Ezekiel 13:1-23
13 Ngan an pulong ni Jehova inabot utro ha akon, nga nasiring:
2 “Anak han tawo, panagna kontra ha mga propeta han Israel,+ ngan sidnga adton nag-iimbento han ira kalugaringon nga mga tagna,*+ ‘Pamatii an pulong ni Jehova.
3 Ini an siring ni Jehova nga Soberano nga Ginoo: “Kairo han lurong nga mga propeta, nga nasunod ha ira kalugaringon nga mga ideya,* nga waray man hira nakita!+
4 O Israel, an imo mga propeta nagin pariho hin mga sora* dida ha kagubaan.
5 Diri kamo makadto ha guba nga mga bahin han mga pader nga bato basi tukuron ito utro para ha panimalay ni Israel,+ basi an Israel makailob ha girra han adlaw ni Jehova.”+
6 “Nakakita hira hin buwa nga mga bisyon ngan nagtagna hin diri tinuod, hira nga nasiring, ‘Hi Jehova nagsiring,’ nga hi Jehova mismo waray man magsugo ha ira, ngan ginhinulat nira nga matuman an ira ginsiring.+
7 Diri ba buwa nga bisyon an iyo nakita ngan diri tinuod an iyo igintagna kon nasiring kamo, ‘Hi Jehova nagsiring,’ nga waray man ako ginsiring?”’
8 “‘Salit ini an siring ni Jehova nga Soberano nga Ginoo: “‘Tungod kay buwa an iyo ginyakan ngan diri tinuod an iyo mga bisyon, nakontra ako ha iyo,’ nasiring hi Jehova nga Soberano nga Ginoo.”+
9 An akon kamot nakontra ha mga propeta nga buwa an mga bisyon ngan nagtatagna hin diri tinuod.+ Diri hira mahiuupod ha mga tawo nga duok ko nga mga sangkay; diri liwat hira mahisusurat ha listahan han panimalay ni Israel; diri liwat hira makakabalik ha tuna han Israel; ngan makikilala gud niyo nga ako hi Jehova nga Soberano nga Ginoo.+
10 Ini ngatanan mahitatabo kay ira iginsimang an akon katawohan pinaagi ha pagsiring, “May kamurayawan!” nga waray man kamurayawan.+ Kon an usa nga matapok nga pandibisyon nga bungbong gintutukod, ginpapalitadahan nira ito hin busag nga tinunaw nga apog.’*+
11 “Sumati adton nagpapalitada hin busag nga tinunaw nga apog nga marurumpag ito. Rurub-on ito hin makusog nga bunok, hin uran nga yelo,* ngan hin magkusog nga mga bagyo.+
12 Ngan kon marumpag na an bungbong papakianhan kamo, ‘Hain na man an iyo iginbutang nga palitada?’+
13 “Salit ini an siring ni Jehova nga Soberano nga Ginoo: ‘Magpapahinabo ako hin magkusog nga mga bagyo tungod han akon kapungot, hin makusog nga bunok tungod han akon kasina, ngan hin uran nga yelo basi magbungkag tungod han akon duro nga kasina.
14 Rurub-on ko an bungbong nga iyo ginpalitadahan hin busag nga tinunaw nga apog ngan rurumpagon ito, ngan makikita an pundasyon hito. Ha panahon nga mapukan an syudad, mamamatay kamo ha sulod niya; ngan makikilala gud niyo nga ako hi Jehova.’
15 “‘Kon buhian ko na an ngatanan ko nga kapungot ngada ha bungbong ngan ha mga nagpalitada hito hin busag nga tinunaw nga apog, masiring ako ha iyo: “Waray na an bungbong, ngan waray na an mga nagpalitada hito.+
16 Waray na an mga propeta han Israel, adton nananagna ha Jerusalem ngan nakita hin mga bisyon han kamurayawan para ha iya, nga waray man kamurayawan,”’+ nasiring hi Jehova nga Soberano nga Ginoo.
17 “Mahitungod ha imo, anak han tawo, ig-atubang an imo nawong kontra ha mga anak nga babaye han imo katawohan nga nag-iimbento han ira kalugaringon nga mga tagna, ngan panagna kontra ha ira.
18 Sumati hira, ‘Ini an siring ni Jehova nga Soberano nga Ginoo: “Kairo han mga babaye nga nagtatahi hin mga higot para ha ngatanan nga butkon* ngan naghihimo hin mga pandong para ha mga tawo nga iba-iba an kahitaas basi lit-agon an kinabuhi* han mga tawo! Iyo ba ginlilit-ag an kinabuhi* han akon katawohan ngan nangangalimbasog kamo nga tipigan an iyo kalugaringon nga kinabuhi?*
19 Papasiparahan ba niyo ako dida ha akon katawohan para la ha pipira ka harop nga sebada ngan ha pipira ka tipik nga tinapay,+ pinaagi ha pagpatay han mga* diri angay mamatay ngan pagtipig nga buhi han mga* diri angay mabuhi, nga ginbubuhat ito pinaagi han iyo mga buwa ha akon katawohan, nga namamati ha iyo mga buwa?”’+
20 “Salit ini an siring ni Jehova nga Soberano nga Ginoo: ‘Kitaa, nakontra ako ha iyo mga higot, O mga babaye, nga iyo ginagamit ha paglit-ag ha mga tawo* nga sugad hin mga tamsi hira, ngan panrarabuton ko ito ha iyo mga butkon ngan bubuhian ko adton iyo ginlilit-ag pariho hin mga tamsi.
21 Akon panrarabuton an iyo mga pandong ngan tatalwason an akon katawohan tikang ha iyo kamot, ngan diri na niyo hira malilit-ag; ngan makikilala gud niyo nga ako hi Jehova.+
22 Kay iyo ginhulop an matadong nga tawo pinaagi han iyo kabuwaan+ nga ako ngani diri naghahatag ha iya hin kasakit, ngan iyo ginparig-on an mga kamot han maraot nga tawo,+ basi diri hiya bumaya ha iya maraot nga panggawi ngan padayon nga mabuhi.+
23 Salit kamo nga mga babaye diri na makakakita hin buwa nga mga bisyon ngan magbubuhat hin panigo;+ ngan tatalwason ko an akon katawohan tikang ha iyo kamot, ngan makikilala gud niyo nga ako hi Jehova.’”
Mga footnote
^ O “nananagna tikang ha ira kalugaringon nga kasingkasing.”
^ Lit., “ira kalugaringon nga espiritu.”
^ Ha Ingles, fox.
^ Karuyag sidngon, nagtutukod hin matapok nga sulod nga bungbong ngan nagamit hin busag nga tinunaw nga apog basi magin marig-on ito pagkit-on.
^ Lit., “ngan niyo, O uran nga yelo.”
^ Karuyag sidngon, mga higot nga ginagamit ha madyik nga iginbubutok ha siko o ha may pulso han kamot.
^ O “mga kalag.”
^ O “mga kalag.”
^ O “mga kalag.”
^ O “mga kalag nga.”
^ O “mga kalag nga.”
^ O “mga kalag.”
