An Siyahan nga Libro ni Samuel 7:1-17
7 Salit an kalalakin-an han Kiriat-jearim inabot ngan gindara an Arka ni Jehova ngadto ha balay ni Abinadab+ ha bawbaw han bungtod, ngan ira ginbaraan an iya anak nga lalaki nga hi Eleazar basi magbantay ha Arka ni Jehova.
2 Maiha nga panahon an linabay, 20 ka tuig ngatanan, tikang ha adlaw nga inabot an Arka ha Kiriat-jearim, ngan an bug-os nga panimalay ni Israel nagtikang pangaro hin bulig kan Jehova.+
3 Katapos, hi Samuel nagsiring ha bug-os nga panimalay ni Israel: “Kon nabalik kamo kan Jehova ha bug-os niyo nga kasingkasing,+ kuhaa ha butnga niyo an mga dios han iba nga mga nasud+ ngan an mga imahen ni Astoret,+ ngan marig-on nga isentro an iyo kasingkasing kan Jehova ngan ha iya gud la kamo pag-alagad,+ ngan iya kamo tatalwason tikang ha kamot han mga Filisteo.”+
4 Salit ginpananggal han mga Israelita an mga Baal ngan an mga imahen ni Astoret, ngan kan Jehova gud la hira nag-alagad.+
5 Katapos hi Samuel nagsiring: “Tiroka ha Mizpa+ an bug-os nga Israel, ngan mag-aampo ako kan Jehova para ha iyo.”+
6 Salit nagtirirok hira ha Mizpa, ngan nag-alog hira hin tubig ngan iginhuwad ito ha atubangan ni Jehova ngan nagpuasa hira hito nga adlaw.+ Didto nagsiring hira: “Nakasala kami kan Jehova.”+ Ngan hi Samuel nagtikang magin hukom+ han mga Israelita didto ha Mizpa.
7 Han hinbatian han mga Filisteo nga an mga Israelita nagtirirok ha Mizpa, an mga magmarando han mga Filisteo+ sinagka basi makiggirra ha Israel. Han an mga Israelita nakabati mahitungod hito, nahadlok hira tungod han mga Filisteo.
8 Salit an mga Israelita nagsiring kan Samuel: “Ayaw pag-undang ha pagtawag kan Jehova nga aton Dios basi buligan kita+ ngan talwason kita tikang ha kamot han mga Filisteo.”
9 Katapos, nagkuha hi Samuel hin nasuso pa nga nati nga karnero ngan iginhalad ito kan Jehova sugad nga bug-os nga halad nga sinunog;+ ngan hi Samuel nagtawag kan Jehova basi mangaro hin bulig para ha Israel, ngan ginbaton hiya ni Jehova.+
10 Samtang iginhahalad ni Samuel an halad nga sinunog, an mga Filisteo sinulong basi makiggirra ha Israel. Hito nga adlaw nagpadalugdog hi Jehova hin makusog+ kontra ha mga Filisteo, ngan ginpahinabo Niya nga magsaramok hira,+ ngan napirde hira ha atubangan han mga Israelita.+
11 Katapos, an kalalakin-an han Israel nagkagawas tikang ha Mizpa ngan ginlanat an mga Filisteo, ngan ira ginpamatay hira tubtob ha sur han Bet-car.
12 Katapos, nagkuha hi Samuel hin bato+ ngan iginbutang ito ha butnga han Mizpa ngan Jesana ngan ginngaranan ito hin Ebenezer,* kay nagsiring hiya: “Tubtob yana ginbubuligan kita ni Jehova.”+
13 Salit napirde an mga Filisteo, ngan waray na hira sumulod utro ha teritoryo han Israel;+ ngan an kamot ni Jehova padayon nga ginios kontra ha mga Filisteo ha ngatanan nga adlaw ni Samuel.+
14 Sugad man, an mga syudad nga ginkuha han mga Filisteo ha Israel iginbalik ha Israel, tikang ha Ekron tubtob ha Gat, ngan nabawi han Israel an ira teritoryo tikang ha kamot han mga Filisteo.
Nagkaada liwat kamurayawan butnga han mga Israelita ngan mga Amorita.+
15 Hi Samuel padayon nga nagin hukom han Israel ha bug-os niya nga kinabuhi.+
16 Kada tuig ginlilibot niya an Bethel,+ Gilgal,+ ngan Mizpa,+ ngan naghuhukom hiya ha Israel dida hito ngatanan nga lugar.
17 Kondi nabalik hiya ha Rama,+ kay aadto didto an iya balay, ngan didto naghuhukom liwat hiya ha Israel. Naghimo hiya didto hin halaran para kan Jehova.+
Mga footnote
^ Nangangahulogan nga “Bato han Pagbulig.”
