An Siyahan nga Libro ni Samuel 6:1-21
-
Iginbalik han mga Filisteo an Arka ha Israel (1-21)
6 An Arka+ ni Jehova nakadto ha teritoryo han mga Filisteo ha sulod hin pito ka bulan.
2 Gintawag han mga Filisteo an mga saserdote ngan an mga parapanigo+ ngan ginpakianhan: “Ano an sadang namon buhaton ha Arka ni Jehova? Sumati kami kon paonan-o namon ito ibabalik ha orihinal nga hinmumutangan hito.”
3 Binaton hira: “Kon iyo ibabalik an arka han kasabotan ni Jehova nga Dios han Israel, ayaw ito ibalik nga waray upod nga halad. Kinahanglan ibalik gud niyo ito ha iya nga may upod nga halad tungod han pagin salaan.+ Dida la kamo maoopay, ngan hibabaroan niyo kon kay ano nga an iya kamot waray bumaya ha iyo.”
4 Salit nagpakiana hira: “Ano nga halad tungod han pagin salaan an sadang namon ipadara ha iya?” Nagsiring hira: “Sumala ha kadamu han mga magmarando han mga Filisteo,+ pagpadara kamo hin lima nga bulawan nga almoranas ngan lima nga bulawan nga yatot, kay pariho hito an mga peste nga naeksperyensyahan han kada tagsa ha iyo ngan han iyo mga magmarando.
5 Kinahanglan maghimo kamo hin mga imahen han iyo almoranas ngan mga imahen han mga yatot+ nga nagdadaot han iyo tuna, ngan kinahanglan niyo pasidunggan an Dios han Israel. Bangin man la pagaanon niya an iya kamot nga aada ha iyo ngan ha iyo dios ngan ha iyo tuna.+
6 Kay ano nga patitig-ahon niyo an iyo kasingkasing sugad la nga ginpatig-a han mga Ehiptohanon ngan han Paraon an ira kasingkasing?+ Han ginsirotan Niya hira,+ napiritan hira nga palargahon an Israel, ngan binaya hira.+
7 Yana pag-andam kamo hin bag-o nga karomata ngan hin duha nga baka nga may mga nati ngan waray pa gud makagpas-an hin yugo. Katapos, ihigot ha karomata an mga baka, kondi ig-uli an ira mga nati, hirayo ha ira.
8 Kuhaa an Arka ni Jehova ngan ikarga ito ha karomata, ngan ha sapit hito ibutang an kahon nga ginsudlan han bulawan nga mga imahen nga iyo ipapadara ha iya sugad nga halad tungod han pagin salaan.+ Katapos, palakta ito
9 ngan obserbari: Kon sumagka ito ha dalan tipakadto ha Bet-semes,+ tipakadto ha kalugaringon nga teritoryo hito, karuyag sidngon, hiya an nagbuhat ha aton hinin daku nga karaotan. Pero kon diri, mahibabaroan naton nga diri an iya kamot an nagsirot ha aton; nahituman la nga nahitabo ito ha aton.”
10 Ginbuhat ito han katawohan. Nagkuha hira hin duha nga baka nga may mga nati ngan iginhigot ito ha karomata, ngan an mga nati ira igin-uli.
11 Katapos, ira iginkarga ha karomata an Arka ni Jehova, pati na an kahon nga ginsudlan han bulawan nga mga yatot ngan han mga imahen han ira almoranas.
12 Ngan an mga baka nagdiretso ha dalan tipakadto ha Bet-semes.+ Nagpadayon hira pagsulsog ha usa nga kalsada samtang nag-iininga; waray hira lumiko ha too o ha wala. Durante hito nga panahon, an mga magmarando han mga Filisteo nagbabaktas nga nasunod ha ira tubtob ha giutan han Bet-semes.
13 An katawohan han Bet-semes nag-aani hin trigo ha kapatagan.* Han ira iginsiplat an ira mga mata ngan nakita an Arka, nalipay gud hira han pakakita hito.
14 An karomata inabot ha tuna ni Josue nga taga-Bet-semes ngan inundang* didto hirani ha usa nga daku nga bato. Salit ira gintiak an kahoy han karomata, ngan ira iginhalad an mga baka+ sugad nga halad nga sinunog para kan Jehova.
15 Iginlusad han mga Levita+ an Arka ni Jehova ngan an kahon nga kaupod hito, nga ginsudlan han bulawan nga mga imahen, ngan iginbutang nira ito ha bawbaw han daku nga bato. An katawohan han Bet-semes+ naghalad kan Jehova hin mga halad nga sinunog ngan hin iba pa nga mga halad nga hayop hito nga adlaw.
16 Han nakita ito han lima nga magmarando han mga Filisteo, binalik hira ha Ekron hito nga adlaw.
17 Yana ini an bulawan nga mga almoranas nga iginpadara han mga Filisteo sugad nga halad kan Jehova tungod han pagin salaan:+ usa para ha Asdod,+ usa para ha Gaza, usa para ha Askelon, usa para ha Gat,+ usa para ha Ekron.+
18 Ngan an kadamu han bulawan nga mga yatot pariho han kadamu han ngatanan nga syudad han mga Filisteo nga ginmamandoan han lima nga magmarando—an pinader nga mga syudad ngan an mga baryo nga diri pinader.
Ngan an daku nga bato nga ginbutangan nira han Arka ni Jehova usa nga testigo tubtob hini nga adlaw ha tuna ni Josue nga taga-Bet-semes.
19 Kondi ginpamatay han Dios an katawohan han Bet-semes, kay nagkita hira ha Arka ni Jehova. Ginpamatay niya an 50,070* ha katawohan, ngan nagtikang pagtaguminatay an katawohan kay damu ha ira an ginpamatay ni Jehova.+
20 Salit an katawohan han Bet-semes nagpakiana: “Hin-o an makakatindog ha atubangan ni Jehova, inin baraan nga Dios,+ ngan kan kanay hiya makadto pagbaya niya ha aton?”+
21 Salit nagsugo hira hin mga mensahero ngadto ha mga umurukoy han Kiriat-jearim,+ nga nasiring: “Iginbalik han mga Filisteo an Arka ni Jehova. Lugsad kamo ngadi ngan kuhaa ito.”+
