Ezekiel 23:1-49
23 An pulong ni Jehova inabot utro ha akon, nga nasiring:
2 “Anak han tawo, may duha nga babaye nga mga anak han uusa la nga nanay.+
3 Nagin mga hostes hira ha Ehipto;+ tikang ha ira pagkabatan-on nagbuhat hira hin prostitusyon. An ira mga suso ginpinidlit didto, ngan an ira birhen nga mga dughan ginhinurohapyod.
4 An ira mga ngaran amo hi Ohola,* an magurang, ngan hi Oholiba* nga iya bugto. Nagin akon hira ngan nag-anak hira hin mga lalaki ngan mga babaye. May kalabotan ha ira mga ngaran, hi Ohola amo an Samaria,+ ngan hi Oholiba amo an Jerusalem.
5 “Hi Ohola nagtikang pagbuhat hin prostitusyon+ samtang akon pa hiya. Naghingyap hiya hin malaw-ay ha iya mga karelasyon,+ an mga Asiryano+ nga iya mga amyaw.*
6 Mga gobernador hira nga nakasul-ot hin asul ngan kabulig nga mga magmarando—hira ngatanan makaruruyag nga batan-on nga mga lalaki nga nagpakakabayo.
7 Nagpadayon hiya ha pagbuhat hin prostitusyon ha ngatanan nga pinakamag-opay nga anak nga lalaki han Asirya, ngan ginhugawan niya an iya kalugaringon+ pinaagi han mangil-ad nga mga idolo* hadton iya ginhingyapan hin malaw-ay.
8 Waray niya bayai an prostitusyon nga iya ginbuhat ha Ehipto, kay ha iya pagkabatan-on nakighilawas hira ha iya, ngan ira ginhinurohapyod an iya birhen nga dughan ngan nagpatakas hira ha ira malaw-ay nga hingyap* ha iya.+
9 Salit igintubyan ko hiya ha kamot han iya mga karelasyon, an mga anak han Asirya,+ nga iya ginhingyapan hin malaw-ay.
10 Iginbuhayhag nira an iya pagkahubo+ ngan gin-agaw nira an iya mga anak nga lalaki ngan mga anak nga babaye,+ ngan ira hiya ginpatay pinaagi han espada. Nagin maraot an iya bantog dida ha kababayin-an, ngan nagpadapat hira hin paghukom kontra ha iya.
11 “Han nakita ito ni Oholiba nga iya bugto, nagin mas malaw-ay gud an iya hingyap, ngan an iya ginbuhat nga prostitusyon mas maraot kay han ginbuhat han iya bugto.+
12 Naghingyap hiya hin malaw-ay ha iya mga amyaw nga mga anak han Asirya,+ an mga gobernador ngan an kabulig nga mga magmarando nga magarbo an pamado ngan nagpakakabayo—hira ngatanan makaruruyag nga batan-on nga mga lalaki.
13 Han ginhugawan niya an iya kalugaringon, nakita ko nga hira nga duha pariho an pagkinabuhi.+
14 Kondi padayon nga gindugangan niya an iya pagbuhat hin prostitusyon. Nakakita hiya ha pader hin inukit nga mga lalaki, hin inukit nga mga ladawan han mga Caldeo nga ginpintaran hin malamrag nga kapula,
15 nga may sul-ot nga mga paha ha ira hawak, may higlaba nga mga putos ha ulo, ngan sugad hin mga girriro pagkit-on, ngan ito ngatanan naghuhulagway ha mga taga-Babilonya, nga igin-anak ha tuna han mga Caldeo.
16 Pakakita gud niya hito ngatanan, nagtikang hiya paghingyap hin malaw-ay ha mga taga-Babilonya, ngan nagpadara hiya hin mga mensahero ngadto ha ira ha Caldea.+
17 Salit an mga anak nga lalaki han Babilonya padayon nga nagkinadto ha iya higdaan para makighilawas ha iya, ngan ginhugawan nira hiya pinaagi han ira malaw-ay nga hingyap.* Katapos nira hiya hugawi, ginbayaan niya hira* kay nangingil-ad hiya ha ira.
18 “Han waray awod nga nagpadayon hiya ha pagbuhat hin prostitusyon ngan ha pagpakita han iya pagkahubo,+ ginbayaan ko hiya kay nangingil-ad ako ha iya, sugad la nga ginbayaan ko* an iya bugto kay nangingil-ad ako ha iya.+
19 Ngan padayon nga gindugangan niya an iya pagbuhat hin prostitusyon,+ nga ginhihinumdom an mga adlaw han iya pagkabatan-on han nagbuhat hiya hin prostitusyon ha tuna han Ehipto.+
20 Naghingyap hiya hin malaw-ay ha ira pariho han mga kerida han mga lalaki nga an ikinatawo sugad han ikinatawo han asno nga lalakí ngan han kabayo nga lalakí.
21 Naghingyap ka han malaw-ay nga panggawi han imo pagkabatan-on didto ha Ehipto+ han ira ginhinurohapyod an imo dughan, an mga suso han imo pagkabatan-on.+
22 “Salit Oholiba, ini an siring ni Jehova nga Soberano nga Ginoo: ‘Kitaa, aaghaton ko an imo mga karelasyon+ nga ginbayaan mo* kay nangingil-ad ka ha ira, ngan dadad-on ko hira kontra ha imo tikang ha tagsa nga direksyon,+
23 an mga anak nga lalaki han Babilonya+ ngan an ngatanan nga Caldeo,+ an kalalakin-an han Pekod,+ han Soa, ngan han Koa, pati na an ngatanan nga anak nga lalaki han Asirya. Hira ngatanan makaruruyag nga batan-on nga mga lalaki, mga gobernador ngan kabulig nga mga magmarando, mga girriro ngan mga pinili,* ngan mga nagpakakabayo.
24 Aatakehon ka nira pinaagi hin nagkakaradol nga pan-girra nga mga karuwahe ngan mga kaliding ngan pinaagi hin daku nga grupo han mga sundalo, nga may daku nga taming ngan gutiay nga taming* ngan helmet. Mapwesto hira ha palibot mo, ngan tutugotan ko hira nga magpadapat hin paghukom, ngan huhukman ka nira uyon ha ira karuyag.+
25 Ipapahayag ko an akon kasina kontra ha imo, ngan magios hira kontra ha imo tungod han ira kapungot. Uutdon nira an imo irong ngan an imo mga talinga, ngan an mga nahibilin dida ha imo mamamatay pinaagi han espada. Pangunguhaon nira an imo mga anak nga lalaki ngan an imo mga anak nga babaye, ngan an mga nahibilin dida ha imo mauugtang ha kalayo.+
26 Huhukason nira an imo mga bado+ ngan kukuhaon nira an imo mag-opay nga mga alahas.*+
27 Pauundangon ko an imo malaw-ay nga panggawi ngan an imo prostitusyon,+ nga nagtikang ha tuna han Ehipto.+ Diri ka na magkikinita ha ira, ngan diri mo na mahinunumdoman an Ehipto.’
28 “Kay ini an siring ni Jehova nga Soberano nga Ginoo: ‘Kitaa, hirani ko na ikaw igtubyan ngada hadton ginkakangalasan mo, hadton ginbayaan mo* kay nangingil-ad ka ha ira.+
29 Magios hira kontra ha imo tungod han kangalas ngan kukuhaon nira an ngatanan mo nga ginkapoyan+ ngan babayaan ka nira nga hubo ngan waray bado. Mabubuhayhag an imo makaarawod nga imoralidad ngan an imo malaw-ay nga panggawi ngan an imo prostitusyon.+
30 Ini nga mga butang bubuhaton ha imo tungod kay naglinanat ka ha mga nasud pariho hin hostes,+ tungod kay ginhugawan mo an imo kalugaringon pinaagi han ira mangil-ad nga mga idolo.+
31 Ginsubad mo an pagkinabuhi han imo bugto,+ ngan an iya kopa ibubutang ko ha imo kamot.’+
32 “Ini an siring ni Jehova nga Soberano nga Ginoo:
‘Iimnan mo an hilarom ngan hilapad nga kopa han imo bugto,+Ngan magigin pataraw-an ka ngan taramayon, kay damu an sulod han kopa.+
33 Mahuhubog ka gud ngan mapupuno han kasubo,Han sulod han kopa han kahadlok ngan pagkabinayaan,Han kopa han imo bugto, an Samaria.
34 Iimnon mo gud ngan uubuson an sulod hito+ ngan kikitkiton mo an mga tipak hito,Ngan katapos rarabuton mo an imo mga suso.
“Kay ako mismo an nagyakan,” nasiring hi Jehova nga Soberano nga Ginoo.’
35 “Salit ini an siring ni Jehova nga Soberano nga Ginoo: ‘Tungod kay imo ako ginkalimtan ngan ginbalewaray gud,*+ aantuson mo an mga resulta han imo malaw-ay nga panggawi ngan han imo ginbuhat nga prostitusyon.’”
36 Katapos hi Jehova nagsiring ha akon: “Anak han tawo, magpapahayag ka ba hin paghukom kanda Ohola ngan Oholiba+ ngan susukmaton hira tungod han ira mangil-ad nga mga binuhatan?
37 Nag-adulteryo* hira,+ ngan may dugo ha ira mga kamot. Diri la kay basta nag-adulteryo hira ha ira mangil-ad nga mga idolo, kondi ira pa gud ginsunog ha kalayo* an ira mga anak ha akon basi magin pagkaon han ira mga idolo.+
38 Labot pa hito, ini an ira ginbuhat ha akon: Ira ginhugawan an akon santuaryo hito nga adlaw, ngan ira ginpasiparahan an akon mga sabbath.
39 Katapos nira pamatayon an ira mga anak sugad nga mga halad ha ira mangil-ad nga mga idolo,+ sinulod hira ha akon santuaryo basi pasiparahan ini+ hito mismo nga adlaw. Ito an ira ginbuhat ha sulod han akon kalugaringon nga balay.
40 Nagsugo pa ngani hira hin mensahero basi pakadtoon ha ira an mga lalaki tikang ha hirayo.+ Han tiabot na an mga lalaki, kinarigo ka ngan nagbutang hin kolorete ha imo mga mata ngan nagsul-ot hin mga alahas.+
41 Ngan liningkod ka ha maopay hinduro nga higdaan+ nga may lamesa ha atubangan,+ ngan dida mo iginbutang an akon insenso+ ngan an akon lana.+
42 Hinbatian didto an aringasa han nagkakalipay nga mga lalaki, ngan may kaupod hira nga mga parahubog nga gindara tikang ha kamingawan. Ginbutangan nira hin mga purseras an mga kamot hini nga mga babaye ngan hin mag-opay nga mga korona an ira mga ulo.
43 “Katapos, nagsiring ako mahitungod ha iya nga kapoy na gud ha pag-adulteryo: ‘Yana magpapadayon hiya ha pagbuhat han iya prostitusyon.’
44 Salit padayon nga nagkinadto hira ha iya, sugad la han pagkinadto han usa nga tawo ha usa nga hostes. Ha sugad nga paagi hira nagkinadto kan Ohola ngan kan Oholiba, an mga babaye nga malaw-ay an panggawi.
45 Kondi an magtadong nga mga tawo magpapadapat ha iya han paghukom nga naangay para ha pag-adulteryo+ ngan pamatay;*+ kay mga nag-aadulteryo hira, ngan may dugo ha ira mga kamot.+
46 “Kay ini an siring ni Jehova nga Soberano nga Ginoo: ‘Magdadara ako kontra ha ira hin kasundalohan basi himoon hira nga makaharadlok ngan panguhaon an ira mga panag-iya sugad nga dinag-an.+
47 Panbabatuhon hira+ han kasundalohan ngan paninigbason pinaagi han ira mga espada. Pamamatayon nira an ira mga anak nga lalaki ngan mga anak nga babaye+ ngan susunugon ha kalayo an ira mga balay.+
48 Pauundangon ko an malaw-ay nga panggawi dida hito nga tuna, ngan an ngatanan nga babaye mahibabaro hin leksyon ngan diri masubad ha iyo malaw-ay nga panggawi.+
49 Ipapadapat ha iyo han kasundalohan an mga resulta han iyo malaw-ay nga panggawi ngan han mga sala nga iyo ginbuhat pinaagi ha pagsingba ha iyo mangil-ad nga mga idolo; ngan makikilala gud niyo nga ako hi Jehova nga Soberano nga Ginoo.’”+
Mga footnote
^ Nangangahulogan nga “An Iya Tolda.”
^ Nangangahulogan nga “An Akon Tolda Aada ha Iya.”
^ Ha iba nga lugar, “hipid.”
^ An Hebreo nga termino bangin may koneksyon ha pulong para ha “tai” ngan gin-gagamit sugad nga pagtamay.
^ O “imoral nga pakighilawas.”
^ O “imoral nga pakighilawas.”
^ O “ginbayaan hira han iya kalag.”
^ O “han akon kalag.”
^ O “han imo kalag.”
^ Lit., “mga iginpatawag.”
^ Gutiay nga taming nga agsob dad-on han mga parapamana.
^ O “mga adorno.”
^ O “han imo kalag.”
^ Lit., “ginlabog ha imo luyo.”
^ Lit., “ginpaagi ha kalayo.”
^ Karuyag sidngon, espirituwal nga pag-adulteryo.
^ Lit., “pagpaagay hin dugo.”
