An Siyahan nga Libro ni Samuel 16:1-23
16 Ha urhi, hi Jehova nagsiring kan Samuel: “Tubtob san-o ka mabibido tungod kan Saul+ yana nga iginsalikway ko na hiya ha pagmando sugad nga hadi han Israel?+ Pun-a hin lana an imo surudlan nga sungay+ ngan lakat. Pakakadtoon ko ikaw kan Jesse+ nga taga-Bethlehem, kay ginpili ko an usa han iya mga anak nga lalaki basi magin hadi para ha akon.”+
2 Kondi hi Samuel nagsiring: “Paonan-o ako makakakadto? Kon mahibaroan ito ni Saul, papatayon niya ako.”+ Binaton hi Jehova: “Pagdara hin bata pa nga baka ngan siring, ‘Kinanhi ako basi maghalad kan Jehova.’
3 Imbitara hi Jesse ngadto ha paghalad; katapos, isusumat ko ha imo an imo bubuhaton. Kinahanglan dihogan mo para ha akon an tawo nga igtututdo ko ha imo.”+
4 Ginbuhat ni Samuel an ginsiring ni Jehova. Pag-abot niya ha Bethlehem,+ an mga tigurang han syudad nangungurog han gintapo nira hiya, ngan nagsiring hira: “An imo ba pagkanhi nangangahulogan hin kamurayawan?”
5 Binaton hiya: “Oo, nangangahulogan ini hin kamurayawan. Kinanhi ako basi maghalad kan Jehova. Baraana an iyo kalugaringon, ngan upod ha akon ngadto ha paghalad.” Sunod, iya ginbaraan hi Jesse ngan an iya mga anak nga lalaki, ngan katapos iya ginpakadto hira ha paghalad.
6 Samtang nasulod hira ngan pakakita niya kan Eliab,+ nagsiring hiya: “Sigurado nga hiya an dinihogan ni Jehova.”
7 Kondi hi Jehova nagsiring kan Samuel: “Ayaw kitaa an iya hitsura ngan an iya kahitaas,+ kay waray ko hiya pilia. Kay an pagkita han tawo diri pariho han pagkita han Dios, tungod kay panggawas nga hitsura la an nakikita han tawo, pero nakikita ni Jehova an kasingkasing.”+
8 Katapos, gintawag ni Jesse hi Abinadab+ ngan gindara hiya ha atubangan ni Samuel, kondi nagsiring hi Samuel: “Waray liwat hiya pilia ni Jehova.”
9 Sunod, gindara ni Jesse hi Sammah,+ pero nagsiring hi Samuel: “Waray liwat hiya pilia ni Jehova.”
10 Salit gindara ni Jesse ha atubangan ni Samuel an pito han iya mga anak nga lalaki, pero nagsiring hi Samuel kan Jesse: “Hi Jehova waray napili ha ira.”
11 Ha kataposan hi Samuel nagsiring kan Jesse: “Ini na ba ngatanan an imo mga anak nga lalaki?” Binaton hiya: “An putó+ waray pa dinhi; nagpapasabsab hiya han mga karnero.”+ Katapos, nagsiring hi Samuel kan Jesse: “Ipatawag hiya, kay diri kita manlilingkod basi mangaon samtang diri pa hiya naabot.”
12 Salit iginpatawag hiya ni Jesse ngan gindara ha sulod. Mapula-pula an iya panit, maopay an iya mga mata, ngan gwapo+ hiya. Katapos nagsiring hi Jehova: “Buhát, dihugi hiya, kay amo na ini hiya!”+
13 Salit ginkuha ni Samuel an sungay nga surudlan hin lana+ ngan gindihogan hiya ha atubangan han iya kabugtoan. Ngan tikang hito nga adlaw an espiritu ni Jehova naghatag hin gahum kan David.+ Ha urhi, binuhát hi Samuel ngan kinadto ha Rama.+
14 Hito nga panahon an espiritu ni Jehova binaya na kan Saul,+ ngan ginsamok hiya hin maraot nga espiritu* tikang kan Jehova.+
15 An mga surugoon ni Saul nagsiring ha iya: “Nakikita mo nga ginsasamok ka hin maraot nga espiritu tikang ha Dios.
16 Amon ginoo, alayon sugoa kami nga imo mga surugoon nga mamiling hin tawo nga eksperto magtokar han arpa.+ Ha kada panahon nga napakada ha imo an maraot nga espiritu tikang ha Dios, magtutokar hiya hito, ngan mag-oopay an imo pag-abat.”
17 Salit hi Saul nagsiring ha iya mga surugoon: “Alayon bilngi ako hin tawo nga maopay magtokar, ngan dad-a hiya nganhi ha akon.”
18 Usa han mga kabulig an nagsiring: “Kitaa! Nakita ko nga eksperto magtokar an usa nga anak nga lalaki ni Jesse nga taga-Bethlehem, ngan maisog hiya ngan makusog nga girriro.+ Maopay hiya magyakan, gwapo,+ ngan kaupod niya hi Jehova.”+
19 Katapos, nagsugo hi Saul hin mga mensahero ngadto kan Jesse ngan nagsiring: “Pakanhia ha akon an imo anak nga hi David, nga aadto kaupod han panon.”+
20 Salit ginkargahan ni Jesse an usa nga asno hin tinapay, hin anit nga surudlan hin bino, ngan hin nati nga kanding ngan iginpadara ito kan Saul pinaagi kan David nga iya anak.
21 Hito nga paagi nahingadto hi David kan Saul ngan nagtikang pagserbi ha iya.+ Ginhigugma gud hiya ni Saul, ngan hiya an nagin paradara han mga gamit nga pan-girra ni Saul.
22 Nagpadara hi Saul hin mensahe kan Jesse: “Alayon tuguti hi David nga magpadayon ha pagserbi ha akon, kay nakakapalipay hiya ha akon.”
23 Ha kada panahon nga napakada kan Saul an maraot nga espiritu tikang ha Dios, ginkukuha ni David an arpa ngan gintutokar ito, ngan naliliaw hi Saul ngan nag-oopay an iya pag-abat, ngan nabaya ha iya an maraot nga espiritu.+
Mga footnote
^ O “maraot nga disposisyon.” Igintugot ni Jehova nga samukon hi Saul han iya kalugaringon nga hunahuna.
