Ezekiel 47:1-23
47 Katapos, gindara niya ako tipabalik ha entrada han templo,+ ngan didto nakakita ako hin tubig nga naagos tipa-este tikang ha ilarom han tamakán ha purtahan han templo,+ kay an prente han templo naatubang ha este. An tubig naagos tipaubos tikang ha ilarom han too nga bahin han templo, ha sur han halaran.
2 Katapos, gintugwayan niya ako tipagawas pinaagi han norte nga ganghaan+ ngan gindara ako ha gawas ngan liniko kami tipakadto ha gawas nga ganghaan nga naatubang ha este,+ ngan nakakita ako hin tubig nga nagtitinuro tikang ha too nga bahin.
3 Han an lalaki ginawas tipakadto ha este nga may ginkakaptan nga higot nga isurukol,+ nagsukol hiya hin 1,000 ka siko* ngan ginpaagi ako ha tubig; tubtob ha mukobuko an kahilarom han tubig.
4 Katapos, nagsukol hiya hin lain nga 1,000 ka siko ngan ginpaagi ako ha tubig, ngan tubtob ha tuhod an tubig.
Nagsukol na liwat hiya hin lain nga 1,000 ka siko ngan ginpaagi ako, ngan tubtob ha baliatang an tubig.
5 Han nagsukol hiya hin lain pa nga 1,000 ka siko, nagin salog na ito nga diri ko matabok pinaagi han pagbaktas, kay an tubig hilarom gud ngan kinahanglan languyon, usa nga salog nga diri matatabok pinaagi han pagbaktas.
6 Nagpakiana hiya: “Nakita mo ba ini, anak han tawo?”
Katapos, ginpalakat niya ako ngan ginpabalik ha ligid han salog.
7 Pagbalik ko, nakita ko nga damu hinduro an kakahoyan ha paluyoluyo nga ligid han salog.+
8 Katapos nagsiring hiya ha akon: “Ini nga tubig naagos tipakadto ha este nga dapit ngan nagpapadayon tipaubos ngadto ha Araba*+ ngan nahingangadto ha dagat. Paghingadto hito ha dagat,+ an tubig didto matatambal.
9 An mga grupo han buhi nga mga linarang* mabubuhi diin man umagos an mga tubig.* Magkakaada hura nga isda, tungod kay ini nga tubig maagos didto. An dagat matatambal, ngan an ngatanan mabubuhi diin man umagos an salog.
10 “An mga parapangisda maninindog ha ligid hito tikang ha En-gedi+ tubtob ha En-eglaim, diin magkakaada bularan hin mga pukot. Magkakaada hura nga isda nga damu kalain, pariho han mga isda ha Daku nga Dagat.*+
11 “Magkakaada ito mga katunggan ngan hanangon nga mga lugar, ngan ini nga mga lugar diri matatambal. Igtutubyan ini ha asin.+
12 “An ngatanan nga klase han kahoy nga may bunga nga makakaon matubo ha paluyoluyo nga ligid han salog. An mga dahon hito diri malalaya; ngan diri ito mawawad-an hin bunga. Kada bulan mamumunga ito hin bag-o nga mga bunga, tungod kay tikang ha santuaryo an tubig nga naagos ngada hito.+ An mga bunga hito magigin pagkaon ngan an mga dahon hito magigin tambal.”+
13 Ini an siring ni Jehova nga Soberano nga Ginoo: “Ini an teritoryo nga iyo ihahatag ha 12 nga tribo han Israel sugad nga tuna nga panurundon, ngan an Jose magkakaada duha nga malon.+
14 Makakapanunod kamo hini ngan makakakarawat hin parapriho nga bahín.* Nanumpa ako nga ihahatag ini nga tuna ha iyo mga kaapoy-apoyan,+ ngan yana iginhahatag* ini ha iyo sugad nga panurundon.
15 “Ini an norte nga tubtoban han tuna: Tikang ini ha Daku nga Dagat ngadto ha dalan tipakadto ha Hetlon+ ngadto ha Zedad,+
16 Hamat,+ Berota,+ ngan Sibraim, nga butnga han teritoryo han Damasco ngan han teritoryo han Hamat, ngadto ha Hazer-haticon, nga hirani ha tubtoban han Hauran.+
17 Salit an tubtoban magtitikang ha dagat tipakadto ha Hazar-enon,+ hirani ha tubtoban han Damasco ha norte, ngan ha tubtoban han Hamat.+ Ini an norte nga tubtoban.
18 “An este nga tubtoban magtitikang ha butnga han Hauran ngan han Damasco ngan masubay ha Jordan nga butnga han Gilead+ ngan han tuna han Israel. Sadang kamo magsukol tikang ha tubtoban* ngadto ha dagat ha este.* Ini an este nga tubtoban.
19 “An sur nga tubtoban* magtitikang ha Tamar ngadto ha katubigan han Meribat-kades,+ katapos ngadto ha Walog* ngan ngadto ha Daku nga Dagat.+ Ini an sur nga tubtoban.*
20 “An weste nga tubtoban amo an Daku nga Dagat, tikang ha tubtoban* ngadto ha dapit nga atbang han Lebo-hamat.*+ Ini an weste nga tubtoban.”
21 “Sadang niyo pagbarahinan ini nga tuna, kamo nga 12 nga tribo han Israel.
22 Sadang niyo ito bahin-bahinon sugad nga panurundon niyo ngan han mga dayo nga naukoy kaupod niyo nga nagkaada mga anak samtang naukoy ha butnga niyo; ngan magigin sugad hira hin tinuod nga mga Israelita para ha iyo. Makakakarawat hira hin panurundon kaupod niyo ha butnga han mga tribo han Israel.
23 An dayo nga residente sadang niyo tagan hin panurundon ha teritoryo han tribo diin hiya naukoy,” nasiring hi Jehova nga Soberano nga Ginoo.
Mga footnote
^ O “ha disyerto nga kapatagan.”
^ O “mga kalag.”
^ Lit., “an duha nga salog.”
^ Karuyag sidngon, an Mediteraneo.
^ O “mahingangada.”
^ Lit., “Makakapanunod kamo hini, an kada tagsa pariho han iya bugto.”
^ Karuyag sidngon, tikang ha norte nga tubtoban.
^ Karuyag sidngon, an Dagat nga Patay.
^ Lit., “an sur nga bahin tipa-sur.”
^ Karuyag sidngon, an Walog han Ehipto.
^ Lit., “an sur nga bahin tipa-sur.”
^ Karuyag sidngon, tikang ha sur nga tubtoban.
^ O “han aragian tipasulod ha Hamat.”
