Ezekiel 16:1-63
-
Gugma han Dios ha Jerusalem (1-63)
16 An pulong ni Jehova inabot utro ha akon, nga nasiring:
2 “Anak han tawo, ipahibaro ha Jerusalem an iya mangil-ad nga mga binuhatan.+
3 Kinahanglan sumiring ka, ‘Ini an siring ni Jehova nga Soberano nga Ginoo ngadto ha Jerusalem: “An tuna han Canaanita an imo gintikangan ngan an imo natawhan. Amorita+ an imo tatay, ngan Hiteo+ an imo nanay.
4 Mahitungod han imo katawo, han adlaw nga igin-anak ka, waray utda an imo pusod, waray ka karigoi hin tubig basi magin limpyo, waray ka hirogi hin asin, ngan waray ka putsa hin mga lampin.
5 Waray bisan hin-o nga nalooy ha imo basi buhaton ini nga mga butang. Waray bisan hin-o nga pinaid ha imo. Lugod iginlabog ka ha kahawnan kay ginkangalasan ka* han adlaw nga igin-anak ka.
6 “‘“Han nalabay ako, nakita ko ikaw nga nagbuburobanyak nga dugoon, ngan samtang nahigda ka nga dugoon, nagsiring ako: ‘Ayaw kamatay!’ Oo, nagsiring ako ha imo samtang nahigda ka nga dugoon: ‘Ayaw kamatay!’
7 Ginpadamu ko gud ikaw, pariho hin mga tanom nga nanunurok ha uma, ngan tinubo ka ngan nagdaku ngan nagsul-ot han pinakamag-opay nga mga adorno. Naporma an imo mga suso, ngan naghilaba an imo buhok; pero hubo ka la gihapon ngan waray bado.”’
8 “‘Han nalabay ako ngan nakita ko ikaw, naobserbaran ko nga aada ka na ha edad para ha mga kapahayagan han gugma. Salit ginbitad ko ha bawbaw mo an akon bado*+ ngan gintahoban an imo pagkahubo, ngan nanumpa ako ngan naghimo hin kasabotan ha imo,’ nasiring hi Jehova nga Soberano nga Ginoo, ‘ngan nagin akon ka.
9 Dugang pa, ginkarigoan ko ikaw hin tubig ngan ginhugasan an imo dugo ngan ginhirogan ka hin lana.+
10 Katapos, ginsul-otan ko ikaw hin bado nga may burda ngan gintagan ka hin maopay nga sandalyas nga anit* ngan ginputos ka hin maopay nga klase hin lino, ngan ginsul-otan ko ikaw hin marahalon nga mga bado.
11 Gin-adornohan ko ikaw ngan ginsul-otan hin mga purseras an imo mga kamot ngan hin kwintas an imo liog.
12 Ginbutangan ko liwat hin singsing an imo irong ngan gin-ariyosan an imo mga talinga ngan ginsul-otan hin maopay nga korona an imo ulo.
13 Padayon nga nag-adorno ka hin bulawan ngan silber, ngan an imo sul-ot maopay nga klase hin lino, marahalon nga tela, ngan bado nga may burda. An imo pagkaon pino nga harina, dugos, ngan lana, ngan nagin mahusay ka gud,+ ngan nagin angayan ka nga magin rayna.’”*
14 “‘Nagin bantogan ka* ha mga nasud+ tungod han imo kahusay, kay perpekto ito tungod kay iginbutang ko ha imo an akon mismo pagkaharangdon,’+ nasiring hi Jehova nga Soberano nga Ginoo.”
15 “‘Kondi nagtikang ka pagsarig ha imo kahusay,+ ngan nagin hostes ka tungod han imo kabantogan.+ Nagpatakas ka ha pagbuhat hin prostitusyon ha tagsa nga nalabay,+ ngan nagin iya an imo kahusay.
16 Ginkuha mo an iba han imo mga bado ngan naghimo ka hin dekolores nga higtaas nga mga lugar ngan didto ka nagbuhat hin prostitusyon+—an sugad nga mga butang diri angay buhaton, ngan diri gud ito angay mahitabo.
17 Ginkuha mo liwat an imo mag-opay nga mga alahas* nga hinimo tikang ha bulawan ngan silber nga iginhatag ko ha imo ngan naghimo ka hin mga imahen hin lalaki ngan nagbuhat hin prostitusyon ngada hito.+
18 Ngan ginkuha mo an imo mga bado nga may burda ngan gintabonan hira,* ngan iginhalad mo ha ira an akon lana ngan an akon insenso.+
19 Ngan an iginhatag ko ha imo nga tinapay—nga tikang ha pino nga harina, ha lana, ngan ha dugos nga iginhatag ko ha imo basi kaunon—imo liwat iginhalad ha ira sugad nga nakakapalipay* nga hamot.+ Ito mismo an nahitabo,’ nasiring hi Jehova nga Soberano nga Ginoo.”
20 “‘Imo ginkuha an imo mga anak nga lalaki ngan an imo mga anak nga babaye nga mga anak mo ha akon,+ ngan imo hira iginhalad ha mga idolo basi lamuyon+—kulang pa ba an imo ginbuhat nga prostitusyon?
21 Imo ginpamatay an akon mga anak, ngan imo hira iginhalad pinaagi ha pagsunog ha ira ha kalayo.*+
22 Samtang ginbubuhat mo an ngatanan mo nga mangil-ad nga binuhatan ngan an imo prostitusyon, waray mo hinumdumi an mga adlaw han imo pagkabata han hubo ka ngan waray bado, nga nagbuburobanyak nga dugoon.
23 Katapos han ngatanan mo nga karaotan, kairo, kairo mo,’+ nasiring hi Jehova nga Soberano nga Ginoo.
24 ‘Naghimo ka hin bungdo para ha imo kalugaringon ngan hin hitaas nga lugar para ha imo kalugaringon ha tagsa nga plasa.
25 An imo higtaas nga mga lugar imo gintukod ha pinakaprominente nga lugar han tagsa nga kalye, ngan an imo kahusay imo ginhimo nga mangil-ad pinaagi ha paghatag han imo kalugaringon* ha tagsa nga nalabay,+ ngan ginpadamu mo an imo mga ginbuhat nga prostitusyon.+
26 Nagbuhat ka hin prostitusyon ha mga anak nga lalaki han Ehipto,+ an imo makihilawason nga mga amyaw,* ngan ginpasina mo ako pinaagi han imo diri maihap nga pagbuhat hin prostitusyon.
27 Yana ig-uunat ko an akon kamot kontra ha imo ngan iibanan an imo sustento nga pagkaon+ ngan itutubyan ka ngadto ha pagbuot* han mga babaye nga nangangalas ha imo,+ an mga anak nga babaye han mga Filisteo, nga nangil-aran han imo malaw-ay nga panggawi.+
28 “‘Tungod kay diri ka nakukontento, nagbuhat ka pa hin prostitusyon ha mga anak nga lalaki han Asirya,+ kondi katapos mo magbuhat hin prostitusyon ha ira, waray ka la gihapon makontento.
29 Salit gindugangan mo an imo pagbuhat hin prostitusyon tubtob ha tuna han mga negosyante* ngan tubtob ha mga Caldeo,+ pero waray ka la gihapon makontento.
30 May sakit* gud an imo kasingkasing,’* nasiring hi Jehova nga Soberano nga Ginoo, ‘han ginbuhat mo ini ngatanan nga butang, nga nagawi pariho hin hostes nga waray awod!+
31 Kondi han imo ginhimo an imo bungdo ha pinakaprominente nga lugar han tagsa nga kalye ngan ginhimo an imo hitaas nga lugar ha tagsa nga plasa, diri ka pariho hin hostes, kay nadiri ka nga magpabayad.
32 Usa ka nga asawa nga nag-aadulteryo, nga naruruyag hin mga estranghero imbes han iya kalugaringon nga bana!+
33 An mga tawo an nagriregalo ha ngatanan nga hostes,+ pero ikaw an nagriregalo ha ngatanan nga may malaw-ay nga hingyap ha imo,+ ngan ginhuhukipan mo hira basi kumada ha imo tikang ha ngatanan nga lugar para magbuhat hin prostitusyon.+
34 Kabaliktaran ka gud han iba nga mga babaye nga nagbubuhat hin prostitusyon. Waray nagbubuhat hin prostitusyon pariho han imo paagi! Ikaw an nabayad ha iba, ngan diri hira an nabayad ha imo. Kabaliktaran gud an imo paagi.’
35 “Salit O hostes,+ pamatii an pulong ni Jehova.
36 Ini an siring ni Jehova nga Soberano nga Ginoo: ‘Tungod kay nagpatakas ka ha imo malaw-ay nga hingyap ngan an imo pagkahubo nakita han nagbubuhat ka hin prostitusyon ha ngatanan mo nga karelasyon ngan ha ngatanan mo nga mangil-ad nga idolo,*+ nga imo pa ngani ginhalaran han dugo han imo mga anak,+
37 titirukon ko an ngatanan mo nga karelasyon nga imo ginpalipay, an ngatanan nga imo ginhigugma ngan an ngatanan nga imo ginkangalasan. Titirukon ko hira kontra ha imo tikang ha ngatanan nga lugar ngan ipapakita ko ha ira an imo pagkahubo, ngan makikita ka nira nga hubo gud.+
38 “‘Ngan sisirotan ko ikaw han mga paghukom nga angay ha mga babaye nga nag-aadulteryo+ ngan nagpapatay,*+ ngan papatayon ka tungod han kapungot ngan pangabugho.+
39 Itutubyan ko ikaw ha ira kamot, ngan panrurub-on nira an imo mga bungdo, ngan panrurumpagon an imo higtaas nga mga lugar;+ ngan huhukason nira an imo mga bado+ ngan kukuhaon nira an imo mag-opay nga mga alahas*+ ngan babayaan ka nga hubo ngan waray bado.
40 Magdadara hira hin damu nga tawo kontra ha imo,+ ngan babatuhon ka nira+ ngan papatayon pinaagi han ira mga espada.+
41 Susunugon nira ha kalayo an imo mga balay+ ngan magpapadapat hira hin paghukom ha imo ha atubangan han damu nga babaye; ngan pauundangon ko an imo pagbuhat hin prostitusyon,+ ngan mahunong ka na ha paghatag hin bayad.
42 Dida la mawawara an akon kapungot ha imo,+ ngan an akon kasina mabaya ha imo;+ ngan magigin kalmado ako ngan diri na masisina.’
43 “‘Tungod kay waray mo hinumdumi an mga adlaw han imo pagkabata+ ngan imo ako ginpasina pinaagi ha pagbuhat hini ngatanan nga butang, ipapadapat ko yana ha imo mismo ulo an mga resulta han imo mga panggawi,’ nasiring hi Jehova nga Soberano nga Ginoo, ‘ngan diri mo na ipapadayon an imo malaw-ay nga panggawi ngan an ngatanan mo nga mangil-ad nga binuhatan.
44 “‘Kitaa! An ngatanan nga nagamit hin mga darahunon magamit hini nga darahunon ha imo: “Supo gud ha nanay an iya anak nga babaye!”+
45 Anak ka gud han imo nanay, nga nagtamay ha iya bana ngan ha iya mga anak. Ngan bugto ka gud han imo mga bugto nga babaye, nga nagtamay ha ira mga bana ngan ha ira mga anak. Hiteo an imo nanay, ngan Amorita+ an imo tatay.’”
46 “‘An imo magurang nga babaye amo an Samaria,+ nga naukoy ha imo norte* kaupod an iya mga anak nga babaye,*+ ngan an imo manghod nga babaye, nga naukoy ha imo sur,* amo an Sodoma+ kaupod an iya mga anak nga babaye.+
47 Diri la kay naglakat ka ha ira mga dalan ngan nagsunod ha ira mangil-ad nga mga binuhatan, kondi paglabay la hin halipot nga panahon nagin mas maraot ka pa ngani ha ira ha ngatanan mo nga panggawi.+
48 Sugad nga buhi ako,’ nasiring hi Jehova nga Soberano nga Ginoo, ‘waray buhata han Sodoma nga imo bugto nga babaye ngan han iya mga anak nga babaye an ginbuhat mo ngan han imo mga anak nga babaye.
49 Kitaa! Ini an sayop han Sodoma nga imo bugto nga babaye: Hiya ngan an iya mga anak nga babaye+ mga mapahitas-on,+ hura hin pagkaon,+ ngan murayaw ngan waray ginkakabarak-an;+ kondi waray nira buligi an nag-aantos ngan an pobre.+
50 Nagpabilin hira nga hambog+ ngan nagpadayon han ira mangil-ad nga mga binuhatan ha akon atubangan,+ salit nakita ko nga kinahanglan wad-on hira.+
51 “‘An mga sala han Samaria+ waray ngani magkatunga han kadamu han imo mga sala. Padayon nga ginpadamu mo an imo mangil-ad nga mga binuhatan hin labaw pa kay han ira ginbuhat, tubtob nga nagin matadong na pagkit-on an imo mga bugto nga babaye tungod han ngatanan mo nga mangil-ad nga binuhatan.+
52 Kinahanglan antuson mo yana an pagpakaalo ha imo kay ginpakamatadong mo an panggawi han* imo mga bugto nga babaye. Tungod han imo sala nga pagbuhat hin mas mangil-ad kay han ira ginbuhat, mas matadong hira kay ha imo. Salit yana, kaawod ngan antosa an pagpakaalo tungod kay imo ginhimo nga mas matadong pagkit-on an imo mga bugto nga babaye.’
53 “‘Ngan titirukon ko an mga nabihag ha ira, an mga nabihag ha Sodoma ngan ha iya mga anak nga babaye ngan an mga nabihag ha Samaria ngan ha iya mga anak nga babaye; titirukon ko liwat upod ha ira an mga nabihag ha imo,+
54 basi antuson mo an pagpakaalo ha imo; ngan maaawod ka tungod han imo ginbuhat nga pagliaw ha ira.
55 An imo mismo mga bugto nga babaye, an Sodoma ngan an iya mga anak nga babaye, mabalik ha ira kahimtang hadto, ngan an Samaria ngan an iya mga anak nga babaye mabalik ha ira kahimtang hadto, ngan ikaw pati na an imo mismo mga anak nga babaye mabalik ha iyo kahimtang hadto.+
56 An Sodoma nga imo bugto nga babaye diri takos nga imo unabihon ha adlaw han imo pagpahitaas,
57 antes mabuhayhag an imo mismo karaotan.+ Yana an mga anak nga babaye han Sirya ngan an iya mga kahigrani nagpapakaalo ha imo, ngan an mga anak nga babaye han mga Filisteo,+ an ngatanan nga nakapalibot ha imo, nag-iinsulto ha imo.
58 Aantuson mo an mga resulta han imo malaw-ay nga panggawi ngan han imo mangil-ad nga mga binuhatan,’ nasiring hi Jehova.”
59 “Kay ini an siring ni Jehova nga Soberano nga Ginoo: ‘Bubuhaton ko ha imo yana an sugad han imo ginbuhat,+ kay imo gintamay an panumpa pinaagi han diri pagtuman han kasabotan nga akon ginhimo.+
60 Kondi dudumdumon ko mismo an kasabotan nga akon ginhimo ha imo ha mga adlaw han imo pagkabatan-on, ngan maghihimo ako hin permanente nga kasabotan ha imo.+
61 Mahinunumdoman mo an imo panggawi ngan maaalohan ka+ ha panahon nga karawaton mo an imo mga bugto nga babaye, adton magurang ha imo pati na adton manghod ha imo, ngan ihahatag ko hira ha imo sugad nga mga anak nga babaye, pero diri tungod han kasabotan nga ginhimo ha imo.’
62 “‘Ngan ako mismo maghihimo hin kasabotan ha imo; ngan makikilala mo gud nga ako hi Jehova.
63 Katapos mahinunumdom ka ngan maaawod gud ha pagbuka han imo baba tungod han pagpakaalo ha imo,+ ha panahon nga paraon ko an imo sala bisan pa han ngatanan nga imo ginbuhat,’+ nasiring hi Jehova nga Soberano nga Ginoo.”
Mga footnote
^ O “an imo kalag.”
^ O “an ubos nga bahin han akon bado.”
^ O “anit han poka.” Ha Ingles, sealskin.
^ O “angayan ka para ha hadianon nga katungdanan.”
^ Lit., “An imo ngaran nakaabot.”
^ O “mga adorno.”
^ Karuyag sidngon, an mga idolo nga lalaki.
^ O “nakakarelaks.” Lit., “nakakapakalma.”
^ Lit., “pagpaagi ha ira ha kalayo.”
^ Lit., “pagbikangkang.”
^ Lit., “imo mga amyaw nga daku an unod.”
^ O “kalag.”
^ Lit., “tuna han Canaan.”
^ O “Maluya.”
^ O posible nga “Duro gud an akon kapungot ha imo.”
^ An Hebreo nga termino bangin may koneksyon ha pulong para ha “tai” ngan gin-gagamit sugad nga pagtamay.
^ Lit., “nagpapaagay hin dugo.”
^ O “mga adorno.”
^ Lit., “ha imo too.”
^ Posible gud nga nagtutudlok ha sakop nga mga bungto.
^ Lit., “ha imo wala.”
^ O “kay nakiglantugi ka nga nadapig ha.”
