nakada ha may ulohan niya?”
17 Katapos, nakilala ni Saul an tingog ni David ngan nagsiring hiya: “Tingog mo ba ito, David nga akon anak?”+ Hi David binaton: “Oo, tingog ko ini, akon ginoo nga hadi.”
18 Nagsiring pa hiya: “Kay ano nga ginlalanat han akon ginoo an iya surugoon?+ Ano an akon nabuhat, ngan ano an akon sala?+
19 Alayon, pamatian unta han akon ginoo nga hadi an isisiring han iya surugoon: Kon hi Jehova an nag-aghat ha imo kontra ha akon, karawaton* unta niya an akon halad nga tikang ha lugas. Pero kon mga tawo an nag-aghat ha imo,+ iginsumpa hira ha atubangan ni Jehova, kay ira ako ginpaiwas yana tikang ha pagin kahiusa han panurundon ni Jehova,+ nga sugad hin nasiring hira: ‘Lakat, pag-alagad ha iba nga mga dios!’
20 Ngan yana ayaw itugot nga an akon dugo tumuro ha tuna nga hirayo ha atubangan ni Jehova, kay an hadi han Israel ginawas basi mamiling hin usa nga purgas,+ nga sugad hin naglalanat hiya hin tamsi nga perdis ha kabukiran.”
21 Salit nagsiring hi Saul: “Nakasala ako.+ Balik, David nga akon anak, kay diri ko na ikaw bubuhatan hin maraot, kay hini nga adlaw imo gintagad nga birilhon an akon kinabuhi.*+ Oo, nagbuhat ako hin kalurongan, ngan daku gud nga sayop an akon nahimo.”
22 Binaton hi David: “Aadi an bangkaw han hadi. Pakanhia an usa han batan-on nga mga lalaki ngan ipakuha ini.
23 Hi Jehova an mabalos ha kada tagsa tungod han iya mismo pagkamatadong+ ngan han iya mismo pagkamatinumanon, kay yana nga adlaw iginhatag ka ni Jehova ha akon kamot, pero diri ko karuyag ialsa an akon kamot kontra ha dinihogan ni Jehova.+
24 Kitaa! Sugad la nga an imo kinabuhi* birilhon ha akon hini nga adlaw, hinaot an akon kinabuhi* magin birilhon ha pagkita ni Jehova, ngan hinaot talwason niya ako ha ngatanan nga kasakitan.”+
25 Hi Saul binaton kan David: “Hinaot bendisyonan ka, David nga akon anak. Sigurado nga magbubuhat ka hin dagku nga mga butang, ngan sigurado nga maglalampos ka.”+ Katapos, linakat hi David, ngan binalik hi Saul ha iya lugar.+
