An Siyahan nga Libro ni Samuel 27:1-12
-
Iginhatag han mga Filisteo kan David an Ziklag (1-12)
27 Pero hi David nagsiring ha iya kasingkasing: “Maabot an adlaw nga mamamatay ako pinaagi han kamot ni Saul. An pinakamaopay para ha akon amo an pagpalagiw+ ngadto ha tuna han mga Filisteo; katapos maundang na hi Saul pagpinamiling ha akon ha bug-os nga teritoryo han Israel,+ ngan makakapalagiw ako ha iya kamot.”
2 Salit binuhát hi David ngan an 600 nga lalaki+ nga kaupod niya ngan kinadto kan Akis+ nga anak ni Maoc ngan hadi han Gat.
3 Nag-ukoy hi David kan Akis ha Gat, hiya ngan an iya mga tawo, an tagsa nga tawo upod an iya panimalay. Upod ni David an iya duha nga asawa, hi Ahinoam+ nga taga-Jezreel ngan hi Abigail+ nga taga-Carmel, nga balo ni Nabal.
4 Han ginsumatan hi Saul nga hi David pinalagiw ngadto ha Gat, inundang hiya pagpinamiling ha iya.+
5 Katapos, nagsiring hi David kan Akis: “Kon nakakarawat ako han imo pag-uyon, tagan unta nira ako hin lugar ha usa han gudtiay nga mga syudad, basi makaukoy ako didto. Kay ano nga an imo surugoon maukoy ha syudad han hadi kaupod mo?”
6 Salit hito nga adlaw iginhatag ha iya ni Akis an Ziklag.+ Ito an hinungdan kon kay ano nga an Ziklag gintatag-iya han mga hadi han Juda tubtob hini nga adlaw.
7 An kaihaon* han pag-ukoy ni David ha tuna han mga Filisteo inabot hin usa ka tuig ngan upat ka bulan.+
8 Hi David nasagka upod an iya mga tawo basi sulungon an mga Gesurita,+ mga Girzita, ngan mga Amalekita,+ kay naukoy hira ha tuna nga tikang ha Telam tubtob ha Shur+ ngan tubtob ha tuna han Ehipto.
9 Kon ginsusulong ni David an tuna, waray hiya gintitipigan nga buhi, lalaki man o babaye,+ pero ginkukuha niya an mga karnero, mga baka, mga asno, mga kamelyo, ngan mga bado, katapos nabalik hiya kan Akis.
10 Katapos, napakiana hi Akis: “Diin kamo sinulong yana nga adlaw?” Nabaton hi David: “Ha sur* han Juda”+ o “Ha sur han mga Jerameelita”+ o “Ha sur han mga Kenita.”+
11 Hi David waray iginsasalin nga buhi nga lalaki o babaye para dad-on ha Gat, kay nasiring hiya: “Basi diri hira makagsumat ha ira mahitungod ha aton ngan sumiring, ‘Ini an ginbuhat ni David.’” (Ngan ito an iya ginbubuhat ha bug-os nga panahon han iya pag-ukoy ha tuna han mga Filisteo.)
12 Salit tinuod hi Akis kan David ngan nagsiring ha iya kalugaringon: ‘Nangangalas na gud ha iya an Israel nga iya katawohan, salit magigin permanente ko na hiya nga surugoon.’
