UHezekheli 32:1-32
32 Mhlaka 1 ngenyanga yesi-12 ngomnyaka wesi-12, ilizwi likaJehova laphinda lafika kimi lathi:
2 “Ndodana yomuntu, hlabela ingoma yokulila ngoFaro inkosi yaseGibhithe uthi kuye,‘Wawunjengesilwane esilamandla phakathi kwezizwe,Kodwa sewathuliswa.
Wawunjengesilo solwandle,+ utshaya amanzi emifuleni yakho,Udunga amanzi ngenyawo zakho njalo ungcolisa imifula.’*
3 Nanku okutshiwo yiNkosi Enkulu uJehova:
‘Ngizasebenzisa abantu bezizwe ezinengi ukuthi baphosele inethi yami phezu kwakho,Besebekuphakamisa ngenethi yami.
4 Ngizakuphosela emhlabathini,Ngikulahlele egangeni.
Ngizakwenza zonke inyoni ezisemkhathini zihlale phezu kwakho,Ngisuthise zonke izinyamazana zeganga ngawe.+
5 Inyama yakho ngizayilahlela ezintabeni,Ngigcwalise izigodi ngokuyabe kusele esidunjini sakho.+
6 Ngizakwenza igazi lakho lintshaze ligcwale ilizwe lonke lize liyefika lasezintabeni,Ligcwalise lezifula.’
7 ‘Nxa ususifa ngizasibekela amazulu ngenze izinkanyezi zibe mnyama.
Ngizasitha ilanga ngamayezi,Njalo inyanga ayisoze ikhanyise.+
8 Zonke izibane ezikhanyisayo emazulwini ngizazenza zibe mnyama ngenxa yakho,Ngenze ilizwe lakho lonke libe mnyama,’ kutsho iNkosi Enkulu uJehova.
9 ‘Ngizakwenza abantu bezizwe ezinengi bakhathazeke nxa sengithumba abantu bakho ngibasa kwezinye izizwe,Emazweni ongawaziyo.+
10 Ngizakwenza abantu bezizwe ezinengi bamangale,Lamakhosi abo azaqhaqhazela nxa sengiphakamisa inkemba yami phambi kwawo.
Azaqhuqha okungapheliyo ngamunye wabo esesabela impilo yakhe,Ngelanga lokutshabalala kwakho.’
11 Nanku okutshiwo yiNkosi Enkulu uJehova:
‘Inkemba yenkosi yaseBhabhiloni izakwehlela phezu kwakho.+
12 Ngizakwenza amaxuku akho abulawe zinkemba zamabutho alamandla,Amabutho esizwe esilesihluku ukwedlula zonke.+
Azakuqeda konke ukuzigqaja kweGibhithe njalo wonke amaxuku ayo azatshabalala.+
13 Ngizabulala zonke izifuyo zayo eceleni kwamanzi amanengi,+Akulanyawo lomuntu loba olwesifuyo oluzaphinda ludunge amanzi.’+
14 ‘Ngalesosikhathi ngizahlambulula amanzi alelolizwe,Ngenze amanzi asemifuleni ageleze njengamafutha,’ kutsho iNkosi Enkulu uJehova.
15 ‘Nxa sengisenza iGibhithe ibe yinkangala futhi sengiyithathela konke elakho,+Nxa sengibulala bonke abantu abaphakathi kwayo,Bazakwazi ukuthi mina nginguJehova.+
16 Le yingoma yokulila ezahlatshelwa ngabantu.
Izahlatshelwa ngabantu bezinye izizwe,Beyihlabelela iGibhithe lamaxuku ayo wonke,’ kutsho iNkosi Enkulu uJehova.”
17 Ngosuku lwesi-15 lwenyanga,* ngomnyaka wesi-12, ilizwi likaJehova lafika kimi lisithi:
18 “Ndodana yomuntu khalela amaxuku eGibhithe. Memezela ukuthi iGibhithe izakwehliselwa ngaphansi komhlaba, ilabantu bezizwe ezilamandla kanye lalabo abehlela egodini.*
19 “‘Kanti ubona angani umuhle ukwedlula bonke abantu? Yehlela engcwabeni uyelala lapho okulele khona abantu abangasokanga.’
20 “‘Bazabulawa lalabo abazabulawa ngenkemba.+ IGibhithe izahlaselwa ngenkemba. Kayihudulelwe khatshana kanye lamaxuku ayo wonke.
21 “‘Amabutho alamandla azakhuluma layo isekujuleni kwengcwaba ilalabo abayisekelayo. IGibhithe labayisekelayo bazabulawa ngenkemba behlele ngaphansi komhlaba, balale njengabantu abangasokanga.
22 Yikho lapho okule-Asiriya labantu bayo bonke. Inkosi yabo igonjolozelwe ngamangcwaba abo bonke ababulawa ngenkemba.+
23 Amangcwaba ayo asekujuleni komhlaba futhi abantu bayo bagombolozele ingcwaba layo, bonke babulewe ngenkemba ngoba besaphila babesenza abantu bahlale besesaba.
24 “‘I-Elami+ labantu bayo labo bakhonapho futhi bagombolozele ingcwaba lenkosi yabo. Bonke babulawa ngenkemba baya ngaphansi komhlaba bengasokanga ngoba besaphila yibo ababesenza abantu bahlale besesaba. Kodwa khathesi bazalithwala ihlazo labo belalabo abehlela egodini.*
25 I-Elami bayenzele umbheda phakathi kwalabo ababuleweyo kanye lamaxuku ayo wonke agombolozele amangcwaba ayo. Bonke abasokanga futhi babulawa ngenkemba ngoba besaphila babesenza abantu bahlale besesaba. Bazalithwala ihlazo labo belalabo abehlela egodini.* I-Elami isifakwe phakathi kwalabo ababuleweyo.
26 “‘Yikho lapho okuleMeshekhi leThubhali+ kanye lamaxuku azo. Amangcwaba abo agombolozele inkosi yabo futhi bonke abasokanga. Bagwazwa ngenkemba ngoba besaphila babesenza abantu bahlale besesaba.
27 Bazalala ndawonye lamabutho alamandla angasokanga, afa ehlela engcwabeni lezikhali zawo zempi. Inkemba zabo zizafakwa ngaphansi kwamakhanda abo,* lamacala abo afakwe emathanjeni abo ngoba babesenza abantu bahlale besesaba ngesikhathi besaphila.
28 Kodwa wena* uzatshabalaliswa ndawonye labantu abangasokanga njalo uzalala lapho okulele khona labo ababulawa ngenkemba.
29 “‘I-Edomi+ layo ikhonapho lamakhosi ayo labakhokheli bayo. Lanxa babelamandla, bonke babulawa ndawonye lalabo ababulawa ngenkemba. Labo bazalala lapho okulele khona abantu abangasokanga+ lalabo abehlela egodini.*
30 “‘Bonke ababusi* benyakatho bakhonapho labantu bonke beSidoni+ abehlela ngaphansi komhlaba beyangekile belalabo ababuleweyo, lanxa babesethusela abantu ngamandla abo. Bazalala benjalo bengasokanga belalabo ababulawa ngenkemba futhi bazalithwala ihlazo labo ndawonye lalabo abehlela egodini.*
31 “‘UFaro uzakubona konke lokhu aduduzeke ngakho konke okwehlele amaxuku akhe.+ UFaro lebutho lakhe bazadliwa yinkemba,’ kutsho iNkosi Enkulu uJehova.
32 “‘UFaro lamaxuku akhe wonke bazalala ndawonye lalabo abangasokanga lababulawa ngenkemba ngoba esaphila wayesenza abantu bahlale besesaba,’ kutsho iNkosi Enkulu uJehova.”
Amabala angaphansi
^ NgesiHebheru, “imifula yabo.”
^ Lapha kungabe kutshiwo inyanga yesi-12. Khangela uvesi 1.
^ Kumbe, “engcwabeni.”
^ Kumbe, “engcwabeni.”
^ Kumbe, “engcwabeni.”
^ Lapha kungabe kutshiwo amabutho ayengcwatshwa lenkemba zawo ukuze kukhanye ukuthi ayezingwazi.
^ Lapha kungabe kutshiwo uFaro loba iGibhithe.
^ Kumbe, “engcwabeni.”
^ Kumbe, “abakhokheli.”
^ Kumbe, “engcwabeni.”
