An Siyahan nga Libro ni Samuel 3:1-21
-
Samuel gintawag nga magin propeta (1-21)
3 Hito nga panahon, an bata nga hi Samuel nag-aalagad+ kan Jehova ha atubangan ni Eli, kondi talagsa na la magkaada mensahe tikang kan Jehova hito nga mga adlaw; diri kalyap an mga bisyon.+
2 Usa ka adlaw, hi Eli nahigda ha dapit nga agsob niya higdaan, ngan an iya mga mata harap na; diri na hiya nakakakita.+
3 An lampara han Dios+ waray pa maparong, ngan hi Samuel nahigda ha templo*+ ni Jehova, diin nahimumutang an Arka han Dios.
4 Katapos, gintawag ni Jehova hi Samuel. Binaton hiya: “Aadi ako.”
5 Dinalagan hiya ngadto kan Eli ngan nagsiring: “Aadi ako, kay gintawag mo ako.” Kondi hi Eli nagsiring: “Waray ako magtawag. Balik na paghigda.” Salit linakat hiya ngan hinigda.
6 Hi Jehova nagtawag utro: “Samuel!” Salit binuhát hi Samuel ngan kinadto kan Eli ngan nagsiring: “Aadi ako, kay gintawag mo ako.” Kondi hi Eli nagsiring: “Waray ako magtawag, anak ko. Balik na paghigda.”
7 (Yana diri pa gud kilala ni Samuel hi Jehova, ngan an mensahe ni Jehova waray pa ipahayag ha iya.)+
8 Salit hi Jehova nagtawag utro, ha ikatulo nga higayon: “Samuel!” Salit binuhát hiya ngan kinadto kan Eli ngan nagsiring: “Aadi ako, kay gintawag mo ako.”
Tungod hito nasantop ni Eli nga hi Jehova an nagtatawag ha bata.
9 Salit hi Eli nagsiring kan Samuel: “Lakat, higda na, ngan kon tawagon ka niya, kinahanglan sumiring ka, ‘Pagyakan, Jehova, kay namamati an imo surugoon.’” Ngan linakat hi Samuel ngan hinigda utro.
10 Hi Jehova inabot ngan tinindog didto, ngan nagtawag hiya pariho han nahiuna nga mga higayon: “Samuel, Samuel!” Salit hi Samuel nagsiring: “Pagyakan, kay namamati an imo surugoon.”
11 Hi Jehova nagsiring kan Samuel: “Kitaa! May bubuhaton ako ha Israel nga an bisan hin-o nga makakabati mahitungod hito mahahadlok gud.*+
12 Hito nga adlaw bubuhaton ko kan Eli an ngatanan nga ginsiring ko mahitungod ha iya panimalay, tikang ha tinikangan tubtob ha kataposan.+
13 Kinahanglan sumatan mo hiya nga magpapahinabo ako hin nagpapadayon nga sirot ha iya panimalay tungod han sala nga iya hinbabaroan,+ kay iginsusumpa han iya mga anak an Dios,+ kondi waray niya hira sawaya.+
14 Ito an hinungdan nga nanumpa ako ha panimalay ni Eli nga an sala han panimalay ni Eli diri gud mapapasaylo pinaagi han mga halad nga hayop o han iba pa nga mga halad.”+
15 Hi Samuel hinigda tubtob ha aga; katapos, iya gin-abrihan an mga purtahan han balay ni Jehova. Nahadlok hi Samuel pagsumat kan Eli mahitungod han bisyon.
16 Kondi gintawag ni Eli hi Samuel: “Samuel, anak ko!” Binaton hiya: “Aadi ako.”
17 Hi Eli nagpakiana: “Ano nga mensahe an iya ginsiring ha imo? Alayon, ayaw ito itago ha akon. Magpahinabo unta an Dios hin sunod-sunod nga sirot ha imo kon magtago ka ha akon hin bisan usa nga pulong tikang ha ngatanan nga iya ginsiring ha imo.”
18 Salit iginsumat ni Samuel ha iya an ngatanan, ngan waray hiya igintago ha iya. Hi Eli nagsiring: “Hi Jehova ito. Buhaton niya kon ano an maopay ha iya pagkita.”
19 Hi Samuel padayon nga nagdaku, ngan hi Jehova mismo kaupod niya+ ngan waray tumugot nga diri matuman* an bisan usa han ngatanan niya nga ginsiring.
20 An bug-os nga Israel tikang ha Dan tubtob ha Beer-sheba nahibaro nga hi Samuel ginpili sugad nga propeta ni Jehova.
21 Ngan hi Jehova padayon nga nagpakita didto ha Shilo, kay iginpakilala ni Jehova an iya kalugaringon kan Samuel ha Shilo pinaagi han mensahe ni Jehova.+
