Ezekiel 41:1-26
41 Katapos, gindara niya ako ha gawas nga santuaryo,* ngan ginsukol niya an ligid nga mga harigi; unom ka siko* an kahilapad hito ha usa nga ligid ngan unom ka siko an kahilapad ha kaatbang nga ligid.
2 An entrada napulo ka siko an kahilapad, ngan an mga bungbong ha ligid* han entrada lima ka siko ha usa nga ligid ngan lima ka siko ha kaatbang nga ligid. Ginsukol niya an kahilaba hito, nga 40 ka siko, ngan an kahilapad hito, nga 20 ka siko.
3 Katapos, kinadto hiya ha sulod* ngan ginsukol an ligid nga harigi han entrada, ngan duha ka siko an kadakmol hito, ngan an entrada unom ka siko an kahilapad. An mga bungbong ha ligid han entrada* pito ka siko.
4 Katapos, ginsukol niya an kwarto nga naatubang ha gawas nga santuaryo, ngan 20 ka siko an kahilaba hito ngan 20 ka siko an kahilapad.+ Ngan nagsiring hiya ha akon: “Ini an Pinakabaraan.”+
5 Katapos, ginsukol niya an bungbong han templo, ngan unom ka siko an kadakmol hito. An ligid nga mga kwarto ha palibot han templo upat ka siko an kahilapad.+
6 An ligid nga mga kwarto tulo ka andana, nga an usa nga andana natungbaw ha usa pa, ngan may 30 nga kwarto ha tagsa nga andana. An palibot han bungbong han templo may nautwal nga mga bahin nga nagin tungtongan han ligid nga mga kwarto, basi diri na magbuho ha bungbong mismo han templo para taoran han tungtongan han mga kwarto.+
7 Ha paluyoluyo nga ligid han templo may pasirkulo nga aragian* nga nagtitikahaluag samtang nagtitipaigbaw ngadto ha igbaw nga mga kwarto.+ An mga kwarto nagtitikahilapad ha kada andana samtang nasaka an usa nga tawo tikang ha pinakaubos nga andana ngadto ha pinakaigbaw nga andana pinaagi ha pag-agi ha butnga nga andana.
8 Nakakita ako hin hitaas nga salóg ha palibot han templo, ngan an mga pundasyon han ligid nga mga kwarto may sukol nga usa nga bug-os nga tangbo nga unom ka siko tikang ha tuna tubtob ha bawbaw nga eskina.
9 An kadakmol han gawas nga bungbong han ligid nga mga kwarto lima ka siko. May espasyo* ha ligid han istraktura han ligid nga mga kwarto nga bahin han templo.
10 Ha butnga han templo ngan han mga kwarto nga pangaonan*+ may bakante nga lugar nga 20 ka siko an kahilapad paluyoluyo.
11 May usa nga aragian ha butnga han ligid nga mga kwarto ngan han espasyo ha norte nga bahin ngan usa pa nga aragian ha sur nga bahin. An kahilapad han espasyo lima ka siko ha bug-os nga palibot.
12 An istraktura ha weste nga naatubang ha bakante nga lugar 70 ka siko an kahilapad ngan 90 ka siko an kahilaba; an kadakmol han bungbong han istraktura lima ka siko ha bug-os nga palibot.
13 Iya ginsukol an templo, ngan 100 ka siko an kahilaba hito. An bakante nga lugar, an istraktura,* ngan an mga bungbong hito 100 ka siko liwat an kahilaba.
14 An prente han templo nga naatubang ha este ngan an bakante nga lugar 100 ka siko an kahilapad.
15 Ginsukol niya an kahilaba han istraktura nga naatubang ha bakante nga lugar ha luyo, upod na an paluyoluyo nga mga pasilyo, ngan 100 ka siko ito.
Ginsukol liwat niya an gawas nga santuaryo, an sulod nga santuaryo,+ ngan an mga beranda han bungsaran,
16 pati na an mga tamakán ha purtahan, an mga bintana nga nagtitikahaligot an mga hamba,+ ngan an mga pasilyo nga aada hito nga tulo nga lugar. An mga bungbong hirani ha tamakán ha purtahan ginhaklapan hin mga tabla,+ tikang ha salóg tubtob ha mga bintana; ngan natatabonan an mga bintana.
17 Ginsukol an bawbaw han entrada ngan an sulod nga templo ngan an gawas ngan an bug-os nga bungbong ha palibot.
18 May-ada ito inukit nga mga kerubin+ ngan mga ladawan han kahoy nga palma,+ nga an tagsa nga kahoy nga palma nabubutngaan hin duha nga kerubin, ngan an tagsa nga kerubin may duha nga nawong.
19 An nawong han tawo naatubang ha kahoy nga palma ha usa nga ligid, ngan an nawong han leon* naatubang ha kahoy nga palma ha luyo nga ligid.+ Igin-ukit ito ha sugad hini nga paagi ha bug-os nga templo.
20 Tikang ha salóg tubtob ha bawbaw han entrada may-ada inukit nga mga kerubin ngan mga ladawan han kahoy nga palma ha bungbong han santuaryo.
21 Kwadrado an mga hamba han purtahan* han santuaryo.+ Ha atubangan han baraan nga lugar* may-ada sugad hin
22 halaran nga hinimo ha kahoy+ nga tulo ka siko an kahitaas ngan duha ka siko an kahilaba. May mga poste ito ha eskina, ngan an ubos nga bahin* hito ngan an mga ligid hinimo ha kahoy. Katapos nagsiring hiya ha akon: “Ini an lamesa ha atubangan ni Jehova.”+
23 An gawas nga santuaryo ngan an baraan nga lugar may tagduha nga purtahan.+
24 An mga purtahan may tagduha nga sada nga naaabri tipasulod ngan tipagawas, tagduha nga sada ha tagsa nga purtahan.
25 May-ada inukit nga mga kerubin ngan mga ladawan han kahoy nga palma ha mga purtahan han santuaryo, pariho han aadto ha mga bungbong.+ May-ada liwat sugabong nga kahoy ha prente han beranda ha gawas.
26 May-ada liwat mga bintana nga nagtitikahaligot an mga hamba+ ngan mga ladawan han kahoy nga palma ha mga bungbong han beranda, pati na ha mga bungbong han ligid nga mga kwarto han templo ngan ha mga sugabong.
Mga footnote
^ Lit., “ha templo.” Ha kapitulo 41 ngan 42, ini nga termino nagtutudlok ha gawas nga santuaryo (Baraan) o ha bug-os nga santuaryo (an templo upod na an Baraan ngan an Pinakabaraan).
^ Lit., “an mga ligid.”
^ Karuyag sidngon, ha sulod nga santuaryo, o ha Pinakabaraan.
^ Lit., “An kahilapad han entrada.”
^ Posible nga nagtutudlok ha pasirkulo nga mga hagdan.
^ Posible nga usa nga haligot nga dalan ha palibot han templo.
^ O “mga ruwang.”
^ Karuyag sidngon, an istraktura ha weste han santuaryo.
^ O “bata pa nga leon.”
^ Lit., “an hamba han purtahan.” Posible nga nagtutudlok ini ha entrada tipakadto ha Baraan.
^ Posible nga nagtutudlok ha Pinakabaraan.
^ Lit., “an kahilaba.”
