An Siyahan nga Libro ni Samuel 25:1-44
25 Inabot an panahon nga namatay hi Samuel;+ ngan an ngatanan nga Israelita nagtirirok basi magtaguminatay tungod ha iya ngan ilubong hiya ha iya balay ha Rama.+ Katapos, hi David binuhát ngan linugsad ngadto ha kamingawan han Paran.
2 Yana may usa nga lalaki ha Maon+ nga nagtatrabaho ha Carmel.*+ Ini nga lalaki riko gud; may-ada hiya 3,000 nga karnero ngan 1,000 nga kanding, ngan hito nga panahon gin-aarotan niya an iya mga karnero ha Carmel.
3 An ngaran han lalaki amo hi Nabal,+ ngan an ngaran han iya asawa amo hi Abigail.+ An asawa maaramon ngan mahusay, kondi an bana, nga usa nga Calebita,+ maraugdaog ngan maraot an batasan.+
4 Ha kamingawan nakabati hi David nga hi Nabal nag-aarot han iya mga karnero.
5 Salit nagsugo hi David hin napulo nga batan-on nga lalaki ngadto ha iya, ngan ginsidngan ni David an batan-on nga mga lalaki: “Sagka kamo ngadto ha Carmel, ngan pag-abot niyo kan Nabal, kumustaha hiya ha akon ngaran.
6 Katapos siring kamo, ‘Hinaot mabuhi ka hin maiha ngan hinaot maghingaopay ka* ngan hinaot maghingaopay an imo panimalay ngan hinaot maghingaopay an ngatanan nga aada ha imo.
7 Yana nabatian ko nga nag-aarot ka han imo mga karnero. Han kaupod namon an imo mga paraataman hin panon, waray namon hira buhati hin maraot,+ ngan waray hira mawad-i hin bisan ano ha bug-os nga panahon nga nakadto hira ha Carmel.
8 Pakianhi an imo batan-on nga mga lalaki, ngan susumatan ka nira. Hinaot an akon batan-on nga mga lalaki makakarawat han imo pag-uyon, kay kinanhi kami ha usa nga makalilipay nga higayon.* Alayon tagi an imo mga surugoon ngan an imo anak nga hi David hin anoman nga imo sobra.’”+
9 Salit linakat an batan-on nga mga lalaki ni David ngan iginsumat kan Nabal ini ngatanan ha ngaran ni David. Han natapos hira,
10 binaton hi Nabal ha mga surugoon ni David: “Hin-o hi David, ngan hin-o an anak ni Jesse? Yana nga panahon, damu nga surugoon an nangingiwas ha ira mga agaron.+
11 Kinahanglan ko ba kuhaon an akon tinapay ngan an akon tubig ngan an karne han hayop nga gin-ihaw* ko para ha akon mga paraarot hin karnero ngan ihatag ito ha mga lalaki nga diri ako maaram kon diin tikang?”
12 Salit binalik an batan-on nga mga lalaki ni David ngan iginsumat ha iya ini ngatanan nga pulong.
13 Ginsidngan dayon ni David an iya mga tawo: “Itaklos niyo ngatanan an iyo espada!”+ Salit igintaklos nira ngatanan an ira mga espada, ngan igintaklos liwat ni David an iya kalugaringon nga espada, ngan mga 400 nga lalaki an sinagka upod ni David, samtang 200 nga lalaki an nagpabilin ha ira mga dara.
14 Hito liwat nga panahon, usa han mga surugoon an nagsumat kan Abigail nga asawa ni Nabal: “Kitaa! Hi David nagsugo hin mga mensahero tikang ha kamingawan basi magsiring ha amon agaron nga maghingaopay unta hiya, pero gin-guliatan niya hira hin panginsulto.+
15 Ito nga mga tawo nagin maopay gud ha amon. Waray gud hira magbuhat hin maraot ha amon, ngan waray kami mawad-i hin bisan ano ha bug-os nga panahon nga kaupod namon hira ha mga panabsaban.+
16 Pariho hira hin nagpapanalipod nga pader ha palibot namon, ha gab-i ngan ha adlaw, ha bug-os nga panahon nga kaupod namon hira ha pag-ataman han panon.
17 Yana pagdesisyon kon ano an imo bubuhaton, kay sigurado nga magriresulta ini hin kadaot ha amon agaron ngan ha bug-os niya nga panimalay,+ ngan waray pulos gud hiya nga tawo+ salit waray nakakahimo pakiistorya ha iya.”
18 Salit nagkuha dayon hi Abigail+ hin 200 nga tinapay, duha ka tadyaw nga bino, lima nga inihaw nga karnero, lima ka seah* nga sinanlag nga lugas, 100 nga karan-on nga pasas, ngan 200 nga karan-on nga pinisa nga igos ngan iginkarga ito ngatanan ha mga asno.+
19 Katapos, nagsiring hiya ha iya mga surugoon: “Pag-una kamo ha akon; masunod ako ha iyo.” Kondi waray hiya magsumat hin bisan ano ha iya bana nga hi Nabal.
20 Samtang sakay hiya ha asno ngan nagtitipalugsad nga nasasalipdan han bukid, hi David ngan an iya mga tawo nagtitipalugsad liwat tipakadto ha iya, ngan iginkatapo niya hira.
21 Mahitungod kan David, nagsiniring hiya: “Waray pulos an akon pagbantay ha ngatanan nga panag-iya hito nga tawo ha kamingawan. Waray hiya mawad-i hin bisan usa nga panag-iya,+ pero ginbalosan niya hin maraot an akon ginbuhat nga maopay.+
22 Magpahinabo unta an Dios hin sunod-sunod nga sirot ha mga kaaway ni David* kon tugotan ko nga mahisalin nga buhi tubtob ha aga an bisan usa nga lalaki* ha panimalay hito nga tawo.”
23 Pakakita ni Abigail kan David, nagdali-dali hiya paglusad ha asno ngan linuhod ha atubangan ni David ngan yinukbo ha tuna.
24 Katapos, hinapa hiya ha tiilan ni David ngan nagsiring: “Ginoo ko, tuguti ako nga angkunon an sayop; tuguti an imo surugoon nga babaye nga makiistorya ha imo, ngan pamatii an isisiring han imo surugoon nga babaye.
25 Alayon, diri unta tagdon han akon ginoo inin waray pulos nga hi Nabal,+ kay pariho la hiya han iya ngaran. Nabal* an iya ngaran, ngan an kalurongan aada ha iya. Kondi ako, nga imo surugoon nga babaye, waray makakita ha batan-on nga mga lalaki han akon ginoo nga imo ginsugo.
26 Ngan yana, ginoo ko, sugad nga buhi hi Jehova ngan sugad nga buhi ka,* hi Jehova an nagpugong ha imo+ tikang ha pagin salaan ha dugo+ ngan ha pagbulos* pinaagi han imo kalugaringon nga kamot. Hinaot magin pariho kan Nabal an imo mga kaaway ngan an mga naruruyag pagbuhat hin maraot ha akon ginoo.
27 Yana ini nga regalo*+ nga gindara han imo surugoon nga babaye nganhi ha akon ginoo ihatag unta ha batan-on nga mga lalaki nga nasunod ha akon ginoo.+
28 Alayon pasayloa an pagtalapas han imo surugoon nga babaye, kay hi Jehova sigurado nga maghihimo hin balay nga mag-iiha para ha akon ginoo,+ tungod kay an akon ginoo nakikig-away han mga girra ni Jehova,+ ngan waray nakita nga karaotan ha imo ha ngatanan mo nga adlaw.+
29 Kon may nabuhát basi lanaton ka ngan nag-iikaparatay ha imo,* an kinabuhi* han akon ginoo puputson hin maopay ni Jehova nga imo Dios ha surudlan han kinabuhi, kondi an kinabuhi* han imo mga kaaway iya ilalabay pariho hin mga bato tikang ha labyog.
30 Ngan kon buhaton na ni Jehova para ha akon ginoo an ngatanan nga mag-opay nga butang nga iya iginsaad ngan pilion ka niya basi magin lider ha Israel,+
31 diri ka mabibido o magbabasol* ha imo kasingkasing tungod ha pagpatay* nga waray hinungdan ngan ha pagtugot ha kamot han akon ginoo nga bumulos.*+ Kon bendisyonan na ni Jehova an akon ginoo, hinumdumi an imo surugoon nga babaye.”
32 Salit hi David nagsiring kan Abigail: “Dayawon hi Jehova nga Dios han Israel, nga nagsugo ha imo hini nga adlaw basi tapoon ako!
33 Ngan bendisyonan an imo maopay nga panhunahuna! Hinaot bendisyonan ka kay ginpugngan mo ako hini nga adlaw tikang ha pagin salaan ha dugo+ ngan ha pagbulos* pinaagi han akon kalugaringon nga mga kamot.
34 Kay sugad nga buhi hi Jehova nga Dios han Israel nga nagpugong ha akon ha pagbuhat hin maraot ha imo,+ kon waray ka kumadi dayon basi tapoon ako,+ buwas nga aga bangin waray na nahisalin ha panimalay ni Nabal nga bisan usa nga lalaki.”*+
35 Salit ginkarawat ni David tikang kan Abigail an iya gindara kan David ngan nagsiring ha iya: “Sagka nga mamurayawon ngadto ha imo balay. Kitaa, namati ako ha imo, ngan tutumanon ko an imo ginhangyo.”
36 Ha urhi binalik hi Abigail kan Nabal, nga nananagtawo pariho hin hadi didto ha iya balay, ngan hi Nabal* malipayon ngan sobra an kahubog. Waray hi Abigail magsumat ha iya hin bisan ano tubtob ha pagpawa han aga.
37 Pagkaaga, han nahuwasan na hi Nabal, iginsumat ha iya han iya asawa ini nga mga butang. Ngan an iya kasingkasing nagin pariho han kasingkasing han patay nga tawo, ngan nagin paralisado hiya nga pariho hin bato.
38 Paglabay hin mga napulo ka adlaw, ginhampak ni Jehova hi Nabal, ngan namatay hiya.
39 Han nabatian ni David nga namatay na hi Nabal, nagsiring hiya: “Dayawon hi Jehova, nga nagdepensa han akon kaso+ han pagpakaalo ni Nabal+ ngan nagpugong ha iya surugoon ha pagbuhat hin bisan ano nga maraot,+ ngan iginbalik ni Jehova an karaotan ni Nabal ngadto ha iya kalugaringon nga ulo!” Katapos, nagpadara hi David hin mensahe nga karuyag niya kuhaon hi Abigail sugad nga iya asawa.
40 Salit an mga surugoon ni David kinadto kan Abigail ha Carmel ngan nagsiring ha iya: “Ginsugo kami ni David nganhi ha imo basi kuhaon ka sugad nga iya asawa.”
41 Binuhát dayon hiya ngan hinapa ha tuna ngan nagsiring: “Aadi an imo uripon basi magin surugoon nga maghihimsaw+ ha mga surugoon han akon ginoo.”
42 Katapos, nagdagmit pagbuhát hi Abigail+ ngan sinakay ha iya asno, ngan lima han iya mga surugoon nga babaye an nagbaktas nga nasunod ha iya; inupod hiya ha mga mensahero ni David ngan nagin iya asawa.
43 Hito nga panahon, asawa na ni David hi Ahinoam+ nga taga-Jezreel,+ ngan hira nga duha nagin iya asawa.+
44 Kondi iginhatag na ni Saul an iya anak nga hi Mical,+ nga asawa ni David, kan Palti+ nga anak nga lalaki ni Lais, nga taga-Galim.
Mga footnote
^ Usa nga syudad ha Juda; iba ha Bukid Carmel.
^ O “ngan magkaada ka unta kamurayawan.”
^ Lit., “usa nga maopay nga adlaw.”
^ Ha iba nga lugar, “ginpatay.”
^ O posible nga “kan David.”
^ Lit., “an bisan hin-o nga naihi ha pader.” Usa nga Hebreo nga ekspresyon han panamay mahitungod ha mga lalaki.
^ Nangangahulogan nga “Lurong.”
^ O “pagdara hin katalwasan.”
^ O “an imo kalag.”
^ Lit., “bendisyon.”
^ O “namimiling han imo kalag.”
^ O “kalag.”
^ O “mga kalag.”
^ Lit., “magpaparadingpading o mahipapakdol.”
^ Lit., “pagpaagay hin dugo.”
^ O “magdara hin katalwasan.”
^ O “pagdara hin katalwasan.”
^ Lit., “bisan hin-o nga naihi ha pader.” Usa nga Hebreo nga ekspresyon han panamay mahitungod ha mga lalaki.
^ Lit., “an kasingkasing ni Nabal.”
