Ezekiel 6:1-14
6 An pulong ni Jehova inabot utro ha akon, nga nasiring:
2 “Anak han tawo, ig-atubang an imo nawong ha kabukiran han Israel ngan panagna kontra hito.
3 Kinahanglan sumiring ka, ‘O kabukiran han Israel, pamatii an pulong ni Jehova nga Soberano nga Ginoo: Ini an siring ni Jehova nga Soberano nga Ginoo ngadto ha kabukiran, ha mga bungtod, ha mga sapa, ngan ha mga walog: “Kitaa! Magdadara ako hin espada kontra ha iyo, ngan bubungkagon ko an iyo higtaas nga mga lugar.
4 An iyo mga halaran panrurumpagon, an iyo mga burutangan han insenso pan-gugub-on,+ ngan an mga ginpamatay dida ha iyo iglalabog ko ha atubangan han iyo mangil-ad nga mga idolo.*+
5 An patay nga mga lawas han katawohan han Israel iglalabog ko ha atubangan han ira mangil-ad nga mga idolo, ngan an iyo mga tul-an igsasarang ko ha palibot han iyo mga halaran.+
6 Ha ngatanan nga lugar nga iyo gin-uukyan, an mga syudad pan-gugub-on+ ngan an higtaas nga mga lugar panrurumpagon ngan magigin kagubaan.+ An iyo mga halaran panrurumpagon ngan pandudugmukon, an iyo mangil-ad nga mga idolo mahahanaw, an iyo mga burutangan han insenso panbabarion, ngan an iyo mga ginhimo mawawara ngatanan.
7 Ngan an mga ginpamatay magkakatutumba ha iyo butnga,+ ngan makikilala gud niyo nga ako hi Jehova.+
8 “‘“Kondi magbibilin ako hin salin, kay an iba ha iyo makakapalagiw ha espada ha butnga han mga nasud ha panahon nga igsarang kamo ha ngatanan nga katunaan.+
9 Ngan an mga nakapalagiw mahinunumdom ha akon ha butnga han mga nasud diin hira gindara nga bihag.+ Masasantop nira nga nasubo gud ako tungod han ira diri-maunungon* nga kasingkasing nga binaya ha akon+ ngan han ira mga mata nga may malaw-ay nga hingyap* ha ira mangil-ad nga mga idolo.+ Igkakaawod nira ngan kangingil-aran an ngatanan nga maraot ngan mangil-ad nga mga butang nga ira ginbuhat.+
10 Makikilala gud nira nga ako hi Jehova ngan an akon ginsiring nga igpapadapat ko ini nga kabungkagan matutuman gud.”’+
11 “Ini an siring ni Jehova nga Soberano nga Ginoo: ‘Pagpakpak ngan pagbanyak ngan pangaraba tungod han ngatanan nga maraot ngan mangil-ad nga mga butang nga ginbuhat han panimalay ni Israel, kay mamamatay hira pinaagi han espada, han gutom, ngan han peste.+
12 An aadto ha hirayo mamamatay pinaagi han peste, an ha hirani mamamatay pinaagi han espada, ngan an bisan hin-o nga nakapalagiw hini nga duha ngan nahisalin nga buhi mamamatay pinaagi han gutom; ngan bubuhian ko kontra ha ira an ngatanan ko nga kapungot.+
13 Ngan makikilala gud niyo nga ako hi Jehova,+ ha panahon nga an mga ginpamatay dida ha ira magsarang upod han ira mangil-ad nga mga idolo, ha palibot han ira mga halaran,+ ha tagsa nga hitaas nga bungtod, ha pungkay han ngatanan nga bukid, ha ilarom han tagsa nga marampag nga kahoy, ngan ha ilarom han mga sanga han dagku nga mga kahoy diin hira naghahalad hin maghamot nga mga halad* basi mapalipay an ngatanan nira nga mangil-ad nga idolo.+
14 Ig-uunat ko an akon kamot kontra ha ira ngan hihimoon nga binayaan an tuna, ngan an ngatanan nira nga urukyan magigin mas binayaan kay han kamingawan hirani ha Dibla. Ngan makikilala gud nira nga ako hi Jehova.’”
