Ezekiel 8:1-18
8 Ngan ha ikaunom ka tuig, ha ikaunom ka bulan, ha ikalima ka adlaw han bulan, han nalingkod ako ha akon balay ngan an mga tigurang han Juda nanlilingkod ha akon atubangan, ginios ha akon didto an gahum ni Jehova* nga Soberano nga Ginoo.
2 Samtang nagkikita ako, may nakita ako nga dagway nga puropariho hin kalayo; may kalayo ha ubos han daw sugad hin iya hawak,+ ngan tikang ha iya hawak tipaigbaw malamrag an iya hitsura, pariho han ranggat han elektrum.*+
3 Katapos, igin-unat niya an daw sugad hin kamot ngan ginkaptan an buhok ha akon ulo, ngan gin-alsa ako han usa nga espiritu ngadto ha butnga han tuna ngan han langit ngan gindara ako ngadto ha Jerusalem pinaagi han mga bisyon tikang ha Dios, ngadto ha aragian tipasulod ha sulod nga ganghaan+ nga naatubang ha norte, diin nahimumutang an idolo nga simbolo* han pangabugho nga nag-aaghat hin pangabugho.+
4 Ngan kitaa! an himaya han Dios han Israel nakadto,+ nga pariho pagkit-on han akon nakita ha kapatagan.+
5 Katapos, nagsiring hiya ha akon: “Anak han tawo, alayon isiplat an imo mga mata ha norte.” Salit iginsiplat ko an akon mga mata ha norte, ngan didto ha aragian tipasulod, ha norte han ganghaan han halaran, nahimumutang ini nga simbolo* han pangabugho.
6 Ngan nagsiring hiya ha akon: “Anak han tawo, nakikita mo ba an maraot gud ngan mangil-ad nga mga butang nga ginbubuhat dinhi han panimalay ni Israel,+ an mga butang nga hinungdan han akon pagpahirayo ha akon santuaryo?+ Pero makakakita ka hin mangil-ad nga mga butang nga mas maraot pa gud.”
7 Katapos, gindara niya ako ha aragian tipasulod ha bungsaran, ngan pagtan-aw ko, may nakita ako nga buho ha bungbong.
8 Nagsiring hiya ha akon: “Anak han tawo, alayon padakua an buho han bungbong.” Salit ginpadaku ko an buho han bungbong, ngan may nakita ako nga aragian tipasulod.
9 Nagsiring hiya ha akon: “Sulod ngan kitaa an maraot ngan mangil-ad nga mga butang nga ira ginbubuhat dida.”
10 Salit sinulod ako ngan nagkita, ngan hinkit-an ko an ngatanan nga klase han nagkakamang nga mga linarang ngan mangil-ad nga mga hayop+ ngan an ngatanan nga mangil-ad nga idolo* han panimalay ni Israel;+ nakaukit ito ha bug-os nga bungbong.
11 Ngan 70 han mga tigurang han panimalay ni Israel an natindog ha atubangan hito, upod na hi Jaazanias nga anak nga lalaki ni Safan.+ Ginkakaptan han kada tagsa an iya insensaryo, ngan an mahamot nga aso han insenso nagtitipaigbaw.+
12 Nagsiring hiya ha akon: “Anak han tawo, nakikita mo ba an ginbubuhat ha kasisidman han mga tigurang han panimalay ni Israel, an kada tagsa dida ha pribado nga mga kwarto nga hinmumutangan han iya mga idolo?* Kay nasiring hira, ‘Diri kita nakikita ni Jehova. Ginbayaan na ni Jehova ini nga tuna.’”+
13 Ngan nagsiring pa hiya ha akon: “Makakakita ka han ira ginbubuhat nga mangil-ad nga mga butang nga mas maraot pa gud.”
14 Salit gindara niya ako ha aragian tipasulod ha norte nga ganghaan han balay ni Jehova, ngan didto may nakita ako nga kababayin-an nga nanlilingkod ngan nananangis tungod ha dios nga hi Tamuz.
15 Dugang pa, nagsiring hiya ha akon: “Nakikita mo ba ini, O anak han tawo? Makakakita ka hin mangil-ad nga mga butang nga mas maraot pa gud hini.”+
16 Salit gindara niya ako ha sulod nga bungsaran han balay ni Jehova.+ Didto ha aragian tipasulod ha templo ni Jehova, ha butnga han beranda ngan han halaran, may mga 25 nga lalaki nga natalikod ha templo ni Jehova ngan naatubang ha este; nayukbo hira ngadto ha adlaw ha este.+
17 Nagsiring hiya ha akon: “Anak han tawo, nakikita mo ba ini? Gutiay la ba nga butang para ha panimalay ni Juda nga buhaton inin mangil-ad nga mga butang, nga pun-on hin kamadarahog ini nga tuna+ ngan padayon nga pasinahon ako? Kitaa, iginhihirani gud nira ha akon irong an sanga.*
18 Salit magios ako tungod han duro nga kasina. An akon mata diri malolooy; diri liwat ako mapaid.+ Bisan pa nira dakuon an ira pangaraba basi mabatian ko, diri ko hira pamamatian.”+
Mga footnote
^ Lit., “kinadto ha akon didto an kamot ni Jehova.”
^ Mainggat nga metal nga tikang ha ginhalo nga bulawan ngan silber.
^ O “an imahen.”
^ O “imahen.”
^ An Hebreo nga termino bangin may koneksyon ha pulong para ha “tai” ngan gin-gagamit sugad nga pagtamay.
^ O “ha pribado nga mga kwarto han iya imahen?”
^ Posible nga sanga nga ginagamit ha pagsingba ha idolo.
