An Siyahan nga Libro ni Samuel 21:1-15
21 Ha urhi kinadto hi David ha Nob+ kan Ahimelec nga saserdote. Nagtikang pangurog hi Ahimelec pagtapo niya kan David, ngan ginsidngan niya hiya: “Kay ano nga nag-uusahan ka la ngan waray ka kaupod?”+
2 Binaton hi David kan Ahimelec nga saserdote: “May iginsugo ha akon an hadi, pero nagsiring hiya, ‘Ayaw pagsumat ha bisan hin-o mahitungod han misyon nga akon iginsusugo ha imo ngan mahitungod han mga instruksyon nga iginhatag ko ha imo.’ Nakigsabot ako ha akon batan-on nga mga lalaki nga magkikita kami ha usa nga lugar.
3 Yana kon may-ada ka dida lima nga tinapay, o anoman nga may-ada ka, ihatag na la ito ha akon.”
4 Kondi an saserdote binaton kan David: “Waray didi ordinaryo nga tinapay, kondi may-ada baraan nga tinapay+—basta siguroha la nga an batan-on nga mga lalaki nagpahirayo ha kababayin-an.”*+
5 Hi David binaton ha saserdote: “An kababayin-an iginpahirayo gud ha amon pariho han nahiuna nga mga higayon han ginawas ako basi makiggirra.+ Kon baraan na an mga lawas hini nga batan-on nga mga lalaki bisan kon ordinaryo la an misyon, labi na gud yana nga sadang hira magin baraan!”
6 Salit iginhatag ha iya han saserdote an baraan nga tinapay,+ kay waray didto tinapay labot han halad nga tinapay, nga ginkuha na tikang ha atubangan ni Jehova basi liwanan hin bag-o nga tinapay ha adlaw nga ginkuha ito.
7 Hito nga adlaw an usa han mga surugoon ni Saul nakadto, nga ginpugngan ha atubangan ni Jehova. An iya ngaran amo hi Doeg+ nga Edomita,+ an nangunguna han mga paraataman han panon ni Saul.
8 Katapos, hi David nagsiring kan Ahimelec: “May-ada ka ba dinhi bangkaw o espada? Waray ko dad-a an akon kalugaringon nga espada o an akon mga armas, kay apurado an misyon han hadi.”
9 Salit binaton an saserdote: “Aanhi an espada ni Goliat+ nga Filisteo nga imo ginpatay ha Walog* han Elah.+ Nakaputos ito hin tela ha luyo han epod.+ Kon karuyag mo ito kuhaon, kuhaa ito, kay ito la an aanhi.” Nagsiring hi David: “Waray ito kapariho. Ihatag ito ha akon.”
10 Hito nga adlaw binuhát hi David ngan nagpadayon ha iya pagpalagiw+ tikang kan Saul, ngan ha urhi nahingadto hiya kan Hadi Akis han Gat.+
11 An mga surugoon ni Akis nagsiring ha iya: “Diri ba hi David ini, an hadi ha iya tuna? Diri ba hiya an ira ginkantahan samtang nananayaw hira, nga nasiring,‘Hi Saul nagpatay hin yinukot,Ngan hi David nagpatay hin tinagnapuplo ka yukot’?”+
12 Ginhinunahuna ni David an ira ginsiring, ngan nahadlok gud+ hiya kan Hadi Akis han Gat.
13 Salit ha ira atubangan nagpakunokuno hiya nga diri tuhay an iya panhunahuna+ ngan nagpakalurong-lurong hiya samtang kaupod nira.* Ginbagis-bagisan niya an mga purtahan han ganghaan ngan ginpinaturo an iya laway ha iya bungot.
14 Ha urhi nagsiring hi Akis ha iya mga surugoon: “Nakita niyo nga lurong ini nga tawo! Kay ano nga gindara niyo hiya nganhi ha akon?
15 Nagkukulang ba ako hin lurong nga mga tawo nga kinahanglan ko hin usa pa nga lurong dinhi ha akon atubangan? Angay ba sumulod ha akon balay ini nga tawo?”
