An Siyahan nga Libro ni Samuel 30:1-31
30 Pag-abot ni David ngan han iya mga tawo ha Ziklag+ han ikatulo ka adlaw, ginsulong na han mga Amalekita+ an sur* ngan an Ziklag, ngan ira na gin-atake an Ziklag ngan ginsunog ito ha kalayo.
2 Ginbihag nira an mga babaye+ ngan an ngatanan nga nakada hito, tikang ha mga bata tubtob ha mga lagas. Waray hira bisan usa nga ginpatay, pero ginpandara nira hira ngan nagkalakat.
3 Pag-abot ni David ngan han iya mga tawo ha syudad, nakita nira nga sunog na ito, ngan ginbihag an ira mga asawa ngan an ira mga anak nga lalaki ngan an ira mga anak nga babaye.
4 Salit hi David ngan an kalalakin-an nga kaupod niya nagtikang pagtinangis hin makusog tubtob nga waray na hira kusog ha pagtangis.
5 An duha nga asawa ni David ginbihag liwat, hi Ahinoam nga taga-Jezreel ngan hi Abigail nga balo ni Nabal nga taga-Carmel.+
6 Nasubo gud hi David, kay an kalalakin-an nag-iiristorya nga batuhon hiya, kay an ngatanan nga kalalakin-an* nabibido gud tungod han kawad-i nira han ira mga anak nga lalaki ngan mga anak nga babaye. Pero ginparig-on ni David an iya kalugaringon pinaagi han bulig ni Jehova nga iya Dios.+
7 Katapos, nagsiring hi David kan Abiatar+ nga saserdote, nga anak ni Ahimelec: “Alayon dad-a nganhi an epod.”+ Salit gindara ni Abiatar kan David an epod.
8 Nagpakiana hi David kan Jehova:+ “Sadang ko ba lanaton ini nga grupo han mga tikasan? Maaabtan ko ba hira?” Binaton Hiya ha iya: “Lanata hira, kay sigurado nga maaabtan mo hira, ngan mababawi mo an ngatanan.”+
9 Linakat dayon hi David ngan an 600 nga lalaki+ nga kaupod niya, ngan nagpadayon hira tubtob ha Walog* han Besor, diin nagpabilin an iba han kalalakin-an.
10 Hi David ngan an 400 nga lalaki nagpadayon paglanat, pero nagpabilin an 200 nga lalaki nga diri na makakaakos pagtabok ha Walog han Besor tungod han duro nga kakapoy.+
11 Ha kapatagan nakakita hira hin lalaki nga Ehiptohanon ngan gindara hiya kan David. Gintagan nira hiya hin pagkaon nga makakaon ngan hin tubig nga maiinom,
12 pati na hin usa ka tiros nga karan-on nga pinisa nga igos ngan duha nga karan-on nga pasas. Katapos niya kumaon, nahibalik an iya kusog,* kay tulo ka adlaw ngan tulo ka gab-i na nga waray hiya makakaon hin bisan ano nga pagkaon o makainom hin tubig.
13 Nagpakiana yana ha iya hi David: “Kan kanay ka surugoon, ngan taga-diin ka?” Binaton hiya: “Usa ako nga kabulig nga Ehiptohanon, usa nga uripon han Amalekita nga lalaki, pero ginbayaan ako han akon agaron kay nagkasakit ako tulo ka adlaw na an naglabay.
14 Ginsulong namon an sur* han mga Kereteo+ ngan an teritoryo han Juda ngan an sur* han teritoryo ni Caleb,+ ngan ginsunog namon ha kalayo an Ziklag.”
15 Salit hi David nagsiring ha iya: “Dadad-on mo ba ako ngadto hito nga grupo han mga tikasan?” Binaton hiya: “Kon manunumpa ka ha akon ha ngaran han Dios nga diri mo ako papatayon ngan diri mo ako itutubyan ha akon agaron, dadad-on ko ikaw ngadto hito nga grupo han mga tikasan.”
16 Salit gindara niya hi David ngadto ha lugar diin hira nagpapatsarang* hiton bug-os nga tuna; nagpipinangaon hira ngan nagpipinanginom ngan nagpipiyesta tungod han ngatanan nga dagku nga dinag-an nga ira nakuha tikang ha tuna han mga Filisteo ngan ha tuna han Juda.
17 Ngan ginpamatay hira ni David tikang ha pagpamanagbanag ha kaagahon tubtob ha pagkagab-i; waray bisan usa nga tawo nga nakapalagiw+ labot la han 400 nga lalaki nga namalagiw sakay ha mga kamelyo.
18 Ginbawi ni David an ngatanan nga ginkuha han mga Amalekita,+ ngan gintalwas ni David an iya duha nga asawa.
19 Waray bisan usa ha ira nga nawara, tikang ha mga bata tubtob ha mga lagas. Ira ginbawi an ira mga anak nga lalaki ngan mga anak nga babaye ngan an mga dinag-an;+ ginbawi ni David an ngatanan nga ginkuha han mga Amalekita.
20 Salit ginkuha ni David an ngatanan nga karnero ngan mga baka, ngan ira ito ginpauna ha ira kalugaringon nga mga hayop. Nagsiring hira: “Ini an dinag-an ni David.”
21 Katapos, kinadto hi David ha 200 nga lalaki nga waray makaupod kan David tungod han duro nga kakapoy ngan nagpabilin ha Walog han Besor,+ ngan nagkagawas hira basi tapoon hi David ngan an katawohan nga kaupod niya. Pagdaop ni David ha kalalakin-an, iya hira ginkumusta.
22 Kondi an tagsa nga maraot ngan waray pulos nga tawo nga inupod kan David nagsiring: “Tungod kay waray hira umupod ha aton, diri naton hira tatagan han bisan ano nga dinag-an nga aton ginbawi, pero puydi kuhaon han kada tagsa an iya asawa ngan an iya mga anak ngan lumakat na.”
23 Kondi hi David nagsiring: “Kabugtoan ko, ayaw niyo ini buhata ha mga butang nga iginhatag ha aton ni Jehova. Iya kita ginpanalipdan ngan iginhatag ha aton kamot an grupo han mga tikasan nga sinulong ha aton.+
24 Hin-o an mauyon ha iyo hini nga butang? An bahín han usa nga linugsad ngadto ha pakiggirra magigin pariho han bahín han usa nga liningkod dinhi ha mga dara.+ An ngatanan parapriho nga magkakaada bahín.”+
25 Ngan tikang hito nga adlaw, ginhimo niya ito nga regulasyon ngan surundon para ha Israel tubtob hini nga adlaw.
26 Pagbalik ni David ha Ziklag, iginpadara niya an iba han mga dinag-an ngadto ha mga tigurang han Juda nga iya mga sangkay, nga nasiring: “Aadi an regalo* para ha iyo tikang ha mga dinag-an nga ginkuha ha mga kaaway ni Jehova.”
27 Iya ito iginpadara ha mga aadto ha Bethel,+ ha mga aadto ha Ramot ha Negeb,* ha mga aadto ha Jatir,+
28 ha mga aadto ha Aroer, ha mga aadto ha Sifmot, ha mga aadto ha Estemoa,+
29 ha mga aadto ha Racal, ha mga aadto ha mga syudad han mga Jerameelita,+ ha mga aadto ha mga syudad han mga Kenita,+
30 ha mga aadto ha Horma,+ ha mga aadto ha Borasan, ha mga aadto ha Atac,
31 ha mga aadto ha Hebron,+ ngan ha ngatanan nga lugar nga pirme ginkakadtoan hadto ni David ngan han iya mga tawo.
