Ezekiel 2:1-10
2 Katapos nagsiring hiya ha akon: “Anak han tawo,* tindog basi makaistorya ko ikaw.”+
2 Han nakiistorya hiya ha akon, an espiritu sinulod ha akon ngan ginpatindog ako+ basi mabatian ko Hiya nga nakikiistorya ha akon.
3 Nagsiring pa hiya ha akon: “Anak han tawo, susugoon ko ikaw ngadto ha katawohan han Israel,+ ngadto ha rebelyoso nga mga nasud nga nagrebelde ha akon.+ Hira ngan an ira mga kaapoy-apoyan nagtalapas ha akon tubtob gud hini nga adlaw.+
4 Susugoon ko ikaw ngadto ha mga anak nga rebelyoso* ngan diri namamati,+ ngan kinahanglan sidngan mo hira, ‘Ini an siring ni Jehova nga Soberano nga Ginoo.’
5 Mahitungod ha ira, mamati man hira o magdumiri ha pagpamati—kay rebelyoso hira nga panimalay+—mahibabaro gud hira nga nagkaada propeta dida ha ira.+
6 “Pero ikaw, anak han tawo, ayaw kahadlok ha ira,+ ngan ayaw kahadlok ha ira mga pulong, bisan kon napapalibotan ka hin katunokan*+ ngan naukoy* ha butnga han mga iskorpyon. Ayaw kahadlok ha ira mga pulong,+ ngan ayaw kalisang tungod han ira mga nawong,+ kay rebelyoso hira nga panimalay.
7 Kinahanglan isiring mo ha ira an akon mga pulong, mamati man hira o diri, kay rebelyoso hira nga katawohan.+
8 “Pero ikaw, anak han tawo, pamati ha akon isisiring ha imo. Ayaw pagrebelde pariho hinin rebelyoso nga panimalay. Inganga an imo baba ngan kaona an ihahatag ko ha imo.”+
9 Pagtan-aw ko, nakakita ako hin kamot nga nakaunat ngadi ha akon,+ ngan dida hito nakakita ako hin linukot nga basahon nga may surat.*+
10 Han ginbuklad niya ito ha akon atubangan, may surat ito paluyoluyo.+ Nakasurat dida hito an mga kanta nga masurub-on ngan an kabido ngan an pagnguyngoy.+
Mga footnote
^ “Anak han tawo”; ini an siyahan han 93 ka beses nga paggamit hini nga ekspresyon ha Ezekiel.
^ O “waray respeto.”
^ Ha iba nga lugar, “naistar.”
^ O posible nga “bisan kon an katawohan matig-a an ulo ngan pariho hin mga butang nga nagtutusok ha imo.”
^ O “hin linukot nga basahon han usa nga libro.”
