Ezekiel 42:1-20
42 Katapos, gintugwayan niya ako ngadto ha gawas nga bungsaran dapit ha norte.+ Ngan gindara niya ako ha lugar han mga kwarto nga pangaonan nga hirani ha bakante nga lugar,+ ha norte han sapit nga istraktura.+
2 An kahilaba hito tikang ha norte nga entrada 100 ka siko,* ngan 50 ka siko an kahilapad hito.
3 Nakada ito butnga han sulod nga bungsaran, nga 20 ka siko an kahilapad,+ ngan han salóg nga bato han gawas nga bungsaran. Magkaatbang an mga pasilyo hito ngan tulo ito ka andana.
4 Ha atubangan han mga kwarto nga pangaonan* may aragian+ nga 10 ka siko an kahilapad ngan 100 ka siko an kahilaba,* ngan an mga entrada hini nga mga kwarto nga pangaonan naatubang ha norte.
5 An igbaw nga mga kwarto nga pangaonan hini nga istraktura mas haligot kay han aadto ha ubos ngan ha butnga nga mga andana, kay mas daku nga espasyo an gin-okuparan han mga pasilyo.
6 Kay tulo ini ka andana, pero waray ini mga harigi pariho han mga harigi han mga bungsaran. Salit mas daku nga espasyo an naiban ha igbaw nga andana kay ha ubos ngan ha butnga nga mga andana.
7 Singkwenta ka siko an kahilaba han pader nga bato ha gawas, nga hirani ha mga kwarto nga pangaonan nga dapit ha gawas nga bungsaran ngan kaatbang han iba nga mga kwarto nga pangaonan.
8 Kay 50 ka siko an kahilaba han mga kwarto nga pangaonan nga dapit ha gawas nga bungsaran, kondi adton dapit ha santuaryo 100 ka siko an kahilaba.
9 An mga kwarto nga pangaonan may aragian ha este nga bahin nga tipasaka ngada hito tikang ha gawas nga bungsaran.
10 Ha sulod* han pader nga bato han bungsaran dapit ha este, may mga kwarto nga pangaonan liwat, hirani ha bakante nga lugar ngan ha istraktura.+
11 May aragian ha atubangan hito nga pariho han aragian ha mga kwarto nga pangaonan ha norte.+ Pariho an kahilaba ngan kahilapad hito nga mga pangaonan, ngan pariho liwat an mga garawasan ngan mga plano hito. An mga entrada han mga kwarto nga pangaonan ha norte
12 pariho han mga entrada han mga kwarto nga pangaonan ha sur. May entrada ha tinikangan han aragian ha atubangan mismo han pader nga bato dapit ha este, diin makakasulod an usa nga tawo.+
13 Katapos nagsiring hiya ha akon: “An mga kwarto nga pangaonan ha norte ngan an mga kwarto nga pangaonan ha sur, nga pariho sapit han bakante nga lugar,+ amo an baraan nga mga kwarto nga pangaonan diin ginkakaon han mga saserdote nga nadaop kan Jehova an pinakabaraan nga mga halad.+ Dida nira iginbubutang an pinakabaraan nga mga halad, an halad nga tikang ha lugas, an halad tungod han sala, ngan an halad tungod han pagin salaan, kay baraan ito nga lugar.+
14 Kon an mga saserdote nasulod, diri hira angay gumawas tikang ha baraan nga lugar ngadto ha gawas nga bungsaran nga diri anay ginhuhukas an ira sul-ot nga mga bado kon nagsiserbi,+ kay baraan ito. Magsusul-ot hira hin iba nga mga bado basi dumaop ha mga lugar nga igintutugot ha katawohan.”
15 Han natapos hiya pagsukol han sulod nga dapit han templo,* gintugwayan niya ako tipagawas pinaagi han ganghaan nga naatubang ha este,+ ngan ginsukol niya an bug-os nga lugar.
16 Ginsukol niya an este nga bahin gamit an tangbo nga isurukol.* Sumala ha tangbo nga isurukol, 500 ka tangbo an kahilaba hito tikang ha usa nga kataposan ngadto ha luyo nga kataposan.
17 Ginsukol niya an norte nga bahin, ngan sumala ha tangbo nga isurukol, 500 ka tangbo an kahilaba hito.
18 Ginsukol niya an sur nga bahin, ngan sumala ha tangbo nga isurukol, 500 ka tangbo an kahilaba hito.
19 Linibot hiya ngadto ha weste nga bahin. Ginsukol niya ito gamit an tangbo nga isurukol, ngan 500 ka tangbo an kahilaba hito.
20 Ginsukol niya an upat nga bahin hito. May pader nga nakapalibot hito+ nga 500 ka tangbo an kahilaba ngan 500 ka tangbo an kahilapad,+ basi ibulag an baraan ha diri baraan.+
