UHezekheli 11:1-25
11 Umoya wangiphakamisa wangisa egedini lendlu kaJehova elisempumalanga.+ Egedini lelo elikhangele empumalanga ngabona amadoda angu-25. Phakathi kwawo kwakulabakhokheli babantu,+ uJazaniya indodana ka-Azuri loPhelathiya indodana kaBhenaya.
2 UNkulunkulu wasesithi kimi: “Ndodana yomuntu, amadoda la yiwo abumba amacebo amabi futhi anika abantu bedolobho leli izeluleko ezimbi.
3 Athi: ‘Lesi ayisiso yini isikhathi sokuthi sakhe izindlu zethu?+ Idolobho leli liyimbiza yokupheka,*+ thina siyinyama yakhona.’*
4 “Ngakho phrofetha okubi ngabo. Phrofetha ndodana yomuntu.”+
5 Umoya kaJehova wehlela kimi+ wasesithi: “Batshele uthi, ‘Nanku okutshiwo nguJehova: “Lokho elikukhulumileyo bantu bako-Israyeli kuqondile njalo ngiyakwazi elikucabangayo.
6 Libulalise abantu abanengi edolobheni leli, lagcwalisa izidumbu emigwaqweni yalo.”’”+
7 “Ngakho iNkosi Enkulu uJehova ithi: ‘Izidumbu elizigcwalise idolobho lonke yizo eziyinyama yakhona, futhi idolobho liyimbiza yokupheka.+ Kodwa lina lizakhitshwa kulo.’”
8 “‘Inkemba eliyesabayo+ yiyo elizabulawa ngayo,’ kutsho iNkosi Enkulu uJehova.
9 ‘Ngizalikhipha edolobheni leli ngilinikele ezandleni zabantu bezinye izizwe besengilahlulela.+
10 Lizabulawa ngenkemba+ njalo ngizalahlulela emngceleni wako-Israyeli.+ Lapho-ke lizakwazi ukuthi mina nginguJehova.+
11 Idolobho leli alisoze libe yimbiza yenu, lani alisoze libe yinyama ephakathi kwayo. Ngizalahlulela emngceleni wako-Israyeli
12 njalo lizakwazi ukuthi mina nginguJehova ngoba alizange lilandele imithetho yami lemilayo yami*+ kodwa lilandele imilayo yezizwe* eziligombolozeleyo.’”+
13 Ngathi ngiqeda nje ukuphrofetha, uPhelathiya indodana kaBhenaya wafa. Ngakho ngazilahla phansi ngathi mbo ngobuso, ngakhala ngelizwi elikhulu ngisithi: “Awu Nkosi Enkulu Jehova! Kambe uzabaqeda bonke abako-Israyeli abaseleyo?”+
14 Ilizwi likaJehova laphinda lafika kimi lathi:
15 “Ndodana yomuntu, izakhamizi zeJerusalema zitshele abafowenu abalelungelo lokuhlenga kanye labantu bonke bako-Israyeli zathi: ‘Lingasondeli kuJehova. Ilizwe ngelethu, liyilifa lethu esiliphiweyo.’
16 Ngakho batshele uthi, ‘Nanku okutshiwo yiNkosi Enkulu uJehova: “Lanxa ngibasusile ngabahambisa emazweni akhatshana, ngabachithachitha laphakathi kwezizwe,+ ngizakuba yindawo yabo engcwele okwesikhatshana nje besemazweni lawo abakuwo.”’+
17 “Yikho-ke batshele uthi, ‘Nanku okutshiwo yiNkosi Enkulu uJehova: “Ngizaliqoqa ezizweni, ngilibuthe lasemazweni elisabalale kuwo, besengilinika ilizwe lako-Israyeli.+
18 Bazaphenduka kulo basuse zonke izinto ezinyanyisayo lazo zonke izenzo ezenyanyekayo ezenziwa kulo.+
19 Ngizabenza babe nhliziyonye+ futhi ngizatshintsha indlela abacabanga ngayo.*+ Ngizakhipha inhliziyo yelitshe emizimbeni yabo,+ ngibanike inhliziyo yenyama,*+
20 ukuze balandele imithetho yami futhi bagcine imilayo yami bayilalele.* Bangenza njalo bazakuba ngabantu bami, mina ngibe nguNkulunkulu wabo.”’
21 “‘“Kodwa labo abazimisele ngenhliziyo zabo ukuqhubeka besenza izinto ezinyanyisayo lezenzo zabo ezenyanyekayo ngizabehlisela lokho okufanele izenzo zabo,” kutsho iNkosi Enkulu uJehova.’”
22 Amakherubhi aphakamisa impiko zawo futhi kwakulamaviri eduze kwawo.+ Inkazimulo kaNkulunkulu ka-Israyeli yayiphezu kwamakherubhi.+
23 Inkazimulo kaJehova+ yaphakama yasuka edolobheni yayakuma entabeni esempumalanga kwedolobho.+
24 Kusenjalo umoya wangiphakamisa ngisembonweni engangiwutshengiswa ngumoya kaNkulunkulu, wangiletha ebantwini ababethunjiwe elizweni lamaKhaledi. Ngemva kwalokho umbono waphela,
25 ngasengiqalisa ukutshela abantu ababethunjiwe zonke izinto uJehova ayengitshengise zona.
Amabala angaphansi
^ Kumbe, “liyimbiza elomlomo obanzi.”
^ AmaJuda ayecabanga ukuthi ayevikelekile eJerusalema njengenyama ephakathi kwembiza.
^ NgesiHebheru, “izahlulelo zezizwe.”
^ NgesiHebheru, “lezahlulelo zami.”
^ Lapha kutshiwo inhliziyo ephangisa ukwamukela lokho uNkulunkulu akutshoyo.
^ NgesiHebheru, “Ngizabanika inhliziyo eyodwa futhi ngizafaka umoya omutsha ngaphakathi kwabo.”
^ Kumbe, “bagcine izahlulelo zami bazilalele.”
