An Siyahan nga Libro ni Samuel 19:1-24
19 Ha urhi, nag-unabi hi Saul ha iya anak nga hi Jonathan ngan ha ngatanan niya nga surugoon nga karuyag niya patayon hi David.+
2 Tungod kay hi Jonathan nga anak ni Saul nalilipay gud kan David,+ iya ginsidngan hi David: “Karuyag ka ipapatay han akon tatay nga hi Saul. Alayon pag-ikmat buwas nga aga, ngan pakadto ha usa nga tago nga lugar ngan tago didto.
3 Magawas ako ngan matindog ha sapit han akon tatay ha lugar nga hirani ha imo tatagoan. Makikiistorya ako ha akon tatay mahitungod ha imo, ngan kon may mahibaroan ako, isusumat ko gud ito ha imo.”+
4 Salit nag-istorya hi Jonathan ha iya tatay nga hi Saul hin mag-opay nga mga butang mahitungod kan David.+ Nagsiring hiya ha iya: “Diri unta makasala an hadi ha iya surugoon nga hi David, kay waray hiya makasala ha imo ngan an iya mga ginbuhat para ha imo nakabulig ha imo.
5 Iya iginbutang ha peligro an iya kinabuhi* basi mapatay an Filisteo,+ salit naghatag hi Jehova hin daku nga kadaogan* ha bug-os nga Israel. Nakita mo ito, ngan nalipay ka gud hito. Salit kay ano nga makakasala ka kontra ha dugo han inosente nga tawo pinaagi ha pagpapatay kan David nga waray hinungdan?”+
6 Namati hi Saul kan Jonathan, ngan nanumpa hi Saul: “Sugad nga buhi hi Jehova, diri hiya papatayon.”
7 Katapos, gintawag ni Jonathan hi David ngan ginsumatan hiya hini ngatanan. Salit gindara ni Jonathan hi David ngadto kan Saul, ngan nagpadayon hi David sugad nga surugoon ni Saul pariho hadto.+
8 Paglabay han panahon nagkaada utro girra, ngan hi David ginawas ngan nakiggirra ha mga Filisteo ngan ginpamatay an damu ha ira, ngan namalagiw hira tikang ha iya atubangan.
9 Ngan usa nga maraot nga espiritu* tikang kan Jehova an kinada kan Saul+ han nalingkod hiya ha iya balay nga ginkakaptan an iya bangkaw, samtang hi David nagtutokar han arpa.+
10 Nagsari hi Saul pagtuhog kan David ngadto ha bungbong gamit an bangkaw, pero nakalikay hiya kan Saul, ngan an bangkaw dinulot ha bungbong. Hi David pinalagiw ngan ineskapo hito nga gab-i.
11 Ha urhi, nagsugo hi Saul hin mga mensahero ngadto ha balay ni David basi bantayan ito ngan patayon hiya pagkaaga,+ kondi hi Mical nga asawa ni David nagsiring ha iya: “Kon diri ka pumalagiw* yana nga gab-i, buwas patay ka na.”
12 Ginpalusad dayon ni Mical hi David ha bintana, basi makabaya hiya ngan makapalagiw.
13 Ginkuha ni Mical an terapim nga rebulto* ngan ginbutang ito ha higdaan, ngan nagbutang hiya hin pukot nga hinimo ha barahibo han kanding ha dapit nga gin-uunlan ni David, ngan gintabonan niya hin bado an terapim.
14 Yana nagsugo hi Saul hin mga mensahero basi kuhaon hi David, kondi nagsiring hi Mical: “May sakit hiya.”
15 Salit ginsugo ni Saul an mga mensahero nga kitaon hi David ngan ginsidngan hira: “Dad-a hiya ngadi ha akon ha iya higdaan basi maipapatay ko hiya.”+
16 Han sinulod an mga mensahero, nakada ha higdaan an terapim nga rebulto* ngan may pukot nga hinimo ha barahibo han kanding ha dapit nga gin-uunlan ni David.
17 Hi Saul nagsiring kan Mical: “Kay ano nga ginlimbongan mo ako hin sugad hini ngan ginpalakat an akon kaaway+ basi makapalagiw hiya?” Hi Mical binaton kan Saul: “Nagsiring hiya ha akon, ‘Palakta ako, kay kon diri, papatayon ko ikaw!’”
18 Hito nga panahon hi David nakabaya na ngan nakapalagiw, ngan kinadto hiya kan Samuel ha Rama.+ Iya iginsumat ha iya an ngatanan nga ginbuhat ni Saul ha iya. Katapos, linakat hira ni Samuel, ngan inukoy hira ha Naiot.+
19 Paglabay han panahon may nagsumat kan Saul: “Kitaa! Hi David aadto ha Naiot ha Rama.”
20 Nagsugo dayon hi Saul hin mga mensahero basi dakpon hi David. Han nakita nira nga nananagna an edaran nga mga propeta ngan hi Samuel natindog ngan nangunguna ha ira, an espiritu han Dios kinada ha mga mensahero ni Saul, ngan hira liwat nagtikang paggawi sugad hin mga propeta.
21 Han ira ito iginsumat kan Saul, nagsugo dayon hiya hin iba nga mga mensahero, ngan hira liwat nagtikang paggawi sugad hin mga propeta. Salit hi Saul nagsugo utro hin mga mensahero, an ikatulo nga grupo, ngan hira liwat nagtikang paggawi sugad hin mga propeta.
22 Ha kataposan, hiya liwat kinadto ha Rama. Pag-abot niya ha daku nga tirokan hin tubig nga nahimumutang ha Secu, nagpakiana hiya: “Hain hira Samuel ngan David?” Binaton hira: “Aadto ha Naiot+ ha Rama.”
23 Samtang nagbibiyahe hi Saul tikang didto tipakadto ha Naiot ha Rama, an espiritu han Dios kinada liwat ha iya, ngan nagpadayon hiya paglakat nga nagawi sugad hin propeta tubtob nga nakaabot hiya ha Naiot ha Rama.
24 Ginhukas liwat niya an iya mga bado, ngan hiya liwat ginawi sugad hin propeta ha atubangan ni Samuel, ngan hinigda hiya didto nga hubo* hiton bug-os nga adlaw ngan hiton bug-os nga gab-i. Ito an hinungdan kon kay ano nga nasiring hira: “Hi Saul ba usa liwat han mga propeta?”+
