An Siyahan nga Libro ni Samuel 8:1-22
8 Han lagas na hi Samuel, iya ginpili an iya mga anak nga lalaki sugad nga mga hukom para ha Israel.
2 An ngaran han iya suhag amo hi Joel, ngan an ngaran han iya ikaduha amo hi Abias;+ mga hukom hira ha Beer-sheba.
3 Kondi an iya mga anak waray sumunod ha iya mga dalan; nabatasan nira nga manlimbong basi makabentaha,+ nakarawat hira hin mga hukip,+ ngan ira ginbabaliko an hustisya.+
4 Inabot an panahon nga an ngatanan nga tigurang han Israel nagtirirok ngan kinadto kan Samuel ha Rama.
5 Nagsiring hira ha iya: “Kitaa! Lagas ka na, kondi an imo mga anak diri nasunod ha imo mga dalan. Yana pagpili para ha amon hin hadi nga maghuhukom ha amon pariho han ngatanan nga iba pa nga nasud.”+
6 Kondi waray malipay hi* Samuel han nagsiring hira: “Tagi kami hin hadi nga maghuhukom ha amon.” Katapos, nag-ampo hi Samuel kan Jehova,
7 ngan hi Jehova nagsiring kan Samuel: “Pamatii an ngatanan nga ginsisiring ha imo han katawohan; kay diri ikaw an ira ginsasalikway, kondi ako an ira ginsasalikway sugad nga ira hadi.+
8 Ginbubuhat nira an ira ginbuhat tikang han adlaw nga igin-gawas ko hira tikang ha Ehipto tubtob hini nga adlaw; pirme nira ako ginbabayaan+ ngan nag-aalagad hira ha iba nga mga dios,+ ngan ito an ira ginbubuhat ha imo.
9 Yana pamatii hira. Kondi kinahanglan seryoso nga pahamangnoan mo hira; sumati hira kon ano an magigin katungod nga ig-obligar han hadi nga magmamando ha ira.”
10 Salit an ngatanan nga ginsiring ni Jehova iginsumat ni Samuel ha katawohan nga nangangaro ha iya hin hadi.
11 Nagsiring hiya: “Ini an magigin katungod nga ig-obligar han hadi nga magmamando ha iyo:+ Kukuhaon niya an iyo mga anak nga lalaki+ ngan itutoka hira ha iya mga karuwahe+ sugad nga iya mga parapangabayo,+ ngan an iba madalagan nga nag-uuna ha iya mga karuwahe.
12 Ngan magpipili hiya para ha iya kalugaringon hin mga lider han kada 1,000+ ngan mga lider han kada 50,+ ngan an iba mag-aarado para ha iya,+ mag-aani para ha iya,+ ngan maghihimo han iya mga armas nga pan-girra ngan han mga garamiton para ha iya mga karuwahe.+
13 Kukuhaon niya an iyo mga anak nga babaye basi magin mga parahimo hin panhaplas,* mga paraluto, ngan mga parahimo hin tinapay.+
14 Kukuhaon niya an iyo pinakamag-opay nga mga uma, mga urubasan, ngan kakahoyan nga olibo,+ ngan ihahatag niya ito ha iya mga surugoon.
15 Kukuhaon niya an ikanapulo han iyo gin-ani nga mga lugas* ngan mga ubas, ngan ihahatag niya ito ha iya mga opisyal ha palasyo ngan ha iya mga surugoon.
16 Ngan kukuhaon niya an iyo mga surugoon nga lalaki ngan babaye, an iyo pinakamag-opay nga mga baka, ngan an iyo mga asno, ngan gagamiton niya hira para ha iya buruhaton.+
17 Kukuhaon niya an ikanapulo han iyo mga panon,+ ngan magigin mga surugoon niya kamo.
18 Maabot an adlaw nga mangangaraba kamo tungod han hadi nga iyo ginpili para ha iyo kalugaringon,+ kondi diri kamo babatunon ni Jehova hito nga adlaw.”
19 Kondi an katawohan nadiri pagpamati ha ginsiring ni Samuel ha ira, ngan nagsiring hira: “Diri, determinado kami nga magkaada hadi nga magmamando ha amon.
20 Ngan magigin pariho kami han ngatanan nga iba pa nga nasud, ngan an amon hadi maghuhukom ha amon ngan mangunguna ha amon ngan makikiggirra ha amon mga kaaway.”
21 Katapos mabatian ni Samuel an ngatanan nga ginsiring han katawohan, iya ito gin-utro kan Jehova.
22 Hi Jehova nagsiring kan Samuel: “Pamatii hira, ngan pagpili hin hadi nga magmamando ha ira.”+ Katapos, hi Samuel nagsiring ha kalalakin-an han Israel: “An tagsa ha iyo sadang bumalik ha iya syudad.”
