Ezekiel 17:1-24
17 An pulong ni Jehova inabot utro ha akon, nga nasiring:
2 “Anak han tawo, pagyakan hin patigo ngan pag-istorya hin darahunon mahitungod ha panimalay ni Israel.+
3 Kinahanglan sumiring ka, ‘Ini an siring ni Jehova nga Soberano nga Ginoo: “An daku nga agila,+ nga dagku an mga pako, higlaba an mga kataposan han pako, ngan madakmol ngan dekolores an barahibo, kinadto ha Lebanon+ ngan ginkuha an pungkay han kahoy nga sedro.+
4 Iya ginbanggi an pinakahitaas nga saringsing hito ngan gindara ito ha tuna han mga negosyante* ngan iginbutang ito ha usa nga syudad han mga negosyante.+
5 Katapos nagkuha hiya hin binhi hito nga tuna+ ngan iginbutang ito ha matambok nga uma. Iya ito igintanom pariho hin kahoy nga sause ha ligid han abunda nga katubigan.
6 Katapos, tinurok ito ngan nagin hamubo ngan nagkakanap nga tanom nga ubas,+ nga an mga sanga naatubang ha sulod ngan an mga gamot nanunubo ha ilarom. Salit an binhi nagin tanom nga ubas ngan nanaringsing ngan nananga.+
7 “‘“Ngan may inabot nga usa pa nga daku nga agila,+ nga dagku an mga pako ngan an mga kataposan han pako.+ Katapos, igin-unat gud hito nga tanom nga ubas an mga gamot hito tipakadto ha iya, hirayo tikang ha garden diin ito igintanom, ngan kinanap an mga sanga hito tipakadto ha iya basi tubigan niya ito.+
8 Igintanom na ito ha maopay nga uma hirani ha abunda nga katubigan, basi mananga, mamunga, ngan magin daku nga tanom nga ubas.”’+
9 “Masiring ka, ‘Ini an siring ni Jehova nga Soberano nga Ginoo: “Magrarabong ba ito? Diri ba gagabuton han usa nga tawo an mga gamot hito+ ngan pahihinaboon nga madunot an bunga hito ngan malaya an mga saringsing hito?+ Mauuga gud ito salit diri magkikinahanglan hin makusog nga butkon o hin damu nga tawo basi gabuton ito.
10 Bisan kon itanom ito ha iba nga dapit, magrarabong ba ito? Diri ba ito mauuga gud kon huypan han hangin nga tikang ha este? Mauuga ito ha garden diin ito tumurok.”’”
11 Ngan an pulong ni Jehova inabot utro ha akon, nga nasiring:
12 “Alayon sumati an rebelyoso nga panimalay, ‘Diri ba niyo nasasantop an kahulogan hini nga mga butang?’ Masiring ka, ‘Kitaa! An hadi han Babilonya kinadto ha Jerusalem ngan ginkuha an hadi ngan mga prinsipe hito ngan gindara hira upod ha iya pabalik ha Babilonya.+
13 Dugang pa, ginkuha niya an usa han mga tulin* han hadi+ ngan naghimo hin kasabotan ha iya ngan ginpasumpa hiya.+ Katapos iya ginkuha an prominente nga kalalakin-an han tuna,+
14 basi mapahiubos an ginhadian ngan diri na makabangon pa, basi pinaagi la ha pagtuman han kasabotan nga iya ginhimo makapadayon an pag-eksister hito.+
15 Kondi ha urhi, an hadi nagrebelde ha iya+ pinaagi ha pagsugo han iya mga mensahero ngadto ha Ehipto basi kumuha hin mga kabayo+ ngan hin damu nga sundalo tikang ha ira.+ Maglalampos ba hiya? Makakalikay ba ha sirot an tawo nga nagbubuhat hini nga mga butang? Puydi ba niya talapason an kasabotan ngan pabay-an la hiya nga diri masirotan?’+
16 “‘“Sugad nga buhi ako,” nasiring hi Jehova nga Soberano nga Ginoo, “mamamatay hiya ha Babilonya, ha lugar nga gin-uukyan han hadi* nga naghimo ha iya* nga hadi, an hadi nga an panumpa iya gintamay ngan an kasabotan iya gintalapas.+
17 Ngan an daku nga pwersa militar ngan damu gud nga sundalo han Paraon diri makakabulig ha panahon han girra,+ kon maghimo na hin pan-atake nga mga bungdo ngan magtindog na hin panlikos nga mga pader basi pamatayon an damu nga kinabuhi.*
18 Nagtamay hiya hin panumpa ngan nagtalapas hin kasabotan. Bisan kon nagsaad hiya,* ginbuhat niya ini ngatanan nga butang, ngan diri hiya makakalikay ha sirot.”’
19 “‘Salit ini an siring ni Jehova nga Soberano nga Ginoo: “Sugad nga buhi ako, ipapadapat ko ha iya ulo an mga resulta han pagtamay ha akon panumpa+ ngan han pagtalapas han kasabotan nga akon ginhimo.
20 Bibitaron ko ha bawbaw niya an akon pukot, ngan madadakop hiya ha akon pandakop nga pukot.+ Dadad-on ko hiya ha Babilonya ngan bibistahon ko hiya didto tungod han iya pagkadiri-matinumanon ha akon.+
21 An ngatanan niya nga puga nga sundalo mamamatay pinaagi han espada, ngan an mga mahisasalin nga buhi igsasarang ha tagsa nga direksyon.*+ Katapos makikilala gud niyo nga ako mismo, hi Jehova, an nagyakan.”’+
22 “‘Ini an siring ni Jehova nga Soberano nga Ginoo: “Makuha ako hin saringsing tikang ha pungkay han hitaas nga kahoy nga sedro+ ngan itatanom ko ito, tikang ha pungkay han mga sanga hito magbabanggi ako hin mahumok nga saringsing,+ ngan ako mismo an magtatanom hito ha hitaas nga bukid.+
23 Itatanom ko ito ha usa nga hitaas nga bukid han Israel; ngan an mga sanga hito matubo, ngan mamumunga ito ngan magigin daku nga kahoy nga sedro. Ngan an tagsa nga klase han tamsi maukoy ha ilarom hito ngan masirong ha lambong* han mga dahon hito.
24 Ngan makikilala gud han ngatanan nga kahoy nga ako mismo, hi Jehova, an nagpahamubo han hitaas nga kahoy ngan nagpahitaas han hamubo nga kahoy;+ akon ginpauga an berde nga kahoy ngan ginpabukad an uga nga kahoy.+ Ako mismo, hi Jehova, an nagyakan ngan nagbuhat hito.”’”
