Ezekiel 30:1-26
30 Ngan an pulong ni Jehova inabot utro ha akon, nga nasiring:
2 “Anak han tawo, panagna ngan siring, ‘Ini an siring ni Jehova nga Soberano nga Ginoo:
“Pagnguyngoy, ‘Abaadaw, maabot na an adlaw!’
3 Kay hirani na an adlaw, oo, hirani na an usa nga adlaw ni Jehova.+
Magigin adlaw ito nga madampog,+ usa nga itinanda nga panahon han mga nasud.+
4 Usa nga espada an maabot kontra ha Ehipto, ngan malilisang gud an Etiopia kon an mga ginpamatay magkatutumba ha Ehipto;An bahandi hito kukuhaon ngan an mga pundasyon hito rurub-on.+
5 An Etiopia,+ an Put,+ an Lud, ngan an ngatanan nga magkadurodilain nga katawohan,*Ngan an Cub, pati na an mga anak han tuna nga aada ha kasabotan,*Hira ngatanan mamamatay pinaagi han espada.”’
6 Ini an siring ni Jehova:
‘An mga nasuporta ha Ehipto mamamatay liwat,Ngan an mapahitas-on nga gahum hito pauubson.’+
“‘Tikang ha Migdol+ ngadto ha Seyene+ mamamatay hira dida ha tuna pinaagi han espada,’ nasiring hi Jehova nga Soberano nga Ginoo.
7 ‘Hihimoon hira nga pinakabinayaan ha ngatanan nga katunaan, ngan an kalugaringon nga mga syudad hito magigin an pinakaguba nga mga syudad.+
8 Ngan makikilala gud nira nga ako hi Jehova kon magpalarab na ako hin kalayo ha Ehipto ngan madugmok na an ngatanan nga kaalyado hito.
9 Hito nga adlaw magsusugo ako hin mga mensahero nga sakay ha mga barko basi pakurugon an Etiopia nga may sobra nga kompyansa; malilisang gud hira ha adlaw nga maabot ha Ehipto, kay maabot gud ito.’
10 “Ini an siring ni Jehova nga Soberano nga Ginoo: ‘Wawad-on ko an katawohan han Ehipto pinaagi han kamot ni Hadi Nabucodonosor* han Babilonya.+
11 Hiya ngan an iya mga sundalo, nga amo an pinakamagpintas han mga nasud,+ dadad-on ha sulod basi bungkagon ito nga tuna. Huhulbuton nira an ira mga espada kontra ha Ehipto ngan pupun-on ito nga tuna han mga ginpamatay.+
12 Pahuhubason ko an mga kanal han Nilo+ ngan ibabaligya ito nga tuna ngadto ha kamot han magraot nga mga tawo. Ito nga tuna ngan an ngatanan nga aada hito hihimoon ko nga binayaan pinaagi han kamot han mga taga-iba nga nasud.+ Ako mismo, hi Jehova, an nagyakan.’
13 “Ini an siring ni Jehova nga Soberano nga Ginoo: ‘Bubungkagon ko liwat an mangil-ad nga mga idolo* ngan wawad-on an waray pulos nga mga dios han Nof.*+ Diri na magkakaada hin prinsipe* tikang ha tuna han Ehipto, ngan pahihinaboon ko nga mahadlok an tuna han Ehipto.+
14 Hihimoon ko nga binayaan an Patros+ ngan magpapalarab ako hin kalayo ha Zoan ngan magpapadapat hin paghukom ha No.*+
15 Ihuhuwad ko an akon kapungot ngadto ha Sin, an balwarte han Ehipto, ngan bubungkagon ko an katawohan han No.
16 Magpapalarab ako hin kalayo ha Ehipto; ngan an Sin mahahadlok gud, an No guguhangan, ngan an Nof* aatakehon durante han adlaw!
17 An batan-on nga mga lalaki han On* ngan han Pibeset mamamatay pinaagi han espada, ngan an katawohan han mga syudad mabibihag.
18 Ha Tehafnehes an adlaw magsisirom kon barion ko na didto an mga yugo han Ehipto.+ An iya mapahitas-on nga gahum matatapos,+ tatabonan hiya hin mga dampog, ngan an katawohan han iya mga bungto mabibihag.+
19 Magpapadapat ako hin paghukom ha Ehipto, ngan makikilala gud nira nga ako hi Jehova.’”
20 Ngan ha ika-11 ka tuig, ha siyahan nga bulan, ha ikapito ka adlaw han bulan, an pulong ni Jehova inabot ha akon, nga nasiring:
21 “Anak han tawo, ginbari ko an butkon han Paraon nga hadi han Ehipto; diri ito bubutkon basi mag-opay o puputson hin bendahe basi magkaada igo nga kusog ha pagkapot han espada.”
22 “Salit ini an siring ni Jehova nga Soberano nga Ginoo: ‘Kitaa, nakontra ako ha Paraon nga hadi han Ehipto,+ ngan babarion ko an iya mga butkon, an makusog ngan an bari,+ ngan pahihinaboon ko nga an espada mahulog tikang ha iya kamot.+
23 Katapos, an mga Ehiptohanon igsasarang ko dida ha mga nasud ngan igpapatlaag dida ha katunaan.+
24 Pakukusgon ko an mga butkon* han hadi han Babilonya+ ngan ibubutang ko ha iya kamot an akon espada,+ ngan babarion ko an mga butkon han Paraon, ngan maghaharoy hiya hin makusog pariho hin tikamatay nga tawo ha iya atubangan.*
25 Pakukusgon ko an mga butkon han hadi han Babilonya, kondi an mga butkon han Paraon mawawad-an hin kusog; ngan makikilala gud nira nga ako hi Jehova kon ibutang ko na ha kamot han hadi han Babilonya an akon espada ngan gamiton niya ito kontra ha tuna han Ehipto.+
26 Ngan an mga Ehiptohanon igsasarang ko dida ha mga nasud ngan igpapatlaag dida ha katunaan,+ ngan makikilala gud nira nga ako hi Jehova.’”
Mga footnote
^ O “an ngatanan nga tikang ha iba nga mga nasud.”
^ Bangin nagtutudlok ha mga Israelita nga nakig-alyansa ha Ehipto.
^ Lit., “Nabucodorosor,” usa pa nga ginagamit nga ispeling.
^ O “lider.”
^ O “Memfis.”
^ An Hebreo nga termino bangin may koneksyon ha pulong para ha “tai” ngan gin-gagamit sugad nga pagtamay.
^ Karuyag sidngon, an Tebes.
^ O “Memfis.”
^ Karuyag sidngon, an Heliopolis.
^ O “Dudugangan ko an gahum.”
^ Karuyag sidngon, ha atubangan han hadi han Babilonya.
