An Siyahan nga Libro ni Samuel 28:1-25
-
Saul kinadto ha espiritista ha En-dor (1-25)
28 Hito nga mga adlaw, gintirok han mga Filisteo an ira mga kasundalohan basi makiggirra ha Israel.+ Salit hi Akis nagsiring kan David: “Sigurado nga maaram ka nga ikaw ngan an imo mga tawo maupod ha akon ha paggawas basi makiggirra.”+
2 Hi David binaton kan Akis: “Sigurado nga maaram ka han bubuhaton han imo surugoon.” Hi Akis nagsiring kan David: “Ito an hinungdan nga pipilion ko ikaw nga magin permanente ko nga gwardya.”*+
3 Hito nga panahon hi Samuel patay na, ngan an bug-os nga Israel nagtaguminatay tungod ha iya ngan iginlubong hiya ha Rama, an iya mismo syudad.+ Ngan ginpaiwas na ni Saul ha Israel an mga espiritista ngan an mga parapanigo.+
4 An mga Filisteo nagtirirok ngan kinadto ha Sunem+ ngan nagkampo didto. Salit gintirok ni Saul an ngatanan nga Israelita, ngan nagkampo hira ha Gilboa.+
5 Han nakita ni Saul an kampo han mga Filisteo, nahadlok hiya ngan naglaksi gud an pitik han iya kasingkasing.+
6 Bisan kon nagpapakiana hi Saul kan Jehova,+ diri gud hiya ginbabaton ni Jehova, ha mga inop man o pinaagi han Urim+ o pinaagi han mga propeta.
7 Ha urhi hi Saul nagsiring ha iya mga surugoon: “Bilngi niyo ako hin espiritista+ nga babaye, ngan makadto ako ngan makonsulta ha iya.” An iya mga surugoon binaton: “Kitaa! May espiritista nga babaye ha En-dor.”+
8 Salit hi Saul nagpakunokuno nga iba nga tawo ngan nagsul-ot hin iba nga mga bado ngan kinadto ha babaye durante han gab-i upod an duha han iya mga tawo. Nagsiring hiya: “Alayon paggamit hin panigo pinaagi han imo gahum sugad nga espiritista,+ ngan igawas para ha akon an tawo nga akon ngangaranan ha imo.”
9 Kondi an babaye nagsiring ha iya: “Sigurado nga maaram ka han ginbuhat ni Saul, han ginpaiwas niya ha Israel an mga espiritista ngan mga parapanigo.+ Salit kay ano nga nagsasari ka paglit-ag ha akon* basi ipapatay ako?”+
10 Katapos, hi Saul nanumpa ha iya ha ngaran ni Jehova, nga nasiring: “Sugad nga buhi hi Jehova, diri ka magigin salaan hini nga butang!”
11 Salit an babaye nagsiring: “Hin-o an akon igagawas para ha imo?” Binaton hiya: “Igawas hi Samuel para ha akon.”
12 Han nakita han babaye hi “Samuel,”*+ ginuliat hiya ha pinakamakusog niya nga tingog ngan nagsiring kan Saul: “Kay ano nga gin-uwat mo ako? Hi Saul ka!”
13 An hadi nagsiring ha iya: “Ayaw kahadlok, kondi ano an imo nakikita?” An babaye binaton kan Saul: “Nakikita ko an usa nga pariho hin dios nga nagawas tikang ha tuna.”
14 Nagpakiana dayon hi Saul ha iya: “Ano an iya hitsura?” Binaton hiya: “Usa nga lagas nga lalaki an nagawas, ngan nakasul-ot hiya hin waray pako nga bado.”+ Salit nasantop ni Saul nga hi “Samuel” ito, ngan yinukbo hiya ha tuna ngan hinapa.
15 Katapos, hi “Samuel” nagsiring kan Saul: “Kay ano nga ginsamok mo ako pinaagi han pagpagawas ha akon?” Hi Saul binaton: “Daku an akon problema. An mga Filisteo nakikiggirra ha akon, ngan an Dios binaya na ha akon ngan diri na nabaton ha akon, pinaagi man han mga propeta o ha mga inop;+ ito an hinungdan nga gintawag ko ikaw basi isumat ha akon an sadang ko buhaton.”+
16 Ngan hi “Samuel” nagsiring: “Kay ano nga nagpapakiana ka ha akon yana nga binaya na man ha imo hi Jehova+ ngan nagin kaaway mo na?
17 Bubuhaton ni Jehova an iya igintagna pinaagi ha akon: Kukuhaon* ni Jehova an ginhadian tikang ha imo mga kamot ngan ihahatag ito ha usa han imo mga igkasi-tawo, hi David.+
18 Tungod kay waray mo sugta hi Jehova ngan waray mo ipadapat an iya naglalaga nga kasina kontra ha mga Amalekita,+ ito an hinungdan nga ginbubuhat ini ha imo ni Jehova hini nga adlaw.
19 Ihahatag liwat ni Jehova an Israel ngan pati ikaw ngadto ha kamot han mga Filisteo,+ ngan buwas ikaw+ ngan an imo mga anak nga lalaki+ makakaupod ko. Ihahatag liwat ni Jehova ha mga kamot han mga Filisteo an kasundalohan han Israel.”+
20 Hi Saul tigda nga natumba nga nakahigda ha tuna ngan nahadlok gud hiya tungod han ginsiring ni “Samuel.” Ngan waray na hiya kusog, kay waray hiya kumaon ha bug-os nga adlaw ngan ha bug-os nga gab-i.
21 Han dinaop an babaye kan Saul ngan nakita nga nahahadlok gud hiya, nagsiring hiya ha iya: “Kitaa, ginsugot han imo surugoon an imo ginsiring, ngan iginbutang ko ha peligro an akon kinabuhi*+ ngan ginbuhat an imo iginpabuhat ha akon.
22 Yana, alayon pamatii an isisiring han imo surugoon. Tuguti ako nga magbutang hin usa nga tinapay ha imo atubangan; katapos, kaon basi magkaada ka kusog ha imo paglakat.”
23 Kondi nagdumiri hiya ngan nagsiring: “Diri ako makaon.” Pero ginpinirit hiya han iya mga surugoon ngan pati han babaye. Ha urhi namati hiya ha ira ngan binuhát tikang ha tuna ngan liningkod ha higdaan.
24 An babaye may pinatambok nga nati nga baka ha iya balay, salit nagdali-dali hiya pag-ihaw* hito ngan nagkuha hin harina ngan ginmasa ito ngan nagluto hin tinapay nga waray libadura.
25 Iginserbi niya ito kan Saul ngan ha iya mga surugoon, ngan nangaon hira. Katapos hito, binuhát hira ngan linakat durante han gab-i.+
