An Siyahan nga Libro ni Samuel 29:1-11
-
Mga Filisteo diri natapod kan David (1-11)
29 Gintirok han mga Filisteo+ an ngatanan nira nga mga kasundalohan didto ha Afek, samtang an mga Israelita nagkakampo hirani ha burabod ha Jezreel.+
2 Ngan an mga magmarando han mga Filisteo nagmamartsa upod an ira ginatos ngan an ira yinukot, ngan hi David ngan an iya mga tawo nagmamartsa ha urhi kaupod ni Akis.+
3 Kondi an mga prinsipe han mga Filisteo nagsiring: “Kay ano nga aanhi ini nga mga Hebreo?” Hi Akis binaton ha mga prinsipe han mga Filisteo: “Ini hi David, an surugoon ni Saul nga hadi han Israel. Kaupod ko hiya hin usa na ka tuig o sobra pa.+ Waray ako hin-agian nga sayop ha iya tikang han adlaw nga dinangop hiya ha akon tubtob yana.”
4 Kondi an mga prinsipe han mga Filisteo nasina ha iya, ngan nagsiring hira ha iya: “Pabalika ito nga tawo.+ Pabalika hiya ha lugar nga igintoka mo ha iya. Ayaw hiya palugsara upod ha aton ngadto ha pakiggirra, basi diri hiya magtraydor ha aton durante han girra.+ Kay may-ada pa ba mas maopay nga paagi nga makarawat niya an pag-uyon han iya ginoo kay han pagdara ngadto ha iya ginoo han mga ulo han aton mga tawo?
5 Diri ba ini an David nga ira ginkantahan samtang nananayaw hira, nga nasiring:
‘Hi Saul nagpatay hin yinukot,Ngan hi David nagpatay hin tinagnapuplo ka yukot’?”+
6 Salit iginpatawag ni Akis+ hi David ngan ginsidngan hiya: “Sugad nga buhi hi Jehova, matadong ka, ngan nalilipay ako nga paupdon ka ha akon kasundalohan+ ngadto ha pakiggirra, kay waray ako hin-agian nga sayop ha imo tikang han adlaw nga kinanhi ka ha akon tubtob yana.+ Pero an iba nga mga magmarando diri natapod ha imo.+
7 Salit balik nga murayaw, ngan ayaw pagbuhat hin bisan ano nga diri makakapalipay ha mga magmarando han mga Filisteo.”
8 Kondi hi David nagsiring kan Akis: “Kay ano? Ano an akon nabuhat? Ano an imo hin-agian nga sayop ha imo surugoon tikang han adlaw nga kinanhi ako ha imo tubtob yana? Kay ano nga diri ako puydi umupod ha imo ngan makiggirra ha mga kaaway han akon ginoo nga hadi?”
9 Hi Akis binaton kan David: “Para ha akon, nagin maopay ka pariho hin anghel han Dios.+ Pero an mga prinsipe han mga Filisteo nagsiring, ‘Ayaw hiya pasagkaha upod ha aton ngadto ha pakiggirra.’
10 Salit buhát hin temprano ha aga upod an mga surugoon han imo ginoo nga kinanhi upod mo; buhát kamo ngan pagkalakat hin temprano pagpawa gud han aga.”
11 Salit hi David ngan an iya mga tawo binuhát hin temprano ha aga basi bumalik ha tuna han mga Filisteo, ngan an mga Filisteo sinagka ngadto ha Jezreel.+
