UHezekheli 39:1-29
39 “Ndodana yomuntu phrofetha mayelana loGogi+ uthi kuye, ‘Nanku okutshiwo yiNkosi Enkulu uJehova: “Ngizakulwa lawe wena Gogi, ndunankulu yeMeshekhi leThubhali.+
2 Ngizakuphendukisa ngikususe ezindaweni ezikhatshana ezisenyakatho,+ ngikukhokhele ngikulethe ezintabeni zako-Israyeli.
3 Ngizatshaya idandili* lakho elisesandleni senxele liwele phansi, ngiwise lemitshoko yakho oyithwele ngesandla sokudla.
4 Uzafela ezintabeni zako-Israyeli+ wena lamabutho akho kanye labantu bezizwe abalawe. Ngizalenza libe yikudla kwezinyamazana zeganga lazo zonke inyoni ezidla inyama.”’+
5 “‘Uzafela egangeni+ njengoba mina sengitshilo,’ kutsho iNkosi Enkulu uJehova.
6 “‘Ngizathumela umlilo eMagogi lakulabo abahlala ezihlengeni bevikelekile.+ Lapho-ke bazakwazi ukuthi mina nginguJehova.
7 Ngizakwenza abantu bami bako-Israyeli balazi ibizo lami elingcwele futhi angisoze ngivumele ukuthi ibizo lami elingcwele liphinde lingcoliswe. Izizwe zizakwazi ukuthi mina nginguJehova,+ oNgcwele ko-Israyeli.’+
8 “‘Lokhu kuyeza sibili futhi kuzakwenzakala,’ kutsho iNkosi Enkulu uJehova. ‘Lelo yilo ilanga engakhuluma ngalo.
9 Abantu abahlala emadolobheni ako-Israyeli bazaphuma bayebasa umlilo ngezikhali. Bazabasa ngamahawu amancane* lamakhulu langamadandili, lemitshoko, lezinduku lemikhonto. Izikhali lezi bazabasa ngazo umlilo+ okweminyaka eyisikhombisa.
10 Abasoze badinge loba batheze inkuni eguswini ngoba bazasebenzisa izikhali ukubasa umlilo.’
“‘Bazathumba impahla yalabo ababethumba impahla yabo, bathathe konke ababebathathela khona,’ kutsho iNkosi Enkulu uJehova.
11 “‘Ngalelolanga uGogi+ ngizamnika indawo azangcwatshwa kuyo ko-Israyeli, esigodini esidlula abantu abahamba ngasempumalanga kolwandle. Indawo leyo izavala indlela abantu abadlula ngayo. Lapho yikho abazangcwaba khona uGogi kanye lawo wonke amaxuku akhe. Isigodi leso bazasibiza ngokuthi yisigodi seHamoni-Gogi.*+
12 Abantu bako-Israyeli bazathatha inyanga eziyisikhombisa bebangcwaba ukuze ilizwe lisale lihlanzekile.+
13 Bonke abantu baselizweni bazancedisa emsebenzini wokubangcwaba futhi umsebenzi lo uzabenza babe lodumo ngosuku engizazikhazimulisa ngalo,’+ kutsho iNkosi Enkulu uJehova.
14 “‘Kuzakhethwa amadoda azadabula phakathi kwelizwe zikhathi zonke engcwaba izidumbu ezisele zithe dandalazi emhlabathini. Lokhu azakwenza ukuze umhlaba usale uhlanzekile futhi azaqhubeka ngomsebenzi wawo okwenyanga eziyisikhombisa.
15 Nxa abadlulayo bangabona ithambo lomuntu bazafaka uphawu eceleni kwalo. Labo abasebenza ukungcwaba izidumbu bazalingcwaba esigodini seHamoni-Gogi.+
16 Khonapho kuzakuba ledolobho okuthiwa yiHamona.* Abantu bazalihlambulula ilizwe.’+
17 “Ndodana yomuntu, nanku okutshiwo yiNkosi Enkulu uJehova: ‘Khuluma lenyoni zonke lazo zonke izinyamazana zeganga uthi, “Qoqanani lonke libuye lizobuthana ligombolozele umhlatshelo wami engilenzele wona. Ngilenzele umhlatshelo omkhulu ezintabeni zako-Israyeli,+ lizakudla inyama linathe legazi.+
18 Lizakudla inyama yabalamandla linathe legazi labakhokheli basemhlabeni, inyama yezifuyo zonke zeBhashani ezinonileyo, eyezinqama, leyembuzi, leyezinkunzi leyamazinyane ezimvu.
19 Lizazitika ngamafutha linathe igazi lize lidakwe ngumhlatshelo engililungisele wona.”’
20 “‘Etafuleni yami lizakudla lisuthe inyama yamabhiza leyabagadi bawo, lidle leyabalamandla leyamaqhawe wonke,’+ kutsho iNkosi Enkulu uJehova.
21 “‘Izizwe ngizazitshengisa udumo lwami futhi izizwe zonke zizabona ukuthi ngahlulele njani, zibone lamandla ami engibatshengise wona.+
22 Kusukela ngalolosuku abako-Israyeli bazakwazi ukuthi nginguJehova uNkulunkulu wabo.
23 Izizwe zizakwazi ukuthi abako-Israyeli bathunjwa ngenxa yokuthi babesona futhi bengathembekanga kimi.+ Yikho ngabafihlela ubuso bami+ ngabanikela ezitheni zabo+ ezababulala bonke ngenkemba.
24 Ngabaphatha ngokufanele ukungcola kwabo lezono zabo njalo ngabafihlela ubuso bami.’
25 “Ngakho nanku okutshiwo yiNkosi Enkulu uJehova: ‘Ngizabuyisela abantu bakaJakhobe ababethunjiwe,+ ngibe lesihawu kubo bonke abantu bako-Israyeli.+ Ngizalilwela ngamandla ami wonke* ibizo lami elingcwele.+
26 Nxa sebeyangisiwe ngenxa yokuthi babengathembekanga kimi,+ bazahlala elizweni labo bevikelekile kungelamuntu obenza besabe.+
27 Nxa sengibathatha ezizweni njalo sengibaqoqa emazweni ezitha zabo,+ indlela engizabaphatha ngayo izakwenza izizwe ezinengi zibone ukuthi ngingcwele.’+
28 “‘Bazakwazi ukuthi mina nginguJehova uNkulunkulu wabo nxa sengiyekela izizwe zibathumba, ngiphinde ngibathathe ngibabuyisele elizweni labo ngingatshiyi loyedwa.+
29 Angisoze ngiphinde ngibafihlele ubuso bami+ ngoba ngizathululela umoya wami phezu kwabako-Israyeli,’+ kutsho iNkosi Enkulu uJehova.”
Amabala angaphansi
^ Khangela iNgcazelo Yamabala.
^ Amahawu la ayejayele ukuthwalwa ngamabutho asebenzisa imitshoko.
^ Kumbe, “yisigodi samaxuku kaGogi.”
^ Ibizo leli litsho ukuthi, “Amaxuku abantu.”
^ Kumbe, “Ngizalitshisekela.”
