Ezekiel 46:1-24
46 “Ini an siring ni Jehova nga Soberano nga Ginoo: ‘An ganghaan han sulod nga bungsaran nga naatubang ha este+ sadang magpabilin nga sarado+ ha sulod hin unom ka adlaw nga may trabaho,+ pero ha adlaw han Sabbath ngan ha adlaw han dulom sadang ito abrihan.
2 Tikang ha gawas an lider masulod pinaagi han beranda han ganghaan,+ ngan matindog hiya hirani ha hamba han purtahan han ganghaan. An mga saserdote maghahalad han iya bug-os nga halad nga sinunog ngan han iya mga halad nga ginsasarosaroan, ngan mayukbo hiya ha ganggang han ganghaan ngan katapos magawas hiya. Pero an ganghaan diri sadang isara tubtob ha pagsirom.
3 An katawohan han tuna mayukbo liwat ha atubangan ni Jehova ha entrada hito nga ganghaan durante han mga Sabbath ngan han mga dulom.+
4 “‘An bug-os nga halad nga sinunog nga ihahalad han lider kan Jehova ha adlaw han Sabbath kinahanglan unom nga maghimsog nga nati nga karnero nga lalakí ngan usa nga mahimsog nga karnero nga lalakí.+
5 An ihahalad nga halad nga tikang ha lugas usa ka epah* para ha karnero nga lalakí ngan bisan ano nga maihahatag niya para ha nati nga mga karnero nga lalakí, upod na an usa ka hin* nga lana para ha tagsa nga epah.+
6 Ha adlaw han dulom ihahalad an usa nga mahimsog nga turilyo nga baka tikang ha panon han mga baka, unom nga nati nga karnero nga lalakí, ngan usa nga karnero nga lalakí; kinahanglan mahimsog ito ngatanan.+
7 Sadang niya ighalad sugad nga halad nga tikang ha lugas an usa ka epah para ha turilyo nga baka, usa ka epah para ha karnero nga lalakí, ngan bisan ano nga iya maaakos para ha nati nga mga karnero nga lalakí. Ngan sadang hiya maghalad hin usa ka hin nga lana para ha tagsa nga epah.
8 “‘Kon nasulod an lider, sadang hiya sumulod pinaagi han beranda han ganghaan, ngan sadang liwat hiya gumawas pinaagi hito.+
9 Ngan kon an katawohan han tuna nasulod ngadto ha atubangan ni Jehova durante han mga piyesta,+ an mga nasulod pinaagi han norte nga ganghaan+ basi magsingba sadang gumawas pinaagi han sur nga ganghaan,+ ngan an mga nasulod pinaagi han sur nga ganghaan sadang gumawas pinaagi han norte nga ganghaan. Waray sadang gumawas ha ganghaan nga iya ginsudlan, kay sadang hira gumawas ha ganghaan ha atbang nira.
10 May kalabotan ha lider ha butnga nira, sadang hiya sumulod kon nasulod hira, ngan sadang hiya gumawas kon nagawas hira.
11 Durante han mga piyesta ngan han mga panahon han piyesta an ihahalad nga tikang ha lugas usa ka epah para ha turilyo nga baka, usa ka epah para ha karnero nga lalakí, ngan bisan ano nga maihahatag niya para ha nati nga mga karnero nga lalakí, upod na an usa ka hin nga lana para ha tagsa nga epah.+
12 “‘Kon an lider magtagana hin bug-os nga halad nga sinunog+ o hin mga halad nga ginsasarosaroan sugad nga boluntaryo nga halad para kan Jehova, an ganghaan nga naatubang ha este aabrihan para ha iya, ngan itatagana niya an iya bug-os nga halad nga sinunog ngan an iya mga halad nga ginsasarosaroan sugad la han iya ginbubuhat ha adlaw han Sabbath.+ Paggawas niya, sadang sadhan ito nga ganghaan.+
13 “‘Kada adlaw sadang ka magtagana hin mahimsog nga nati nga karnero nga lalakí nga diri malahos ha usa ka tuig an edad sugad nga bug-os nga halad nga sinunog para kan Jehova.+ Sadang mo ini buhaton kada aga.
14 Kaupod hito, kada aga sadang ka magtagana hin ikaunom han usa ka epah sugad nga halad nga tikang ha lugas, pati na hin ikatulo nga bahin han usa ka hin nga lana basi igwisik ha pino nga harina sugad nga regular nga halad nga tikang ha lugas para kan Jehova. Usa ini nga nagpapadayon nga surundon.
15 Kinahanglan itagana nira kada aga an nati nga karnero nga lalakí, an halad nga tikang ha lugas, ngan an lana sugad nga regular nga bug-os nga halad nga sinunog.’
16 “Ini an siring ni Jehova nga Soberano nga Ginoo: ‘Kon an lider maghatag ha tagsa niya nga anak nga lalaki hin regalo sugad nga panurundon, magigin propyedad ito han iya mga anak. Ito an napanunod nira nga panag-iya.
17 Pero kon maghatag hiya ha usa han iya mga surugoon hin regalo tikang ha iya panurundon, magigin panag-iya ito han surugoon tubtob ha tuig han kagawasan;+ katapos, ibabalik ito ha lider. An panurundon la han iya mga anak an magigin permanente nga ira.
18 An lider diri sadang kumuha hin bisan ano nga panurundon han katawohan pinaagi ha pagpwersa ha ira nga bumaya ha ira propyedad. Sadang niya tagan an iya mga anak nga lalaki hin panurundon tikang ha iya kalugaringon nga propyedad, basi waray bisan usa ha akon katawohan an mapaiwas ha iya propyedad.’”
19 Katapos, gindara niya ako ha sulod pinaagi han aragian+ nga sapit han ganghaan tipakadto ha baraan nga mga kwarto nga pangaonan* han mga saserdote, nga naatubang ha norte,+ ngan didto may nakita ako nga lugar ha luyo, dapit ha weste.
20 Nagsiring hiya ha akon: “Ini an lugar diin pakakaladkaran han mga saserdote an halad tungod han pagin salaan ngan an halad tungod han sala ngan diin lulutoon nira an halad nga tikang ha lugas,+ basi diri hira magdara hin bisan ano ngadto ha gawas nga bungsaran ngan diri nira maipasa an pagkabaraan ngadto ha* mga tawo.”+
21 Gindara niya ako ha gawas nga bungsaran ngan gintugwayan ako ha upat nga eskina han bungsaran, ngan may nakita ako nga bungsaran ha tagsa nga eskina han gawas nga bungsaran.
22 Ha upat nga eskina han bungsaran may gudtiay nga mga bungsaran nga 40 ka siko* an kahilaba ngan 30 ka siko an kahilapad. Ito nga upat parapriho an kadaku.*
23 Hito nga upat, may nakapalibot nga mga patongan* ha sulod, ngan ha ubos han mga patongan may hinimo nga mga dapit diin ginpapakaladkaran an mga halad.
24 Katapos, nagsiring hiya ha akon: “Ini an mga balay diin an mga surugoon ha templo nagpapakaladkad han halad han katawohan.”+
