Ezekiel 35:1-15
-
Tagna kontra ha kabukiran han Seir (1-15)
35 An pulong ni Jehova inabot utro ha akon, nga nasiring:
2 “Anak han tawo, ig-atubang an imo nawong ha kabukiran han Seir,+ ngan panagna kontra hito.+
3 Sidnga ito, ‘Ini an siring ni Jehova nga Soberano nga Ginoo: “Kitaa, nakontra ako ha imo, O kabukiran han Seir, ngan ig-uunat ko an akon kamot kontra ha imo ngan hihimoon ka nga binayaan nga tuna.+
4 An imo mga syudad hihimoon ko nga mga kagubaan, ngan magigin binayaan ka nga tuna;+ ngan makikilala mo gud nga ako hi Jehova.
5 Kay nagpakita ka hin padayon nga pagdumot,+ ngan igintubyan mo an mga Israelita ngadto ha espada ha panahon han ira kadaot, ha panahon han ultimo nga pagsirot ha ira.”’+
6 “‘Salit sugad nga buhi ako,’ nasiring hi Jehova nga Soberano nga Ginoo, ‘ig-aandam ko ikaw ha pagpamatay,* ngan an kamatayon maglalanat ha imo.+ Tungod kay an dugo an imo ginkangalasan, an kamatayon maglalanat ha imo.+
7 An kabukiran han Seir hihimoon ko nga binayaan nga tuna,+ ngan papatayon* ko an bisan hin-o nga naagi ngan an bisan hin-o nga nabalik dida hito.
8 Pupun-on ko han mga ginpamatay an kabukiran hito; ngan an mga ginpamatay pinaagi han espada magkakatutumba ha imo mga bungtod, ha imo mga walog, ngan ha ngatanan mo nga sapa.
9 Hihimoon ko ikaw nga binayaan ha kadayonan, ngan an imo mga syudad diri na uukyan;+ ngan makikilala mo gud nga ako hi Jehova.’
10 “Tungod kay nagsiring ka, ‘Inin duha nga nasud ngan inin duha nga tuna magigin akon, ngan pagtatag-iyahon naton ito,’+ bisan kon hi Jehova mismo nakada hito,
11 ‘salit sugad nga buhi ako,’ nasiring hi Jehova nga Soberano nga Ginoo, ‘tatrataron ko ikaw uyon ha kasina ngan pangabugho nga imo iginpakita tungod han imo kangalas ha ira;+ ngan igpapakilala ko an akon kalugaringon ha butnga nira kon hukman ko na ikaw.
12 Katapos, makikilala mo gud nga ako mismo, hi Jehova, nakabati han ngatanan nga pagtamay nga imo iginyakan kontra ha kabukiran han Israel han nagsiring ka, “Ginhimo na ito nga binayaan ngan igintubyan na ito ha aton basi lamuyon* naton.”
13 Ngan nagyakan ka hin hinambog kontra ha akon, ngan ginpadamu mo an imo mga pulong kontra ha akon.+ Nabatian ko ito ngatanan.’
14 “Ini an siring ni Jehova nga Soberano nga Ginoo: ‘An bug-os nga tuna magrarayhak kon himoon ko na ikaw nga binayaan.
15 Sugad la nga nagrayhak ka han ginhimo nga binayaan an panurundon han panimalay ni Israel, ha sugad nga paagi ko ikaw tatrataron.+ Magigin binayaan ka nga kagubaan, O kabukiran han Seir, oo, an bug-os nga Edom;+ ngan makikilala gud nira nga ako hi Jehova.’”
