Sumala kan Mateo 17:1-27
17 Paglabay hin unom ka adlaw, igin-upod ni Jesus hi Pedro ngan hi Santiago ngan an iya bugto nga hi Juan ngan gindara hira ha hitaas nga bukid nga hira la.+
2 Ngan nabag-o an iya hitsura ha ira atubangan; an iya nawong nagsilaw sugad han adlaw,* ngan an iya pantungbaw nga mga bado nagin mapawa* sugad han kalamrag.+
3 Ngan kitaa! ira nakita hira Moises ngan Elias nga nakikiistorya ha iya.
4 Katapos, nagsiring hi Pedro kan Jesus: “Ginoo, maopay kay aanhi kami. Kon karuyag mo, magtitindog ako dinhi hin tulo nga tolda, usa para ha imo, usa para kan Moises, ngan usa para kan Elias.”
5 Samtang nagyayakan pa hiya, kitaa! may malamrag nga dampog nga naglambong ha ira, ngan kitaa! may tingog tikang ha dampog nga nagsiring: “Ini an akon Anak nga hinigugma, nga gin-uuyonan ko.+ Pamati kamo ha iya.”+
6 Pakabati hini han mga disipulo, linuhod hira nga nahapa ngan nahadlok gud.
7 Katapos, dinaop hi Jesus ngan ginkaptan hira, nga nasiring: “Buhát kamo. Ayaw kamo kahadlok.”
8 Paghangad nira, waray hira iba nga nakita kondi hi Jesus la.
9 Samtang nalugsad hira ha bukid, gintugon hira ni Jesus: “Ayaw niyo isumat ha bisan hin-o an bisyon tubtob nga an Anak han tawo buhion tikang ha mga patay.”+
10 Pero an mga disipulo nagpakiana ha iya: “Kon sugad, kay ano man nga nasiring an mga eskriba nga kinahanglan mahiuna pagkanhi hi Elias?”+
11 Binaton hiya: “Makanhi gud hi Elias ngan iya igpapahiuli an ngatanan nga butang.+
12 Kondi nasiring ako ha iyo nga kinanhi na hi Elias, ngan waray nira hiya makilala pero ginbuhat nira ha iya an anoman nga ira karuyag.+ Ha sugad liwat hini nga paagi, an Anak han tawo mag-aantos ha ira mga kamot.”+
13 Salit nasabtan han mga disipulo nga hi Juan Bawtista an ginsisiring niya ha ira.
14 Pagkadto nira ha mga tawo,+ usa nga lalaki an dinaop ha iya, linuhod ha iya, ngan nagsiring:
15 “Ginoo, malooy ka ha akon anak, kay may epilepsi hiya ngan may sakit. Agsob hiya matumba ha kalayo ngan agsob liwat ha tubig.+
16 Gindara ko hiya ha imo mga disipulo, pero waray nira hiya matambal.”
17 Hi Jesus nagsiring: “O waray pagtoo ngan matinalapason nga henerasyon,+ tubtob san-o ako makikig-upod ha iyo? Tubtob san-o ako mag-iilob ha iyo? Dad-a hiya ngadi ha akon.”
18 Katapos, ginsaway ni Jesus an demonyo, ngan ginawas ito ha bata nga lalaki, ngan nag-opay hiya tikang hito nga oras.+
19 Katapos, an mga disipulo dinaop kan Jesus nga hira la ngan nagsiring: “Kay ano nga waray namon ito mapagawas?”
20 Nagsiring hiya ha ira: “Tungod kay gutiay an iyo pagtoo. Kay ha pagkamatuod nasiring ako ha iyo, kon may pagtoo kamo nga sugad kagutiay han liso han mustasa,* masiring kamo hini nga bukid, ‘Balhin tikang didi ngadto didto,’ ngan mabalhin ito, ngan waray magigin imposible ha iyo.”+
21 * ——
22 Durante han pagkatirok nira ha Galilea nagsiring ha ira hi Jesus: “An Anak han tawo patraydor nga itutubyan ha mga kamot han mga tawo,+
23 ngan papatayon nira hiya, ngan ha ikatulo ka adlaw bubuhion hiya.”+ Ngan nasubo gud hira.
24 Pag-abot nira ha Capernaum, an mga tawo nga nanunukot han duha ka drakma* nga buhis dinaop kan Pedro ngan nagsiring: “Nagbabayad ba an iyo magturutdo han duha ka drakma nga buhis?”+
25 Binaton hiya: “Oo.” Pero pagsulod niya ha balay, gin-unahan hiya ni Jesus ha pagyakan ngan nagsiring: “Ano ha imo paghunahuna, Simon? Tikang kan kanay an mga hadi ha tuna nakarawat hin mga bayad o hin buhis? Tikang ha ira mga anak o tikang ha mga estranghero?”
26 Han nagsiring hiya: “Tikang ha mga estranghero,” hi Jesus nagsiring ha iya: “Kon sugad, an mga anak libre ha buhis.
27 Pero basi diri kita makapakdol*+ ha ira, kadto ha dagat, pangawil, ngan kuhaa an siyahan nga isda nga imo makawil, ngan pag-abri mo han baba hito, makakakita ka hin usa nga silber nga sinselyo.* Kuhaa ito ngan ibayad ha ira para ha akon ngan ha imo.”
