Ezekiel 20:1-49
20 Yana ha ikapito ka tuig, ha ikalima ka bulan, ha ikanapulo ka adlaw han bulan, an iba han mga tigurang han Israel nangabot ngan nanlingkod ha akon atubangan basi magpakiana kan Jehova.
2 Katapos an pulong ni Jehova inabot ha akon, nga nasiring:
3 “Anak han tawo, pakiistorya ha mga tigurang han Israel, ngan sumati hira, ‘Ini an siring ni Jehova nga Soberano nga Ginoo: “Kinanhi ba kamo basi magpakiana ha akon? ‘Sugad nga buhi ako, diri ako mabaton ha iyo pakiana,’+ nasiring hi Jehova nga Soberano nga Ginoo.”’
4 “Andam ka ba paghukom ha ira?* Andam ka ba paghukom ha ira, anak han tawo? Ipahibaro ha ira an mangil-ad nga mga butang nga ginbuhat han ira mga kaapoy-apoyan.+
5 Sumati hira, ‘Ini an siring ni Jehova nga Soberano nga Ginoo: “Ha adlaw nga ginpili ko an Israel,+ nanumpa liwat ako* ha katulinan* han panimalay ni Jacob, ngan nagpakilala ako ha ira ha tuna han Ehipto.+ Oo, nanumpa ako ha ira ngan nagsiring, ‘Ako hi Jehova nga iyo Dios.’
6 Hito nga adlaw nanumpa ako nga igagawas ko hira tikang ha tuna han Ehipto ngan dadad-on hira ngadto ha tuna nga akon na gin-usisa* para ha ira, usa nga tuna nga nag-aawas hin gatas ngan dugos.+ Ito an pinakamatahom ha* ngatanan nga katunaan.
7 Katapos nagsiring ako ha ira, ‘Kinahanglan ilabog han tagsa ha iyo an mangil-ad nga mga butang nga aada ha iyo atubangan; ayaw hugawi an iyo kalugaringon pinaagi han mangil-ad nga mga idolo* han Ehipto.+ Ako hi Jehova nga iyo Dios.’+
8 “‘“Pero nagrebelde hira ha akon ngan nadiri pagpamati ha akon. Waray nira ilabog an mangil-ad nga mga butang nga nakada ha ira atubangan, ngan waray nira bayai an mangil-ad nga mga idolo han Ehipto.+ Salit nagsaad ako nga ihuhuwad ko ngadto ha ira an akon kapungot ngan bubuhian ko kontra ha ira ha tuna han Ehipto an ngatanan ko nga kasina.
9 Kondi ginios ako para ha akon ngaran basi diri ito mapasiparahan ha atubangan han mga nasud nga ha ira lugar naukoy hira.+ Kay nagpakilala ako ha ira* ha atubangan hini nga mga nasud han igin-gawas ko hira* tikang ha tuna han Ehipto.+
10 Salit igin-gawas ko hira tikang ha tuna han Ehipto ngan gintugwayan hira ngadto ha kamingawan.+
11 “‘“Katapos, iginhatag ko ha ira an akon mga surundon ngan iginpahibaro ha ira an akon hudisyal nga mga desisyon,+ basi mabuhi an tawo nga nasunod hito.+
12 Iginhatag ko liwat ha ira an akon mga sabbath+ sugad nga tigaman butnga ha akon ngan ha ira,+ basi mahibaro hira nga ako, hi Jehova, an nagbabaraan ha ira.
13 “‘“Pero an panimalay ni Israel nagrebelde ha akon ha kamingawan.+ Waray nira sunda an akon mga surundon, ngan iginsalikway nira an akon hudisyal nga mga desisyon, nga kon susundon han usa nga tawo, mabubuhi hiya. Ginpasiparahan gud nira an akon mga sabbath. Salit nagsaad ako nga ihuhuwad ko ngadto ha ira ha kamingawan an akon kapungot basi poohon hira.+
14 Ginios ako para ha akon kalugaringon nga ngaran basi diri ito mapasiparahan ha atubangan han mga nasud, nga nakakita han igin-gawas ko hira.*+
15 Nanumpa liwat ako ha ira ha kamingawan nga diri ko hira dadad-on ha tuna nga iginhatag ko ha ira+—ha usa nga tuna nga nag-aawas hin gatas ngan dugos,+ an pinakamatahom ha* ngatanan nga katunaan—
16 kay iginsalikway nira an akon hudisyal nga mga desisyon, waray nira sunda an akon mga surundon, ngan ginpasiparahan nira an akon mga sabbath, kay an ira kasingkasing nasunod ha ira mangil-ad nga mga idolo.+
17 “‘“Pero nalooy ako* ha ira, ngan waray ko hira bungkaga; waray ko hira pooha ha kamingawan.
18 Nagsiring ako ha ira mga anak didto ha kamingawan,+ ‘Ayaw sunda an mga regulasyon han iyo mga kaapoy-apoyan+ o buhata an ira mga paghukom o hugawi an iyo kalugaringon pinaagi han ira mangil-ad nga mga idolo.
19 Ako hi Jehova nga iyo Dios. Sunda an akon mga surundon, ngan buhata an akon hudisyal nga mga desisyon, ngan tumana ito.+
20 Ngan baraana an akon mga sabbath,+ ngan magigin tigaman ito butnga ha akon ngan ha iyo basi makilala niyo nga ako hi Jehova nga iyo Dios.’+
21 “‘“Pero an mga anak nagtikang magrebelde ha akon.+ Waray nira sunda an akon mga surundon, ngan waray nira buhata ngan tumana an akon hudisyal nga mga desisyon, nga kon susundon han usa nga tawo, mabubuhi hiya. Ginpasiparahan nira an akon mga sabbath. Salit nagsaad ako nga ihuhuwad ko ngadto ha ira an akon kapungot ngan bubuhian ko kontra ha ira ha kamingawan an ngatanan ko nga kasina.+
22 Pero nagpugong ako+ ngan ginios para ha akon kalugaringon nga ngaran,+ basi diri ito mapasiparahan ha atubangan han mga nasud, nga nakakita han igin-gawas ko hira.*
23 Dugang pa, nanumpa ako ha ira ha kamingawan nga igsasarang ko hira dida ha mga nasud ngan igpapatlaag ko hira dida ha katunaan,+
24 kay waray nira tumana an akon hudisyal nga mga desisyon ngan iginsalikway nira an akon mga surundon,+ ginpasiparahan nira an akon mga sabbath, ngan sinunod hira* ha mangil-ad nga mga idolo han ira mga kaapoy-apoyan.+
25 Gintugotan ko liwat hira nga sumunod ha mga regulasyon nga diri maopay ngan ha hudisyal nga mga desisyon nga diri makakahatag ha ira hin kinabuhi.+
26 Ginpabay-an ko hira nga mahugawan han ira kalugaringon nga mga halad—han ginsunog nira ha kalayo* an tagsa nga suhag nga anak+—basi himoon hira nga binayaan, basi makilala nira nga ako hi Jehova.”’
27 “Salit pakiistorya ha panimalay ni Israel, O anak han tawo, ngan sumati hira, ‘Ini an siring ni Jehova nga Soberano nga Ginoo: “Ha sugad liwat hini nga paagi, ginpasiparahan ako han iyo mga kaapoy-apoyan pinaagi han ira pagin diri matinumanon ha akon.
28 Gindara ko hira ha tuna nga akon iginpanumpa nga ihahatag ha ira.+ Ha kada pakakakita nira didto hin hitaas nga bungtod o hin marampag nga kahoy,+ naghahalad hira han ira mga halad nga hayop ngan han iba pa nga mga halad nga nakakapasina. Iginhalad nira an nakakapalipay* nga mga hamot han ira mga halad ngan iginbubo an ira mga halad nga irimnon didto.
29 Salit ginpakianhan ko hira, ‘Kay ano nga napakanhi kamo hini nga hitaas nga lugar? (Gintatawag la gihapon ito nga Hitaas nga Lugar tubtob hini nga adlaw.)’”’+
30 “Yana sidnga an panimalay ni Israel, ‘Ini an siring ni Jehova nga Soberano nga Ginoo: “Ginhuhugawan ba niyo an iyo kalugaringon pariho han ginbuhat han iyo mga kaapoy-apoyan pinaagi ha pagsunod ha ira mangil-ad nga mga idolo basi magsingba* hito?+
31 Ngan ginhuhugawan la ba gihapon niyo an iyo kalugaringon tubtob hini nga adlaw pinaagi ha paghalad ha ngatanan niyo nga mangil-ad nga idolo, nga ginsusunog ha kalayo* an iyo mga anak?+ Mabaton ba ako ha iyo pakiana nga ginbubuhat man niyo ini, O panimalay ni Israel?”’+
“‘Sugad nga buhi ako,’ nasiring hi Jehova nga Soberano nga Ginoo, ‘diri ako mabaton ha iyo pakiana.+
32 Ngan an aada ha iyo hunahuna* kon nasiring kamo, “Magin pariho kita ha mga nasud, pariho ha mga pamilya ha iba nga katunaan, nga nasingba* ha kahoy ngan bato,”+ diri gud mahitatabo.’”
33 “‘Sugad nga buhi ako,’ nasiring hi Jehova nga Soberano nga Ginoo, ‘maghahadi ako ha iyo pinaagi hin gamhanan nga kamot, nakaunat nga butkon, ngan iginhuwad nga kapungot.+
34 Igagawas ko kamo tikang ha mga katawohan ngan titirukon ko kamo tikang ha katunaan diin kamo iginsarang pinaagi hin gamhanan nga kamot, nakaunat nga butkon, ngan iginhuwad nga kapungot.+
35 Dadad-on ko kamo ha kamingawan han mga katawohan ngan bibistahon ko kamo didto hin personal.+
36 “‘Sugad la nga ginbista ko an iyo mga kaapoy-apoyan didto ha kamingawan ha tuna han Ehipto, bibistahon ko liwat kamo,’ nasiring hi Jehova nga Soberano nga Ginoo.
37 ‘Paaagion ko kamo ha ilarom han tungkod han paraataman hin panon+ ngan oobligaron kamo nga tumanon an* kasabotan.
38 Pero kukuhaon ko tikang ha iyo an mga rebelde ngan adton nagtatalapas ha akon.+ Kay igagawas ko hira tikang ha tuna nga ira gin-ukyan sugad nga mga dayo, pero diri hira makakasulod ha tuna han Israel;+ ngan makikilala gud niyo nga ako hi Jehova.’
39 “Mahitungod ha iyo, O panimalay ni Israel, ini an siring ni Jehova nga Soberano nga Ginoo: ‘Lakat an tagsa ha iyo ngan pag-alagad ha iya mangil-ad nga mga idolo.+ Kondi katapos hito, kon diri kamo mamati ha akon, diri na niyo mapapasiparahan an akon baraan nga ngaran pinaagi han iyo mga halad ngan han iyo mangil-ad nga mga idolo.’+
40 “‘Kay ha akon baraan nga bukid, ha usa nga hitaas nga bukid han Israel,’+ nasiring hi Jehova nga Soberano nga Ginoo, ‘didto an bug-os nga panimalay ni Israel, hira ngatanan, mag-aalagad ha akon hito nga tuna.+ Malilipay ako ha ira didto, ngan ig-oobligar ko an iyo mga kontribusyon ngan an siyahan nga mga bunga han iyo mga halad, an ngatanan niyo nga baraan nga butang.+
41 Tungod han nakakapalipay* nga hamot, malilipay ako ha iyo kon igawas ko na kamo tikang ha mga katawohan ngan tirukon kamo tikang ha katunaan diin kamo iginsarang;+ ngan mababaraan ako ha butnga niyo ha atubangan han mga nasud.’+
42 “‘Ngan makikilala gud niyo nga ako hi Jehova+ kon dad-on ko na kamo ha tuna han Israel,+ ha tuna nga akon iginpanumpa nga ihahatag ha iyo mga kaapoy-apoyan.
43 Ngan didto mahinunumdoman niyo an iyo panggawi ngan an ngatanan niyo nga binuhatan nga nagpahugaw ha iyo,+ ngan kangingil-aran niyo an iyo kalugaringon* tungod han ngatanan nga magraot nga butang nga iyo ginbuhat.+
44 Katapos, makikilala gud niyo nga ako hi Jehova kon gumios na ako para ha akon ngaran,+ diri sumala ha iyo maraot nga panggawi o sumala ha iyo magraot nga mga binuhatan, O panimalay ni Israel,’ nasiring hi Jehova nga Soberano nga Ginoo.”
45 Ngan an pulong ni Jehova inabot utro ha akon, nga nasiring:
46 “Anak han tawo, ig-atubang an imo nawong ha direksyon han sur ngan pagpasamwak ha sur, ngan panagna ngadto ha kagurangan ha rehiyon han sur.
47 Sidnga an kagurangan han sur, ‘Pamatii an pulong ni Jehova. Ini an siring ni Jehova nga Soberano nga Ginoo: “Kitaa, magpapalarab ako hin kalayo kontra ha imo,+ ngan uugtangon hito an tagsa nga berde nga kahoy ngan an tagsa nga uga nga kahoy dida ha imo. An naglalaga nga kalayo diri mapaparong,+ ngan an tagsa nga nawong susunugon hito, tikang ha sur ngadto ha norte.
48 Ngan makikita han ngatanan nga tawo* nga ako mismo, hi Jehova, an nagpalarab hito, ngan diri ito mapaparong.”’”+
49 Ngan nagsiring ako: “Abaadaw, O Jehova nga Soberano nga Ginoo! Nasiring hira mahitungod ha akon, ‘Diri ba nagyayakan la hiya hin mga patigo?’”*
Mga footnote
^ O “pagpahayag hin paghukom ha ira?”
^ Lit., “akon liwat gin-alsa an akon kamot.”
^ Lit., “binhi.”
^ O “gin-espiyahan.”
^ O “an dekorasyon han.”
^ An Hebreo nga termino bangin may koneksyon ha pulong para ha “tai” ngan gin-gagamit sugad nga pagtamay.
^ Karuyag sidngon, an Israel.
^ Karuyag sidngon, an Israel.
^ Karuyag sidngon, an Israel.
^ O “an dekorasyon han.”
^ Lit., “an akon mata.”
^ Karuyag sidngon, an Israel.
^ Lit., “an ira mga mata sinunod.”
^ Lit., “ginpaagi nira ha kalayo.”
^ O “nakakarelaks.” Lit., “nakakapakalma.”
^ O “basi magbuhat hin espirituwal nga prostitusyon ngada.”
^ Lit., “ginpapaagi ha kalayo.”
^ Lit., “espiritu.”
^ O “nag-aalagad.”
^ Lit., “dadad-on kamo ngadto ha bugkos han.”
^ O “nakakarelaks.” Lit., “nakakapakalma.”
^ Lit., “an iyo nawong.”
^ Lit., “unod.”
^ O “mga puplunganon?”
